Media-icmal 16.10.18

Ölkədə sosial-iqtisadi inkişafla bağlı şərhlər, metronun "Koroğlu" stansiyası yaxınlığında "avtomobil xaosu", şəhid pullarının verilməsində ailələrin üzləşdikləri problemlər və s. məsələlər bugünki (16 oktyabr, 2018-ci il) medianın aparıcı mövzularındandır...

İnkişafın əsas şərti - iqtisadi təhlükəsizlik

"Azərbaycan" qəzeti "İqtisadi təhlükəsizlik inkişafın əsas şərtidir" sərlövhəli məqalədə ölkədə sosial-iqtisadi inkişafın uğurlarını dəyərləndirir.

Müəllif xatırladır ki, 2018-ci ilin doqquz ayının sosial-iqtisadi yekunları və qarşıdakı vəzifələrlə bağlı oktyabrın 9-da Prezident İlham Əliyevin sədrliyi ilə Nazirlər Kabinetinin iclası keçirilib.

Həmin iclasın mahiyyətini dəyərləndirmək üçün qəzet müxtəlif rəsmi şəxslərdən şərhlər alır və belə şəxslərdən biri də Milli Məclisin İqtisadi siyasət, sənaye və sahibkarlıq komitəsinin sədri, akademik Ziyad Səmədzadədir.

Z.Səmədzadə deyir ki, ötən illər ərzində Azərbaycan inkişaf tempini qoruyub saxlaya, öz iqtisadiyyatını gücləndirə bilib, bölgənin sabitlik və təhlükəsizlik adasına çevrilib.

Onun sözlərinə görə, əldə edilən hər bir uğur xalqın, dövlətin iqtisadi və siyasi gücünün xeyrinədir: "Bu cür iclasların keçirilməsi çox əhəmiyyətlidir. Çünki bu iclaslarda ölkənin daha da irəliyə getməsi, sabitliyini, təhlükəsizliyini, inkişafını dayanıqlı etməsi yolunda konkret hədəflər müəyyən olunur. Bu dəfə də belə oldu".

Komitə sədri deyir ki, iclasda səslənən fikirlər bir daha göstərdi ki, müstəqil Azərbaycan dövlətinin apardığı siyasət xalqın maraqlarına, dövlətin iqtisadi təhlükəsizliyinin qorunmasına xidmət edir.

Deputat bildirir ki, dövlət baçısı Azərbaycanda müstəqilliyin 100-cü ilində görülən işlərin miqyasından danışıb və hər bir vətəndaş fəxr edə bilər ki, bu 100 ildə ölkə böyük inkişaf yolu keçib.

Komitə sədri iclasda deyilənləri təhlil edərək deyir ki, ölkədə sivil dövlətlərə xas ticarət sistemi formalaşıb, qarşıda qoyulan hədəflərə nail olunub, qlobal dünyada baş verən risklərə baxmayaraq, ölkə iqtisadiyyatı inkişaf edir.

Z.Səmədzadə bildirir ki, Azərbaycan iqtisadiyyatına investisiyalar qoyulması, nəqliyyat dəhlizinin gündən-günə genişlənməsi, Ələt Azad İqtisadi Zonasının yaradılması, "Cənub qaz dəhlizi"nin və "TANAP"ın rəsmi açılışı, Bakı-Tbilisi-Qars dəmir yolu xəttinin işə salınması, TAP-la bağlı işlərin sürətləndirilməsi və Xəzəryanı 5 dövlət başçısının Xəzərin hüquqi statusunu müəyyənləşdirən Bəyannaməyə imza atması ölkənin, dövlət rəhbərinin nə qədər böyük güc və iradə sahibi olmasının əyani və bariz nümunəsidir.

Komitə sədri vurğulayır ki, ulu öndər Heydər Əliyevin qurduğu Azərbaycan dövləti, inkişafın Azərbaycan modelinin artıq dünyada geniş nüfuz qazanması, bunun nəticələri göz qabağındadır: "İqtisadçı, ziyalı, komitə sədri kimi qürur hissi keçirirəm ki, Azərbaycan dövlətinin 100-cü ili də tarixə şərəfli il kimi yazılacaq. Hesab edirəm ki, 2018-ci ilin son üç ayı da çox uğurlu olacaq".

Pulun da gedir, canın da...

"Bizimyol.info"da isə "BNA-nın məhəccərləri işə yaramadı: "Koroğlu"da xaotik vəziyyət hökm sürür" sərlövhəli məqalə oxumaq olar.

Müəllif Bakı Nəqliyyat Agentliyinin metronun (BNA) "Koroğlu" stansiyası yaxınlığında "avtomobil xaosu"nu aradan qaldırmaq üçün tədbirlər gördüyünü, amma bunun nəticəsiz qalmasını ekspertlərlə araşdırır.

Məsələnin mahiyyətinə toxunan müəllif deyir ki, "Koroğlu" stansiyası yaxınlığından Bakı kəndlərinə gedən istiqamətdə yoldan avtobus dayanacağı kimi istifadə etməyə bir müddətdir ki, qadağa qoyulub.

Müəllif deyir ki, sərnişin sıxlığı nəzərə alınaraq avtobusların hərəkəti digər çıxışda quraşdırılmış dayanacağa köçürülüb, Agentlik bura məhəccərlər quraşdırıb, amma sərnişinlər həmin məhəccərlərə də məhəl qoymadan yüksək sürətli yola çıxırlar ki, bu da çoxsaylı yol qəzalarına səbəb olur.

