Media-icmal 17.12.19

“Equioner” neft-qaz şirkətinin Azərbaycanda fəaliyyəti, icbari tibbi sığorta və sənədsiz evlər ətrafında müzakirələr, son vaxtlar baş vermiş yanğınların səbəblərinə baxış və s. məsələlər bugünki medianın aparıcı mövzularındandır...

Köhnə şirkət yeni adla

“Azərbaycan” qəzeti ““Equinor” Azərbaycandakı işini yeni layihələrlə davam etdirir” sərlövhəli məqalədə bu şirkətin Azərbaycandakı fəaliyyətini dəyərləndirir. 

Müəllif deyir ki, Xəzərin Azərbaycana aid “Qarabağ” yatağında üzən qazma qurğusu ilə qiymətləndirici quyunun qazılmasına hazırlıq gedir, quyu qazılandan sonra yataqda stasionar özülün quraşdırılması və hasilatın başlanması planlaşdırılır.

Müəllif əlavə edir ki, özülün dayaq blokunun inşaat işləri  Heydər Əliyev adına Bakı Dərin Özüllər Zavodunun ərazisində “BOS ŞELF” şirkəti tərəfindən başa çatdırılmaq üzrədir.

Müəllifin sözlərinə görə, SOCAR və “Equinor” şirkətləri rəhbərlərinin bu yaxınlarda keçirilən görüşündə layihənin daha sürətlə icra olunması üçün bu istiqamətdə atılacaq növbəti addımlar müəyyən edilib.

Məqalədə vurğulanır ki, Norveçin “Equinor” şirkəti keçən ilədək “Statoyl” adlandırılırdı və Azərbaycanda 1992-ci ildən fəaliyyət göstərir.

Müəlllifin sözlərinə görə, “Qarabağ” üzrə ilkin razılaşma iki şirkət arasında 2017-ci ilin dekabrında əldə olunub. Yatağın işlənməsi ilə əlaqədar Risk Xidməti Sazişi isə 2018-ci ilin mayında imzalanıb.

Yataqdan ilk hasilatın 2021-ci ildə əldə olunacağı gözlənilir, layihənin icrasında SOCAR-la “Equinor”un hərəsi 50 faiz iştirak payına malikdir və birgə əməliyyat şirkətinin yaradılacağı da bildirilir.

Müəllif deyir ki, bu yataq şərq istiqamətində də Bakıdan 120 kilometr aralıda, dənizin 150-200 metr dərinliyində yerləşir və yatağı “Azəri-Çıraq-Günəşli”nin (AÇG) yaxın qonşusu da adlandırmaq olar, onları 15 kilometrlik məsafə ayırır.

Yazı müəllifi yada salır ki, Norveçin “Equinor” şirkəti Azərbaycanda 1992-ci ildən fəaliyyət göstərir. Şirkət “Azəri-Çıraq-Günəşli” yataqlarının işlənməsi və Bakı-Tbilisi-Ceyhan əsas ixrac neft kəməri layihələrində sanballı iştirak payına malikdir.

Müəllif vurğulayır ki, “Equinor” SOCAR-la həyata keçirdiyi daha bir ortaq layihə, yəni “Əşrəfi-Dan Ulduzu-Aypara” üzrə tərəfdaşıdır, bu ilin sentyabrından layihə çərçivəsində kəşfiyyat işlərinə başlanılıb.

Məüllif son olaraq deyir ki, “Equinor” şirkətinin tərəfdaş olduğu layihələr üzrə bu günlərdə SOCAR-ın və adı çəkilən şirkətin rəhbər nümayəndələrinin görüşündə də söhbət məhz adı çəkilən layihələrdən gedib, yaxın vaxtlarda və perspektivdə görüləcək işlər müəyyən olunub.

Biri həll edilməsə o biri necə olacaq?

“Modern.az”da isə “İcbari tibbi sığorta tətbiq edilənədək sənədsiz evlər məsələsi həll olunmalıdır – deputat” sərlövhəli məqalə oxumaq olar.

Müəllif 2020-ci ildən ölkədə icbari tibbi sığortanın tətbiq olunacağı, bu halda sənədsiz evlərdə yaşayan insanların probleminin necə həll ediləcəyi barədə V çağırış Milli Məclisinin deputatı Vahid Əhmədovla söhbətləşir.

Müəllif deyir ki, 2020-ci ildən respublika üzrə icbari tibbi sığortanın dörd mərhələdə tətbiqi nəzərdə tutulur, burada həyata keçirilməsi vacib məqamlardan biri də vətəndaşların yaşadığı yer üzrə qeydiyyatının aparılmasıdır.

Müəllif əlavə edir ki, Azərbaycanda uzun illərdir sənədsiz torpaq sahələri və evlərin dövlət reyestrinə daxil edilməsi problemi həll edilmədən qalır, Prezident İlham Əliyev məsələ ilə bağlı aidiyyatı qurumlara dəfələrlə göstəriş versə də, konkret nəticə, hələ ki, yoxdur.

Müəllif yada salır ki, bir neçə il əvvəl Bakı Şəhər İcra Hakimiyyəti hazırda paytaxt və paytaxtətrafı ərazilərdə tikilmiş sənədləşdirilməsi mümkün hesab edilən evlərin sayının 700 mindən artıq olduğunu bildirir. 

