Media icmal 16.01.21

COVİD-19 pandemiyası əleyhinə peyvəndlənmə prosesinə hazırlıq, Azərbaycanda media sahəsindəki mövcud durum, sosial şəbəkələrin media

sayılıb-sayılmaması, ekspertlərin 11 yanvar 2021-ci il Moskva bəyanatının müddəalarının yerinə yetirilməməsinin səbəbləri barədə rəyləri və s. məsələlər medianın aparıcı mövzuları sırasındadır...  

"Azərbaycan" qəzeti "Səhiyyə Nazirliyi: Peyvənd həkim yoxlanışı və göstərişindən sonra vurulacaq" sərlövhəli məqalədə Azərbaycanda koronavirus infeksiyası əleyhinə  vaksinləşdirmə prosesinin icrasını şərh edir. 

Müəllifin sözlərinə görə, koronavirusa qarşı vaksinlər təlim kursu keçmiş tibb işçiləri tərəfindən vurulacaq.

O deyir ki, peyvənd ediləcək poliklinikalarda tibb işçiləri seçilərək xüsusi kurslara cəlb olunub, burada əsas məqsəd tələb olunan əhaliyə uyğun sayda tibb personalının olmasıdır.

Səhiyyə Nazirliyi nəzdində fəaliyyət göstərən COVID-19-la mübarizə işçi qrupunun üzvü Aris Rüstəmov poliklinikalardakı peyvənd otaqları barədə danışarkən deyib: "Vaksinasiya ilə bağlı poliklinikaya müraciət edən vətəndaşlar üçün bütün şərait və rahatlıq düşünülüb. Peyvəndlər xüsusi ayrılmış peyvənd otaqlarında həkim nəzarəti altında ediləcək. Bunlar qeydiyyat, vaksinasiya və müşahidə otağı olaraq ayrılıb".

A.Rüstəmov deyir ki, peyvənd olunduqdan sonra 30 dəqiqə ərzində vətəndaş müşahidə otağında yarana biləcək hər hansı bir əks təsirlə əlaqəli olaraq izlənməyə alınır. Bu müddət ərzində heç bir əlamət üzə çıxmazsa, vətəndaş evə buraxılır.

Onun sözlərinə görə, peyvənd həkim yoxlanışı və göstərişindən sonra vurulacaq, bu səbəbdən vaksinasiyadan öncə müvafiq olaraq sahə həkiminin yoxlanışından keçmək mütləqdir.

A.Rüstəmova görə, bir xüsusi məsələ də peyvəndlərin doğru saxlanılmasıdır, bunun üçün vaksinasiya həyata keçiriləcək bütün tibb məntəqələri soyuducular və termoçantalarla təmin edilib".

"Yenisabah.az" saytı isə "Elçin Şıxlı Mətbuat Şurası haqqında: O, özü özünü buraxsın" sərlövhəli məqalədə Azərbaycan mediasının mövcud vəziyyətini dəyərləndirir.

Məsələ budur ki, Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərlinin bu günlərdəki həbsindən, bu qurumun bazasında Medianın İnkişafı Agentliyinin yaradılmasından sonra təkcə ölkə mediasının idarə edilməsi yox, bütünlükdə media sahəsi müzakirə obyektinə dönüb.    

Ölkə mediasında Mətbuat Şurasının funksiyalarının da bu quruma veriləcəyi kimi fikirlər dolaşır.

Azərbaycan Jurnalistlər Birliyinin sədri Elçin Şıxlı məsələ ilə bağlı bildirib ki, Mətbuat Şurasının ləğvi üçün qurultay çağrılmalıdır.

E.Şıxlı vurğulayır ki, Mətbuat Şurası ilə Medianın İnkişafı Agentliyi fərqli qurumlardır, belə ki, Mətbuat Şurası dövlət qurumu deyil, onun ləğv olunub-olunmaması jurnalistlərdən-Şuranın üzvlərindən asılıdır. Bəyənmirlərsə, qurultayı çağırıb ləğv olunmasını istəyirlər, bununla da məsələ öz həllini tapır: "Çünki əgər onlar yaradıbsa, onlar ləğv edə bilər, başqa cür mümkün deyil. O, özü özünü buraxsın, amma bundan sonra Mətbuat Şurasına ehtiyacın olub-olmayacağı başqa məsələdir".

"Redaktor.az"  saytında isə "Sosial şəbəkələr media olaraq təqdim edilə bilməz" sərlövhəli məqalədə sosial şəbəkələrin media sayılıb-sayılmaması müzakirə müstəvisinə gətirilir.

Bu barədə jurnalist Vüqar Zifəroğlu bildirib ki, professional media ilə sosial şəbəkələri bir-birindən ayırmaq lazımdır.

V.Zifəroğlu bu düşüncədədir ki, sosial şəbəkələr professional media kimi qəbul edilə bilməz, sosial şəbəkələr sadəcə kütləvi kommunikasiya, ünsiyyət vasitəsidir.