Müəllif iddia edir ki, bu məsələnin ən maraqlı tərəfi qanun pozuntularının yol polisi əməkdaşlarının gözü qarşısında baş verməsidir.

Yol-nəqliyyat eksperti Elməddin Muradlı deyir ki, nəinki gecə saatlarında hətta günün istənilən vaxtında buradakı vəziyyət ürəkaçan deyil və xaotikdir:

"Günün istənilən saatında qanunsuz taksilər öz fəaliyyətini davam etdirir. Əgər orda dayanmaq qadağandırsa, polis buna icazə verməməlidir. Düşünürəm ki, həmin ərazini yenidən müayinə etmək lazımdır".

Ekspert hesab edir ki, bu duruma görə məsuliyyət BNA-nın üzərində qalır, çünki Agentlik nəzarət mexanizmini düzgün qurmayıb.

Ekspert deyir ki, sərnişinlərin vəziyyəti başadüşüləndir, sərnişinlər evlərinə getməlidir.

E.Muradlı iddia edir ki, BNA həmin istiqamətlər üzrə avtobusların fəaliyyətinə nəzarət etmir, nəticədə avtobus qıtlığı və sərnişin sıxlığı yaranır: "Əgər sərnişin həyatını riskə, təhlükəyə ataraq gəlib orda taksilərə minirsə, demək avtobus qıtlığı var. Kim istəyər ki, 30 qəpiklik avtobusu qoyub 2 manat taksiyə pul versin?! Hələ üstəlik də, dəmir və beton arakəsmələrin üzərindən keçib yolun hərəkət hissəsinə çıxdığı üçün qanuna görə 40 manat cərimələnsin".

Ekspertə görə, bütün bu qanunsuzluqların səbəbi budur ki, ciddi avtobus çatışmazlığı var, sıxlıq yaranır, buna görə də sərnişinlər məcbur olub "qanunsuz taksi fəaliyyəti" xidmətindən istifadə edərək evlərinə gedirlər.

E.Muradlı deyir ki, bunun həlli isə olduqca sadədir, belə ki, aidiyyatı qurumlar həmin istqamətlər üzrə avtobusların sayını artırsalar adı çəkilən problemin aradan qalxması üçün yetərlidir.

Oğuldan öncə ölən atanın şəhid pulu alması...

"Qafqazinfo.az"da isə "Deyirlər pulu ərin alıb, o da oğlumdan qabaq ölüb, vərəsələr narazıdır" sərlövhəli məqalə diqqət cəlb edir.

Müəllif deyir ki, ötən həftədən etibarən Əmək və Əhalinin Sosial Müdafiəsi Nazirliyi şəhid hərbi qulluqçuların ailə üzvlərinə birdəfəlik ödəmələrin verilməsinə başlayıb.

Yazı müəllifi bildirir ki, Səfərbərlik və Hərbi Xidmətə Çağırış üzrə Dövlət Xidməti, Ədliyyə Nazirliyi və Dövlət Sığorta Kommersiya Şirkəti tərəfindən nazirliyə təqdim olunan siyahılar əsasında 1997-ci il avqustun 2-dək Azərbaycanın ərazi bütövlüyü uğrunda həlak olmuş, hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə 11 min manat məbləğində birdəfəlik ödəmə həyata keçirilir.

Müəllifin sözlərinə görə, bunun üçün vərəsələr saytda hərbi qulluqçunun soyadı, adı və atasının adını daxil edərək, birdəfəlik ödəməni almağa hüququnun olub-olmadığını yoxlaya bilərlər: "Məlum olub ki, bir sıra ailələr vərəsə olduqları hərbi qulluqçunun ad-soyadını sayta axtarışa verəndə Dövlət Sığorta Kommersiya Təşkilatı tərəfindən sığorta ödənişinin həyata keçirildiyi barədə informasiya ilə qarşılaşırlar".

Müəllif vurğulayır ki, amma ailələrin bəziləri daha əvvəl hər hansı bir ödəniş almadığını iddia edirlər.

"Mənə dedilər ki, o vaxt sığorta ödənişini ərim alıb. Ərim isə 1991-ci ildə vəfat edib, oğlum isə ondan 6 il sonra, yəni 1997-ci ildə şəhid olub. İndi mənə izah etsinlər görüm, bu, necə mümkün ola bilər?". Şəhid anası, eyni zamanda şəhid bacısı Səlminaz Allahyarova bunu "Qafqazinfo"ya müraciətində deyib.

S.Allahyarova deyir ki, hər iki şəhidlə bağlı nazirliyin saytında axtarış verən zaman ailəyə birdəfəlik ödəmənin edildiyi bildirilib, amma ailə bu günə kimi onlara hər hansı bir vəsait verilmədiyini iddia edir.

Müəllif deyir ki, daha bir şikayət Qazax rayonunun Urkmezli kəndindən daxil olub və şikayətçi Vasif Nəsirov bildirir ki, kəndin yeganə şəhidi olan qardaşı Saqif Nəsirov 1993-cü ildə Ağdərə döyüşlərində həlak olub.

Şikayətçi deyir ki, Dövlət Sığorta Kommersiya Şirkətindən onlara cavab bildirilib ki, hərbi qulluqçunun vərəsəsinə (vərəsələrinə) müvafiq sığorta ödənişi edilib, amma ailə belə sığorta ödənilmədiyini bildirir.

Müəllifin sözlərinə görə, Əmək və Əhalinin Sosial Müdafiəsi Nazirliyi isə sayta bildirib ki, vərəsələr nazirliyə rəsmi müraciət etdiyi təqdirdə bu kimi şikayətlər araşdırılır.