Media-icmal 17.08.20

Sosial siyasətin dəyərləndirilməsi, səfir Eldar Həsənovun həbsinə baxışlar, Qarabağ problemi fonunda Azərbaycan-Rusiya, Azərbaycan- Türkiyə münasibətləri və s. məsələlər medianın aparıcı mövzuları sırasındadır...

"Azərbaycan" qəzetində  "Azərbaycanda uğurlu sosial siyasət yürüdülür" (azerbaijan-news.az/view-195725/azerbaycanda-ugurlu-sosial-siyaset-yurudulur) sərlövhəli məqalədə müəllif bu siyasəti COVİD-19 pandemiyası fonunda dəyərləndirərək deyir ki, bütün dünya ölkələri kimi Azərbaycanda da iqtisadi fəallıq azaldı, pandemiya sosial sahəyə təsirini göstərdi.

Müəllif əlavə edir ki, dövlət rəhbərliyi əhalinin sosial müdafiəsini qorumağı əsas hədəf elan etdi və 2020-ci il martın 19-da qəbul edilən sərəncamla pandemiyanın fəsadlarına qarşı mübarizəyə başladı.

Yazı müəllifi vurğulayır ki, bu məqsədlər üçün 600 milyon manat vəsait ayrıldı, dövlət sektorunda 910 min işçidən karantin dövründə təxminən 80 faizi işə çıxmasa da, onların əməkhaqları ödənildi, 2 milyon vətəndaşa sosial təminat növləri (pensiya, təqaüd, müavinət) üzrə ödənişlər verildi, aprel-may aylarında 600 minədək, iyul ayında 16 rayon və şəhər üzrə 290 minə yaxın aztəminatlı işsiz şəxsi əhatə edən aylıq 190 manat birdəfəlik ödəmə proqramı icra edildi.

"Ümumilikdə, Tədbirlər Planı üzrə ayrılan vəsait təqribən 3,5 milyard manatdır, pandemiya ilə əlaqədar sosial dəstək tədbirləri təqribən 5 milyona yaxın vətəndaşı əhatə edir.

Müəllifə görə, Azərbaycan reallığında başqa bir həqiqət odur ki, iqtisadiyyatda baş verən çətinliklərə rəğmən, ölkədə heç bir sosial proqram dayandırılmadı, 2020-ci ildə şəhid ailələri və müharibə əlillərinə rekord sayda - azı 1500 mənzil və fərdi ev verilməsi nəzərdə tutulur ki, onlardan da artıq 554-ü verilib.

Ümumilikdə isə, indiyədək şəhid ailələrinə və müharibə əlillərinə 8142 mənzil və fərdi ev verilib, pensiyaların indeksasiyasına uyğun 1,2 milyon pensiyaçının pensiyaları 16,6 faiz artırılıb, ümumilikdə isə, bu ilin ötən dövründə orta pensiya ötən ilin müvafiq dövrü ilə müqayisədə 27 faiz artaraq 300 manata yaxınlaşıb.

"Müsavat.com" "Eldar Həsənovdan sonra səfirlər xaricdən sığınacaq istəyə bilərlərmi?" sərlövhəli məqalədə bu məsələni qaldırır. Məsələnin aktuallığına səbəb kimi Azərbaycanın Serbiya Respublikasında, Monteneqroda, Bosniya və Hersoqovinadakı səfiri Eldar Həsənovun iyunun 13-də şübhəli şəxs qismində həbs olunmasını göstərir.

Müəllif əlavə edir ki, Dövlət Təhlükəsizlik Xidmətinin yaydığı məlumatda Eldar Həsənovun xeyli miqdarda büdcə vəsaitinin təyinatı üzrə istifadə edilməməsi və digər qanun pozuntularının törədilməsinə dair əsaslı şübhələr müəyyən edildiyi deyilir. Həm də buna qədər XİN-in bəzi vəzifəli əməkdaşlarının həbsi, istintaqın davam etdiyi vurğulanır.

Bir neçə səfir və konsulun geri çağırılması, həbs məsələlərinin gündəmdə olduğunu deyən müəllif bu fonda səfirlərin və digər diplomatik şəxslərin kütləvi şəkildə xaricdən sığınacaq istəyə bilməsi sualını ortaya qoyur.

Deputat Fazil Mustafa  deyir ki, səfirlərin, konsulların istintaqdan gizlənmək üçün ölkəyə gəlməməsi deyə bir şey yoxdur: "Amma kimlər ki, hər hansı bir qanunazidd əməl törədiblər, onlarla bağlı addımlar atıla bilər… Kimlər günahkardırsa, təbii ki, məsuliyyətə cəlb olunmalıdırlar".

Deputat deyir ki, xüsusən də diplomatların barələrində konkret fakt olmadan istintaqa cəlb edilmələri mümkün deyil: "Bu adamlar toxunulmazlığı olan şəxslərdir. Dövlət orqanlarının bu kateqoriyadan olan şəxslərin həbsinə əllərində fakt olmadan getmələri inandırıcı görünmür".