O, hesab edir ki, orada ifadə edilən hər hansı fikir, yaxud yanaşma fərdi məsuliyyətdən irəli gələn yanaşmadır və bəzən də bundan özünü media kimi təqdim edən qurumlar da istifadə edir. Burada məsələni media və fərdi məsuliyyət olaraq iki hissəyə ayıra bilərik.

Jurnalist hesab edir ki, internet platformasında təmsil olunan media orqanlarına da müəyyən diqqət ayrılmalıdır, buraya informasiya saytları və internet televiziyaları daxildir, sosial şəbəkələr yox və buna görə də bu prosesin hüquqi müstəvidə tənzimlənməsi vacib məsələdir.

"Bizmyol.info.az" saytında isə "Proseslər heç də Rusiyanın planladığı kimi getməyəcək" sərlövhəli məqalədə 2021-ci il yanvarın 11-də Moskvada Azərbaycan, Ermənistan, Rusiya liderlərinin imzaladığı bəyanatın müddəalarının yerinə yetirilməsi səviyyəsi dəyərləndirlir.

Müəllif xüsusi olaraq vurğulayır ki, həmin görüşdə Qarabağdakı erməni hərbiçilərinin çıxarılması, Azərbaycanın suverenliyinin bərpası, Şuşa, Kəlbəcər kommunikasiyalarının açılması məsələləri muzakirə edilmədi.

Təhlükəsizlik məsələləri üzrə ekspert İlham İsmayıl isə bildirir ki, Moskvada tərəfləri maraqlandıran və narahat edən məsələlər, ehtimal ki, müzakirə edilib, amma bu barədə nə məlumat verildi, nə də perspektiv tədbirlərə aid edildi.

İ.İsmayıla görə, bu görüş Moskvaya lazım olub.

İ.İsmayıl hesab edir ki, bu görüşlə Türkiyəni Qarabağ nizamlanmasından və ümumiyyətlə Cənubi Qafqazdan uzaqlaşdırmaq mesajı verildi: "Təbii ki, perspektiv proseslər heç də Rusiyanın planladığı kimi getməyəcək, ABŞ da, Türkiyə də Rusiyanın bölgədə tək hakim olmağına mane olacaqlar", deyə ekspert bildirir.

Mehri dəhlizinin tezliklə istifadəyə verilməsi məsələsinə gəlincə, İ.İsmayıl deyir ki, bu, daha çox Rusiyanın işinə yarayacaq, Ermənistan isə Rusiyaya və İrana dəmiryolu ilə çıxış əldə edir: "Yəni, bu yolun yalnız Azərbaycanın Naxçıvan bölgəsi və Türkiyə üçün önəmli olmasını qeyd edənlər bilsinlər ki, düşmən üçün böyük nəfəslik açılmış oldu", deyə İ.İsmayıl bildirir.

Təhükəsizlik məsələləri üzrə eskpert Qarabağda suverenliyini tam həll etmədən Azərbaycanın əlindəki təsir vasitələrini açmasını doğru saymır.

İ.İsmayıla görə, azərbaycanlı qaçqınların Xankəndi və ətraf yerlərə köçürülməsi Azərbaycanın Qarabağda suverenliyinin bərpa olmasının açarıdır: "Bu gün narahatlıq yaradan məsələlərin üzərinə Azərbaycan dövləti vaxtında və qətiyyətlə getməsə, sabah artıq bu narahatlıq yox, problem olacaq", deyə İ.İsmayıl bildirir.

"Müsavat.com"  saytında "Ermənistanı blokadada saxlamaq zərurəti - Bakının centlimensayağı davranışı nə qədər davam edəcək" sərlövhəli məqalədə bəhs olunan məsələyə aydınlıq gətirilir. 

Müəllif hesab edir ki, Ermənistan hələ bir müddət də regional layihələrdən kənarda saxlanılmalıdır ki, Dağlıq Qarabağ ərazisindən tam çıxsın, "artsax" cəfəngiyyatından imtina etsin və bundan sonra layihələrə qoşulsun.

Müəllifə görə, problem budur ki, Qarabağ probleminə son qoyulsa da, "erməni problemi"nə son qoyulmayıb, Ermənistan rəhbərliyi hələ də qeyri-konstruktiv mövqeyindən geri çəkilməyib, Dağlıq Qarabağın statusunun həllindən danışır.

Politoloqlar isə məsələyə hazırda Qarabağa nəzarətin Azərbaycanda olması və Azərbaycanın qalib olması mövqeyindən yanaşırlar, onlara görə Ermənistan bu fürsətləri anlamalıdır, fəlakətə davam etməklə heç nəyə nail ola bilməzlər".

Amma politoloqlar bunu da vurğulayırlar ki, Ermənistanda hakimiyyət davası bitənə qədər belə hallar davam edəcək, amma bunun da bir sonu var.

Politoloqlara görə, 11 yanvar 2021-ci il bəyanatı Ermənistana bir nəfəslikdir, amma indiki Ermənistan hakimiyyətinə müxalif olanlar bunu pozmağa çalışırlar.

Politoloqlar hesab edirlər ki, ermənilər "DQR" iddialarından əl çəkməlidirlər, çünki bu qondarma rejimi Ermənistanın özü belə tanımır.