Media-icmal 19.03.2016

Rəsmi qəzetlər son 10 ildəki əfv fərmanları haqda yazır, ardıcıl olmayan siyasi addımlar,  regional münasibət, MSK-nın partiyalardan maliyyə hesabatı tələbi kimi mövzular isə müstəqil medianın aparıcı mövzusudur.

Rəsmi “Azərbaycan” qəzeti son 13 ildə 6 min 472 nəfərin əfv fərmanı ilə azadlğa çıxması ilə bağlı “29-cu əfv” məqaləsini diqqət mərkəzinə çəkir. Məqalədə həbs edilən insanların əfv olunması ilə bağlı belə deyilir.  “Prezident İlham Əliyevin bu əfv sərəncamı Novruz bayramı ərəfəsində qohum-əqrəbası həbsdə olan bir çox ailəyə sonsuz sevinc bəxş etdi. Müxtəlif səbəblərdən azadlıqdan məhrum edilərək həbs olunan və artıq cəzalarının müəyyən hissəsini çəkən, eyni zamanda islah olunma istiqamətində müsbət nəticə əldə edən insanlar azad cəmiyyətə qovuşdular və şübhə yoxdur ki, onlar ictimai həyatda öz yerlərini tutacaqlar. Bu şansın verilməsi dövlətimizin humanizm və siyasətinin mahiyyətindən və məzmunundan doğur”. 

Bu qədər də qeyri-ciddi hökumət olar?

“Azadlıq” qəzetində dərc edilən “Bəs deyirdiniz DTT-yə üzvlük milli maraqlara ziddir?” adlı məqalədə rəsmi Bakının Dünya Ticarət Təşkilatına üzvlük məsələsində tutduğu mövqe kəskin tənqid edilir. 1997-ci ildən bu quruma üzvlük məsələsinə dair danışıqlar gedir, rəsmi Bakı “milli maraqlara ziddir” adı ilə bu üzvlüyü qəbul etmir. Az qala 20 illik danışıqlardan sonra hökumətin “milli maraqlara zidd” saydığı üzvlüyə hazırlaşması birmənalı qarşılanmır. “Hökumət öz maraqlarını təmin etmək, qeyri-şəffaf fəaliyyəti davam etdirmək üçün demokratik idarəçilikdən qaçıb. Amma neftin qiymətinin kəskin enməsi, valyuta ehtiyatlarının azalması, ölkənin ağır böhranla üz-üzə qalması hökuməti bəzi addımları atmağa məcbur edib”.

Daha sonra məqalədə 160 ölkənin bu qurumun üzvu olduğu xatırladılır. “Sadəcə, hökumət inhisarı, korrupsiyanı davam etdirmək, azad sahibkarlığı boğmaq üçün həmişə DTT-dən kənar gəzib”.

Məqalədə hökumətin DTT-yə münasibətdə 20 il illik mövqeyi ölkənin ticarətinə zərbə kimi dəyərləndirilir. “Yəqin ki, bu qədər qeyri-ciddi hökumət heç bir xalqın payına düşməyib. Demək istəyirik ki, hökumətin uzun illərdir “dünya bizə paxıllıq edir”, “milli maraqlarımız təhdid altındadır”, “bizim öz yolumuz var” təbliğatı, sadəcə, demokratrik islahatlardan qaçmaq üçün olub. ”Ancaq hökumət beynəlxalq öhdəliklərinə əməl etsəydi, bu gün Azərbaycanın adı “qara siyahı”ya düşməzdi. DTT-yə üzv olmaq, siyasi məhbusların bir hissəsini azadlığa buraxmaq problemi həll etmir. Ölkəni düşdüyü  bataqlıqdan çıxsrmaq üçün köklü islahatlara ehtiyac var.   

ABŞ Xəzər akvatoriyasında müdafiə üçün 130 milyon dollar xərcləyəcək

“Görünür, ABŞ yenidən Azərbaycanla hərbi əməkdaşlıq məsələsinə qayıdıb.

Bu günlərdə Oklahoma ştatı milli qvardiyası təmsilçilərinin Azərbaycana işgüzar səfəri belə deməyə əsas verir”. Bu cümlə “Novoe Vremya” qəzetində dərc edilən “Amerika generalları Azərbaycan aerodromları ilə tanış olurlar” adlı məqalədən götürülüb.

Daha sonra məqalədə nümyəndə heyətinin hərbi-hava bazalarında olmasına diqqət çəkilir, generalların hərbı təyyarələrin təlim uçuşlarını izlədikləri deyilir.

Qəzet yazır ki, ABŞ Xəzər akvatoriyasında öz həyati maraqlarını qorumaq üçün qarşıdakı 6 ildə 130 milyon dollar vəsait qoymaq niyyətindədir. “Bu proqam “Xəzəri Müdafiə Təşəbbüsü” adlanır, Xəzərin ayrı-ayrı sahillərində yerləşən Azərbaycan və Qazaxıstan kimi Qərbyönlü ölkələrə fokuslanıb”.

Bundan əlavə, bu təşəbbüs çərçivəsində hava və dəniz nəqliyyatlarının təhlükəsizliyini idarə edə bilmək üçün mərkəz tikilməsi də nəzərdə tutulur. Məqalədə 2001-ci ildə ABŞ-da törədilən terror aktından sonra təhlükə gələ biləcək region kimi Xəzər ətrafına diqqət güclənib. Bu təşəbbüsün həm də Azərbaycanın təhlükəsizliyini də yüksək səviyyədə təmin etmək kimi tərəfi də var.

Bakının ABŞ-ın müttəfiqi Türkiyə ilə də aktiv hərbi əməkdaşlıq etdiyini xüsusi vurğulayan qəzetə görə, Bakının Qərblə münasibətlərinin yaxşılaşması və Amerika generallarının burada üzə çıxması ABŞ-ın Cənubi Qafqazda yeni planlarından xəbər verir.

Sərdar Cəlaloğlu: “MSK-nın bu tələbi Konstitusiyaya ziddir”.

“Siyasi partiyaların seçkilərdən kənar fəaliyyətilə bağlı Mərkəzi Seçki (MSK) Komissiyasına maliyyə hesabatı verməsi Konstitusiyaya ziddir”. Demokrat Partiyasının sədri Sərdar Cəlaloğlu bunu  MSK-nın partiyalardan illik maliyyə hesabatı tələb etməsini “Yeni Müsavat” qəzetinə şərh edərkən deyib.

Onun fikrincə, partiyalar bu hesabatı verməsələr belə hər hansı məsuliyyət yarada bilməz. “Ölkənin əsas  qanunu Konstitusiyadır və əslində Konstitusiyaya zidd olaraq “Siyasi partiyalar haqqında” qanuna məlum əlavəni ediblər. Ona görə də bu qanunda siyasi partiyaların MSK-ya maliyyə hesabatı verməsini əks etdirən maddənin özü Konstitusiyaya zidd olduğu üçün o maddənin hüquqi qüvvəsi yoxdur”.

Digər tərəfdən, S.Cəlaloğlu bu tələbi ölkədə hüquqi nihilizmin nümunələrindən biri kimi dəyərləndirib. Dövlət büdcəsindən maliyyələşməyən partiyalardan maliyyə hesabatı istənilməsini absurd hesab etdiyini deyib. “Dövlət yalnız özünün verdiyinin xərclənməsinə və qeyri-qanuni xərclərə nəzarət edə bilər. “Mən öz cibimdən pul xərcələyib, partiya üzvlərilə görüş təşkil edirəmsə bunun hesabatını niyə verməliyəm”.