F.Musatafa hesab edir ki, rüşvət və korrupsiyadan istifadə etməklə səfir təyinatı məsələlərinin araşdırılması da vacibdir: "Harda ki, rüşvət və korrupsiya var, səfirin bu istiqamətdə fəaliyyəti var, əlbəttə ki, bu məsələ mütləq şəkildə araşdırılmalıdır".

"Moderator.az"da  "Azərbaycanın etirazı Rusiyanın Ermənistanla bağlı siyasətini çətin ki, dəyişsin, amma…" sərlövhəli məqalədə keçmiş Baş nazir Pənah Hüseyn Rusiyanın Ermənistana hərbi təyinatlı yüklər göndərməsini və rəsmi Bakının buna mövqeyini dəyərləndirir. 

Müəllif deyir ki, Rusiya Ermənistana iyul ayının 17-dən etibarən 400 tona qədər silah-sursat göndərib, Prezident İlham Əliyev RF prezidenti Putinlə telefon danışığı zamanı buna münasibət ifadə edib.

Bundan irəli gələrək, müəllif rəsmi Bakının bu etirazının Rusiyanın Ermənistanla bağlı məlum siyasətində nəyisə dəyişə biləcəyi mümkünlüyü ilə bağlı P.Hüseynə sual ünvanlayır.

P.Hüseyn bunu yerində atılan addım kimi səciyyələndirib: "Rusiya Ermənistanın rəsmi hərbi müttəfiqi kimi qalır. Onlar eyni hərbi blokda təmsil olunur, Ermənistanda Rusiyanın qoşunu yerləşir. Odur ki, Rusiyanın bu məsələ ilə bağlı siyasətini dəyişdirəcəyini ehtimal etmirəm. Amma hər halda Azərbaycan tərəfi öz mövqeyini ifadə etməli, etirazını bildirməlidir. Şübhəsiz ki, bunun müəyyən məsələlərə təsiri ola bilər".

P.Hüseyn əlavə edir ki, 90-cı illərin ortalarında da Rusiya Ermənistana 2 milyard dollarlıq silah satmışdı, o zaman da bu məsələlər müzakirə olundu,  amma bu situasiyada elə bir əhəmiyyətli dəyişiklik müşahidə edilmədi.

"Bir daha qeyd edirəm ki, Azərbaycan tərəfi öz etirazını, Rusiyanın siaysətində nələrinsə dəyişib-dəyişməməsindən asılı olmayaraq, qoymalı idi və qoydu da. Bu baxımdan Rusiyaya ünvanlanan bu etirazı yerində atılan addım hesab edirəm".

"Azpolitika.info"   "Ərdoğanın dönəmində Qarabağ məsələsi öz həllini tapacaq" sərlövhəli məqalədə Qarabağ problemi fonunda deputat Vahid Əhmədov Azərbaycan-Rusiya və Azərbaycan-Türkiyə münasibətlərini dəyərləndirir. 

V.Əhmədov deyir ki, Milli Məclisin deputatları arasında da elələri var ki, vəzifədən çıxıb kənarda oturan, kifayət qədər vəsaiti olan şəxslər də var - hansı ki, Rusiyanı müdafiə edirlər: "Rusiya nə deyər" düşüncəsindədirlər. Birincisi, Rusiya nə deyə bilər? Rusiya özü Gürcüstana, Ukraynaya girəndə, Moldovada o vəziyyəti yaradanda ona nə dedilər? Azərbaycanda Qarabağ münaqişəsini mən yaratmamışam ki. Rusiya yaradıb da. Yəni hərbi əməliyyatlar aparılacaq, o torpaqlar azad ediləcək".

Deputat əlavə edir ki, Azərbaycan dövləti buna hazırlaşır, sonda da bu məsələ həllini tapacaq. Bu, Türkiyə dövləti ilə hansısa müqavilələrin imzalanmasından da asılıdır, hərbi müqavilələr, ya hərbi-strateji müqavilələr...

Deputat Ərdoğan hakimiyyəti zamanında Türkiyə ilə birgə Qarabağ məsələsinin həllinə nail olmaq firkrilə tam razı olduğunu vurğulayır.

"Çünki Ərdoğanın son vaxtlar ümumiyyətlə, dünya siyasətində rolu həddən artıq böyükdür. Apardığı siyasət, FETÖ-ya qarşı mübarizəsi, 2015-də dövlət çevrilişinin qarşısını alması onu dünya siyasətində önə çıxartdı. Onun həm Rusiya ilə münasibətlərində müsbət məqamlar çoxdur, həm ABŞ, həm də Avropa ilə".

Onun sözlərinə görə, son vaxtlar Ərdoğanın siyasətini qəbul etməyən dövlətlərin sayı çoxalıb: "Çünki heç kim istəmir ki, kimsə ondan güclü olsun. 

Türkiyə güclənib, kifayət qədər təcrübəli dövlət başçısı var. Ona görə də biz Qarabağ məsələsini bu dövrdə həll etməliyik".