Media-icmal 15.09.20

Ölkə təhsilində vəziyyət, rusdilli məktəblərin fəaliyyətinə baxış, Tofiq Yaqublu ilə bağlı deputatlardan müraciət, aşağı sinif şagirdlərinin sağlamlığına diqqət və s. məsələlər medianın aparıcı mövzuları sırasındadır...

“Azərbaycan” qəzeti “Təhsilin keyfiyyətinin artırılması yeni nailiyyətlərin qazanılmasına imkan verəcək” sərlövhəli məqalədə 15 sentyabr  Bilik Günü ilə bağlı təhsil sahəsindəki vəziyyəti dəyərləndirir.

Müəllif deyir ki, yeni dərs ilinin başlanmasına icazə verilib. Nəhayət ki, 7-8 aylıq ayrılıqdan sonra orta məktəblərdən tutmuş kollec, texnikum, institut və universitetlər müəyyən qaydalar tətbiq edilməklə qapılarını gənclərin üzünə açıb və yada salır ki, bu gün Azərbaycanda 165 min 511 nəfərdən çox uşaq I sinfə gedəcək.

Müəllif lavə edir ki, ölkənin bölgələrində 47 məktəb binası şagirdlərin istifadəsinə verilib ki, onlardan 8-i yeni tikilən, 5-i əsaslı təmir olunan, 34-ü modul tiplidir, daha 15 modul tipli məktəbin quraşdırılması nəzərdə tutulub. İndiyədək ölkənin 45 bölgəsində, ümumilikdə, 293-dən çox modul tipli məktəb quraşdırılıb.

Yazıda vurğulanır ki, ölkədə ali təhsil müəssisələrinin inkişafına, maddi-texniki bazasının genişləndirilməsinə də xüsusi diqqət yetirilr.

Müəllifin deməsinə görə, Azərbaycanın bütün bölgələrində istər orta məktəblərdə, istərsə də universitetlərdə təhsilin dünya standartlarına uyğun qurulması üçün dövlət səviyyəsində ciddi işlər aparılır, təhsil sahəsindəki islahatların daha da dərinləşdirilməsi nəzərdə tutulur.  

“Ölkəmizdə təhsilin keyfiyyətinin artırılması, dövlət vəsaitinin, təhsilə ayrılan investisiyanın səmərəli istifadə olunması qısa zamanda daha böyük nailiyyətlərin əldə olunmasına imkan verəcək”, - məqalədə vurğulanır.

“Yenisabah.az” “Uşaqlarımızı məhv edirlər” – Vahid Əhmədov rusdilli məktəblərlə bağlı”  məqalədə deputat Vahid Əhmədov Azərbaycanda rusdilli məktəblərin fəaliyyətinə münasibətini ifadə edir.

Yeri gəlmişkən, haqqında bəhs olunan mövzu bir neçə gündür ki, sosial şəbəkələrdə müzakirə edilir. Bu müzakirələrin səbəbi isə bu il 12-16 iyul döyüşlərində Rusiyanın Ermənistanı dəstəkləməsi səbb olub. 

Deputat deyir ki, burada əsas olan dövlət dilidir. “Ola bilsin rus dilinə, ingilis dilinə də maraq olsun. Ancaq dövlət səviyyəsində ehtiyatlı olmaq lazımdır. Əgər Rusiya Qarabağ probleminin həllində bizə yardım edən dövlət deyilsə, onun məktəblərinin sayını burada niyə genişləndirməliyik ki? Rusiya əksinə Ermənistana bu illər ərzində silah verib, indi də verməkdə davam edir, Həmin silahlarla da bizim uşaqlarımızı məhv edirlər. 

Deputat xatırladıb ki, Türkiyə illər öncə burada müəyyən məktəblərini açmışdı: “Türklər qardaşımızdır, onlara arxayınıq və bilirik ki, Azərbaycanın hər məsələsində, o cümlədən Qarabağ məsələsində yanımızda olurlar. Təklif edirəm ki, rus dilində  olan məktəblər də digər məktəblər kimi özəl olsun.