Keçmiş deputat V.Əhmədov “modern.az”a bildirir ki, bu problem illərdir ki, həllini gözləyir: “Bu mövzu ilə bağlı dəfələrlə cənab Prezident də öz göstərişlərini verib, fikirlərini səsləndirib, Bakı Şəhər İcra Hakimiyyəti müvafiq addımlar atıb, amma məsələ həll edilmədən qalır. Yanvarın 1-dən 4 mərhələ üzrə icbari tibbi sığortanın tətbiqinə başlanılır. İcbari tibbi sığorta tətbiq edilənədək ümumiyyətlə sənədsiz evlər məsələsi həll olunmalıdır. Yanvarın 1-nə isə az qalır, bu məsələ çoxdan həll edilməli idi, artıq çox gecikirik. O vaxt Bakı Şəhər İcra Hakimiyyəti, Əmlak Məsələləri üzrə Dövlət Komitəsinə tapşırılıb, amma hələ də bir nəticə hasil olmayıb”.

V.Əhmədov qeyd edib ki, icbari tibbi sığortanın tətbiqi zamanı müəyyən problemlərin ortaya çıxması gözləniləndir: “İcbari tibbi sığorta təcrübəsi Azərbaycanda ilk dəfə tətbiq ediləcək, Bu baxımdan qanun tam tətbiq edilənədək müəyyən suallar, problemlər meydana çıxa bilər. Amma evlərin sənədsiz olması buna əsas olmamalıdır”.

Deputat xüsusi olaraq vurğulayıb ki, icbari tibbi sığortanın tətbiqi üçün vətəndaşların dəqiq ünvanını göstərən sənəd olmalıdır: “İstənilən halda problem öz həllini tapmalıdır. Çünki 2020-ci ildən icbari tibbi sığortanın tətbiqi üçün insanların ünvanları dəqiq göstərilməlidir. Ona görə də aidiyyatı qurumlar icbari tibbi sığortanın tətbiqinədək “sənədsiz evlər” məsələsini həll etməlidirlər”.

Bu yanğınların səbəbi nədir?

“Ovqat.com”da isə “Yanğınların arxasında hansı amillər var: Xarici qüvvələr, islahatları sabotaj, yoxsa “fövqəl-səhlənkarlıq?” sərlövhəli məqalə diqqət çəkir.

Müəllif bu günlərdə “EuroHome” tikinti materialları ticarət mərkəzinin və ardınca 3-cü mikrorayon bazarlarının, ondan öncə də bir sıra obyektlərin yanmasının səbəbləri barədə siyasilər və ekspertlərlə söhbətləşir.

Müəllifə görə, bu yanğınlar bir sıra suallar meydana gətirir, tez-tez baş verən bu yanğınların nədən baş verməsi düşündürücüdür.

Bütöv Azərbaycan Xalq Cəbhəsi Partiyasının sədr müavini Bünyamin Qəmbərli iddia edir ki, bu yanğınlar islahatları sabotajdır.

B.Qəmbərli bu yanğınları təsadüfi saymır: “Düşünmürəm ki, bu yanğınlar hakimiyyətdaxili mübarizənin nəticəsidir. Fikrimcə, bu yanğınlar açıq-açığına islahatları sabotajdır, işdən çıxan məmurların prezidentə və ya o məmuları müdafiə eləyən xarici qüvvələrin Azərbaycan hakimiyyətinə, yaxud Azərbaycan dövlətinə qarşı mübarizəsidir”.

B.Qəmbərli hesab edir ki, bu yanğınlardan qurtarmaq üçün aidiyyatı qurumlar təcili standartlar müəyyən etməli, bütün bazarlardan, böyük ticarət mərkəzlərinin hamısından bu standartlara uyğun olması tələb olunmalı, əks halda onların fəaliyyəti dayandırılmalıdır: “İkincisi, o standartlara uyğunlaşandan sonra, necə ki, maşınlara, evlərə icbari sığorta var, o cür müəyyən məbləğdə icbari sığortalama olmalıdır, könüllü sığortalama isə daha böyük məbləğdə ola bilər.

Üçüncüsü, bütün böyük alış-veriş mərkəzlərində, bazarlarda dəyən ziyan obyekt sahiblərinə ödətdirilməlidir”.

Təhlükəsizlik məsələləri üzrə ekspert İlham İsmayıl isə fərqli düşünərək bu yanğınlarda xaricdən qaynaqlanan heç bir məsələ olmadığını bildirir: “O, bizim səhlənkarlığımızın nəticəsidir. Mən deyərdim ki, birinci növbədə, “EuroHome”dakı adamların, ikinci növbədə isə Fövqalədə Hallar Nazirliyinin səhlənkarlığıdır. Fövqalədə Hallar Nazirliyi ora yanğın təhlükəsizliyi ilə əlaqədar avadanlıqlar verir, oranı hər ay yoxlamalıdırlar. Hər halda, mən onu səhlənkarlıq kimi qiymətləndirirəm”.

Sosial şəbəkələrdə “EuroHome” tikinti materialları bazarında yanğının Sumqayıt yolunun genişləndirilməsi ilə bağlı törədildiyini iddia edənlərə gəlincə, İ.İsmayıl deyir ki, bu yalandır, bu səhlənkarlıqdan başqa bir şey deyil.

İ.İsmayıl deyir ki, xarici qüvvə təxribat törətmək istəsə, daha dəhşətli yanğınlar çıxarar: “Xarici qüvvə təxribatı nədən ötrü törətməlidir? Siyasətə təsir etmək üçün? Azərbaycan siyasətinə təsir etmək üçün o xarici güc təzyiq etmək istəsə, onu “EuroHome”da deyil, tamam başqa bir yerdə həll edə bilər və daha ağır nəticələr ortaya çıxar. Burada xarici qüvvənin əli yoxdur”.