Media-icmal 18.06.20

Ölkənin regional sənaye inqilabı mərkəzinə çevrilməsi, hökumətin koronavirus pandemiyası ilə mübarizədə karantin rejimində yumşalmadan sərtliyə dönməsi, bu mübarizədə sıxlığı azaltmaq üçün əhalinin Bakıdan rayonlara getməsinə icazə verilməsinə baxış, Pirşağı sakinlərinin su və yol qayğıları və s. məsələlər medianın aparıcı mövzuları sırasındadır... 

Sənaye inqilabı üzrə regional mərkəz

Rəsmi "Azərbaycan" qəzeti "Azərbaycan sənaye inqilabı üzrə regional mərkəzə çevrilir" sərlövhəli məqalədə ölkədə sənaye inqilabının vəziyyətini qiymətləndirir.

Müəllif deyir ki, bu günlərdə dövlət başçısı İlham Əliyevin "Microsoft" şirkətinin vitse-prezidenti Filip Roq və s. aparıcı şəxslərilə videokonfrans formatında görüşü olub.

Müəllifin sözlərinə görə, videokonfransda bildirilib ki, hazırda Azərbaycanda rəqəmsal transformasiya üzrə hökumət strategiyası üzərində işlənilir və bu məsələdə "Microsoft"la yaxşı əməkdaşlıq üçün böyük ümid var.

Dövlət başçısı bu proqramın növbəti 5 il üçün planlaşdırıldığını deyib: "Eyni zamanda, süni intellekt üzrə strategiyanın ətraflı işlənib hazırlanması ilə bağlı məsələlər də bizim gündəliyimizdədir. Kibertəhlükəsizlik hər zaman gündəlikdədir, çünki bu, bütün ölkələrin hazırlıqlı olmalı olduğu məsələdir. İndiyədək bizdə belə böyük hallar olmayıb, lakin heç kim sığortalanmayıb".

Müəllifin sözlərinə görə, dövlət başçısı ona görə də bu məsələnin gələcək üçün prioritetlər sırasında qaldığını vurğulayıb, pandemiya ilə əlaqədar vəziyyətin təhsil və distant təhsil məsələlərinə yeni bucaqdan baxış zərurəti yaratdığını deyib.

Müəllifin sözlərinə görə, videokonfrans zamanı vurğulanıb ki, Azərbaycan artıq sənaye inqilabı üzrə regional mərkəzə çevrilir. Əsas strategiya karbohidrogen ehtiyatlarından asılılığı azaltmaq və innovasiyalar, yeni texnologiyalar və müasir idarəçilik əsasında dayanıqlı inkişafa nail olmaqdır.

O nə idi, bu nədir?

"Yenisabah.az" saytı "Karantin virusa qalib gəlmir, yayılma sürətini azaldır…" sərlövhəli məqalədə müəllif koronavirus pandemiyası ilə bağlı Azərbaycandakı vəziyyəti ekspert Natiq Cəfərli ilə dəyərləndirir.

N.Cəfərliyə görə, karantin rejiminin, qadağalarının tək bir məqsədi virusun sürətlə yayılmasının qarşısını almaq, zaman qazanmaq, bu zaman kəsimində yeni modul tipli xəstəxanalar, yeni reanimasiya otaqları yaratmaq, süni tənəffüs aparatları, tibbi avadanlıqlar almaq, dezinfeksiya məhsullarını ölkəyə gətirmək idi.

"Karantin öz-özlüyündə virusa qalib gəlmir, sadəcə virusun yayılma sürətini azaldır ki, hazırlaşmaq mümkün olsun", deyə ekspert vurğulayır. 

Daha sonra N.Cəfərli əlavə edir ki, mayın 18-dən bəzi yumşaldılmalar olub, yoluxma sayı isə aprel ayındakı 78 nəfərdən may ayında 521 nəfərə yüksəlib.

N.Cəfərli deyir ki, ağlı və məntiqi olan hər kəs hökumətin nə etdiyini bildiyi və bu addımların təsadüfi atılmadığı qənaətində idi: "Əgər SMS-i ləğv edib iqtisadiyyatı açırlarsa, deməli, artıq səhiyyə sistemini qaydaya salıblar, xəstə qəbulu üçün artıqlaması ilə yer hazırlayıblar, yəqin reanimasiya sayı da artırılıb, süni tənəffüs aparatları da alınıb ki, hökumət rahat açılıma gedir".