V.Əhmədov hesab edir ki, rusdilli məktəbləri müdafiə edənlərin ola bilsin müəyyən maraqları var, bu, başa düşüləndir, amma məktəblər özəlləşsin, kim bu dildə oxumaq istəyirsə, gedib pul verib oxusun.

Niyə dövlət bunu maliyyələşdirməlidir: “Dövlət səviyyəsində bu məsələlərə, öz dilimizə hörmətlə yanaşmalıyıq”, - deputat bildirib.

“Redaktor.az” saytı “Deputatardan Tofiq  Yaqublu ilə bağlı müraciət” sərlövhəli məqalədə deputat Fazil Mustafa T.Yaqublunun həbs məsələsinin hüquq çərçivəsində öz həllini tapmalı olduğunu bəyan edir.

Onun deməsinə görə, T.Yaqublunun əfvi üçün prezidentə müraciət olunması ilə bağlı təklif verib. F. Mustafa hesab edir ki, T.Yaqublunun barəsində verilmiş birinci instansiya məkməsinin qərarından Apellyasiya Məhkəməsində verilən şikayətə apellyasiya instansiyasında obyektiv baxılacaq.

Deputat T. Yaqublunun haqsız yerə həbs olunduğu ilə bağlı fikirlərə də münasibət bildirib: “Cəmiyyətimizdə məhkəmə qərarına birmənalı münasibət yoxdur. Hazırda əsas məsələ T. Yaqublunun azadlığa çıxmasından gedir. Bu məsələ boş tənqidlərlə yox, hüquqi yollarla həll olunmalıdır”, - o bildirib.

“Modern.az” saytı  “Qaydalara əməl edilsə də, əyani təhsilə cəlb olunan uşaqlar risk altındadır” sərlövhəli məqalədə bəhs edilən mövzuya münasibət ifadə edilir.

Müəllif deyir ki, Nazirlər Kabineti yanında Operativ Qərargahın təlimatlarına əsasən, 15 sentyabrda Azərbaycanda 2020/2021-ci tədris ilinə virtual və əyani formada olmaqla start verilir. Bununla bağlı Azərbaycanın  baş pediatrı Nəsib Quliyev müəllim, şagird və validyenlərə bir sıra tövsiyələrini verib.

Baş pediatr xəbərdarllıq edir ki, qarşıda payız fəsli, qriplərin baş qaldırdığı fəsil gəlir, odur ki, istər validyenlər, istər müəllimlər, istərsə də şagirdlər bu məsələlərdə məsuliyyətlərini dərk etməlidirlər.

“Bütün qaydalara riayət edilsə də, nəzərə almalıyıq ki, əyani təhsilə cəlb olunan uşaqlar daim risk altında olacaqlar.  Amma təhsildən də qala bilmərik. Ona görə də daim  bu məsələlərə diqqət etmək lazımdır”, -bunu N.Quliyev bildirib.

Baş pediatr uşaqların səhər yeməyində normal qidalanmasının vacib olduğunu diqqətə çatdırıb: “Uşaqları ac şəkildə məktəbə göndərmək olmaz. Həm təhsil almalıyıq, həm də övladlarımızın səhhətinə qayğı göstərməliyik”.

Baş pediatr əlavə edib ki, hazırda mövsümi xəstəliklərlə bağlı statstika stabil vəziyyətdədir.

Onun deməsinə görə, koronavirusla bağlı əks-epidemik tədbirlər ciddi şəkildə tətbiq edildiyindən qrip virusuna yoluxma olduqca cüzidir, COVİD-lə mübarizədə həm də insanlar digər infeksiyalardan da qorunmuş olurlar. Ona görə də hazırda qrip virusuna yoluxma dəfələrlə azalıb, amma arxayınlaşmaq olmaz.