Media-icmal 19.12.20

Koronavirusa qarşı mübarizə, Rusiya sülhməramlılarının fəaliyyətinə baxış, Xankəndinə kimlər gətirilir, Azərbaycan-Rusiya quru sərhədlərinin iki aydan çox bağlı qalacağının səbəbləri və s. məsələlər medianın aparıcı mövzuları sırasındadır

"Azərbaycan" qəzetində "Koronavirusdan qorunmağın yollarından biri də immuniteti möhkəmləndirməkdir" sərlövhəli məqalədə bu virusdan qorunma üsullarından bəhs olunur.

Müəllif vurğulayır ki, hazırda Yer planetində 75 milyondan çox insan bu virusa yoluxub. Müəllif koronavirusa qarşı peyvəndin tapılmasını belə  hələ onunla mübarizənin sona çatması kimi dəyərləndirir. Müəllifə görə, hədəf insanların 60-70 faizində xəstəliyə qarşı immunitetin yarandığını görməkdir ki, bu da ən az altı ay vaxt tələb edən prosesdir.

Azərbaycana gəlincə, müəllif deyir ki, gündəlik yoluxma sayı 4 mindən çoxdur,  bundan irəli gələrək, virusun yayılmasının qarşısının alınması məqsədilə 2020-ci il dekabrın 14-dən 2021-ci il yanvarın 18-dək sərtləşdirilmiş karantin tədbirləri tətbiq edilib.

Müəllif əlavə edir ki, qoruyucu vasitələrdən istifadə etmək tələblərinə əməl etmək üçün cərimələr artırılır, fiziki şəxslər 200-400, vəzifəli şəxslər 4000-10 000, hüquqi şəxslər  5000-11 000 manatadək məbləğdə cərimə edilir.

Müəllifin fikrincə, bu virusa qarşı vaksinə qədər ən vacib şərt karantin qaydalarına ciddi riayət olunmasıdır, maskadan istifadə etmək, sosial məsafə saxlamaq, gigiyenik qaydalara, xüsusən əllərin gigiyenasına əməl etmək lazımdır.

"Yenisabah.az" saytı isə "Putinin bu fikirləri əslində təhdiddir" sərlövhəli məqalədə Azərbaycan Demokratiya və Rifah (ADR) Hərəkatının rəhbəri Qubad İbadoğlunun düçüncələrinə yer verib.

Söhbət nədən gedir? Rusiya prezidenti Vladimir Putin dekabrın 17-də keçirdiyi mətbuat konfransında Qarabağla bağlı bildirib: "Dağlıq Qarabağ beynəlxalq hüquqa əsasən Azərbaycanın tərkib hissəsi sayılır və Qarabağın statusu dəyişməz olaraq qalmalı və gələcəkdə həll olunmalıdır". 

Q.İbadoğlu hesab edir ki, bu iki fərqli fikir, əslində hər iki tərəfə, həm Azərbaycana, həm də Ermənistana, yumşaq deyilsə, mesajdır, olduğu kimi təqdim edilsə, bu, təhdiddir".

Hərəkat rəhbərinə görə, bu, həm də Qarabağın bu gününün və gələcəyinin tərəflərin özlərini necə aparmasından, daha doğrusu ruslardan asılı olmasının göstəricisidir.

Q.İbadoğlu deyir ki, noyabrın 10-da rus sülhməramlılarının Qarabağa yerləşməsi hər iki ölkənin yaxın gələcəyinin Rusiyadan asılı vəziyyətə düşməsi deməkdir.

Hərəkat rəhbəri əlavə edir ki, Rusiyanın arzuedilməz təsir dairəsindən xilas olmaq üçün Azərbaycan Türkiyə ilə hərbi əməkdaşlığı gücləndirməli, insan və maliyyə resurslarından daha rasional istifadə etməli, hazırda cəmiyyətdə mövcud olan həmrəylik qorunub saxlanmalıdır.

Müsavat.com saytında isə "Ermənistandan Xankəndinə" qaçqın" adı altında terrorçular gətirilir?" sərlövhəli məqalədə bu məsələnin nə dərəcədə gerçək olması mübahisəlndirilir.

Müəllif deyir ki, ermənilər "köçkün" adı ilə bir ucdan Xankəndinə aparılır və Rusiyanın məlumatına görə, onların sayı artıq 40 mini keçib, proses davam edir. Bundan irəli gələrək, müəllif Azərbaycanın bu prosesə nəzarət edib-etməməsi məsələsini ön plana çıxarır.

Deputat Razi Nurullayev Bakının bu prosesi diqqətlə izlədiyini desə də, birbaşa nəzarətin olması barədə qəti fikir bildirməyi çətin sayır. Deputat hesab edir ki, narahatlıq doğuran cəhət "Rusiya "sülhməramlılarının" qaçqınları Qarabağa qaytarmaq və s. səlahiyyətlərinə aid olmayan məsələlərlə məşğul olmalarıdır və onlar bunu birtərəfli edirlər, odur ki, Azərbaycan bu məsələyə diqqətlə yanaşmalıdır və bölgəyə kimlərin gətirildiyi nəzarət altında olmalıdır".

O vurğulayır ki, Azərbaycan Laçın dəhlizinə Rusiya sülhməramlıları ilə bərabər nəzarət etməlidir və bu, 10 noyabrda imzalanan üçtərəfli bəyanatda əksini tapıb. Odur ki, Azərbaycanın müvafiq silahlı qüvvələrinin nümayəndələri ruslarla bərabər Laçın dəhlizində pasport yoxlaması həyata keçirməli, Azərbaycanın miqrasiya xidməti orada olmalıdır kİ, terrorçular və s. Azərbaycan torpaqlarına daxil ola bilməsinlər.

"Modern.az" saytı isə "Rusiya Azərbaycan sərhədi bu tarixədək bağlanır – rəsmi" sərlövhəli məqalədə Rusiyanın Azərbaycanla quru sərhədlərini bir müddətə tam bağlamasını diqqətə çatdırır.

Məqalədə deyilir ki, Rusiya Federasiyasının bu addımı atmasına səbəb son vaxtlar koronavirusa yoluxanların sayının kəskin artması və sərt karantin tədbirlərinin tətbiq olunmasıdır

"Rusiya və Azərbaycanda koronavirusa yoluxanların sayının kəskin artması və ölkəmizdə sərt karantin tədbirlərinin tətbiqi ilə əlaqədar Rusiya Federasiyası (Dağıstan Respublikası) ilə Azərbaycan Respublikası arasında quru dövlət sərhədi vətəndaşların keçidi üçün 2021-ci ilin 1 mart tarixinədək bağlı olacaqdır", deyə məqalədə vurğulanır.

Müəllifin sözlərinə görə, bu barədə Azərbaycanın Rusiyadakı səfirliyi də məlumat yayıb.

Səfirliyin yaydığı məlumatda isə belə deyilir: "Qış fəslini, əlverişsiz hava şəraitini, infrastrukturun və məişət şəraitinin olmamasını nəzərə alaraq, həmçinin ciddi problemlərlə üzləşməmək üçün Səfirlik Azərbaycan Respublikası vətəndaşlarından sərhədi keçmək məqsədi ilə Dağıstana getməkdən çəkinməyi təkidlə xahiş edir".