Onun fikrincə, iyunun 6-7-də hökumət geriyə addım ataraq zibil atmağa, çörək və dərman satmağa, evdən çıxmağa qəti qadağa qoydu: "Yaxşı, o yumşalma nədir, üzərindən 3 gün keçməmiş bu qadağalar nədir?".

N.Cəfərli çıxış yolu olaraq hesab edir ki, hökumət tezliklə səhiyyə, iqtisadi, sosial və siyasi idarəetmə istiqamətləri üzrə böhran masası qurmalıdır. 

Pirşağının su və yol "dərdi"

"Oxu.az" saytında isə "Pirşağı sakinləri su və yol problemi ilə bağlı Prezidentə müraciət ediblər" sərlövhəli məqalə diqqət cəlb edir.

Müəllifin sözlərinə görə, qəsəbə sakinləri su və qəsəbə daxili yolların vəziyyətindən şikayətlənirlər.

Pirşağının yol və su problemi yaşamasının 30 illik bir tarixi olduğu vurğulanır: "Ancaq bu gün kənddəki həyat su və yollar olmadan donub qalıb", - müəlliflər belə deyirlər.

Sakinlərə görə, bütün standartlara və tələblərə cavab verən yeganə yol qəsəbəni Sumqayıt ilə birləşdirən mərkəzi yoldur.

Müəlliflər su məsələsini qəsəbənin ən vacib problemi adlandırırlar: "30 ildir su maşınları ilə su alırıq, dövlət suyunun qiymətindən 10 qat artıq pul ödəyirik. Bəzi ərazilərə su xətti çəkilib, sayğaclar quraşdırılıb, lakin su hələ də gəlmir, gəlsə də, saatla olur", - deyə məktubda bildirilir.  

Sakinlər vurğulayırlar ki, sərt karantin günlərində su maşınları işləmədiyi üçün sakinlər bu vacib ehtiyaclarını ödəmək üçün artıqlaması ilə pul ödəməli olublar.

Məktub ünvanlayan sakinlər ümid edirlər ki, dövlət başçısı onların problemləri ilə şəxsən tanış olacaq.

Bakıdan əhalini çıxarmaq - Baş infeksionist

"Azpolitika.info" saytında  "Bu vəziyyət sentyabra qədər davam edə bilər" - Bakıda əhalini azaltmaq lazımdır" sərlövhəli məqalədə müəllif pandemiyaya qarşı mübarizə ilə bağlı ölkənin baş infeksionisti Cəlal İsayevlə söhbətləşir.  

Müəllif deyir ki, Azərbaycanda koronavirus epidemiyasına yoluxma pik həddə çatıb, buna səbəb kimi isə aprelin sonlarından sərt karantin rejimindəki yumşalmaları göstərir. 

Müəllif hesab edir ki, elə bu səbəbdən ölkənin 9 şəhər və rayonunda karantin rejimi saxlanılır, gündəlik yoluxmalar 300 nəfərə yüksəlib, qoruyucu vasitələrdən istifadə olunmur.

C.İsayev deyir ki, yoluxma, ölüm artır, o, bunu vətəndaşların qoruyucu vasitələrdən istifadə etməməsi ilə əlaqələndirir.

Baş infeksionistə görə, Azərbaycanda əhalinin maska taxması, sosial məsafə gözləməsi bu virusla mübarizə üçün ən yaxşı üsullardır.

C.İsayevə görə, maska taxmağa məcbur edilməklə, cərimələməklə nəticə əldə olunmur, buarada könüllülük, vəziyyətin ağırlığının məsuliyyətini anlamaq aparıcı olmalıdır. 

Onun fikrincə, insanların rayonlara buraxılması, Bakıda sıxlığı azaltmaq lazımıdır: "Hesab edirəm ki, Bakıda əhali azalsa, ictimai nəqliyyatda saxlıq olmasa, yoluxmanın da get-gedə azalmasını görəcəyik".

Baş infrksionist hesab edir ki, bu vəziyyət sentyabra kimi davam edə bilər.