Media-icmal 20.02.2017

Ölkənin xarici siyasi kursunun dəyərləndirilməsi, ABŞ və Rusiya hərbi liderlərinin bu günlərdəki Bakı görüşünə baxış, yeni hündürmərtəbəli binalarda kommunal haqların qaldırılması bugünkü medianın aparıcı mövzusudur.

Sistemli xarici siyasət kursu

“Azərbaycan” qəzeti “Milli maraqlara cavab verən çevik və sistemli xarici siyasət” (http://www.azerbaijan-news.az/index.php?mod=3&id=116287)

Müəllif müasir dövrün siyasi və iqtisadi risklərin, böhranların artması ilə xarakterizə edildiyini, bu situasiya ilə bağlı ölkələrin xarici siyasətlərində daim yenilənmələr baş verdiyini bildirir. 

Müəllif hesab edir ki, bu kataklizmlər mümkün təhlükə və riskləri nəzərə alan xarici siyasət strategiyası həyata keçirməyə ehtiyac yaradır: “Prezident İlham Əliyev məsələnin bu cəhətinə daim diqqət yetirir və bu mənada Azərbaycanın son illərdə beynəlxalq miqyasda əldə etdiyi böyük uğurlar həyata keçirilən düşünülmüş xarici siyasət kursunun nəticəsidir”.

Məqalədə daha sonra ölkə xarici siyasətinin siyasi və iqtisadi yönləri təqdim edilir və bu komponentlərdən irəli gələrək müəllif rəsmi Bakının sistemli xarici siyasət kursu həyata keçirdiyini bildirir: “Bunun tərkibində qlobal geosiyasi mühitin nəbzini tutan, beynəlxalq münasibətlər sistemində dövlətimiz üçün əlverişli şərait yaradan, ölkənin regionlarda yerləşən bütün dövlətlərlə əməkdaşlığını təmin edən istiqamətlər var”.  

Müəllifə görə keçən müddət ərzində xarici siyasət güclü dövlətin yaradılması işində üzərinə düşənləri layiqincə yerinə yetirib.

Yazı müəllifi deyir ki, xarici siyasət kursunda Qarabağ probleminin həlli prioritet vəzifədir və bundan irəli gələrək dövlət başçısı İlham Əliyev bu mənada xarici siyasətdə “hücum strategiyası” müəyyən edib.

Müəllif hesab edir ki, bu strategiya Azərbaycana qarşı erməni kampaniyalarının hədəflərini boşa çıxarıb, beynəlxalq qurumlar tərəfindən Azərbaycanın lehinə qəbul edilən çoxsaylı qərar və qətnamələr isə Azərbaycanın haqlı sayılmasının göstəricisidir.

Məqalədə 2016-cı ilin aprelində Qarabağ cəbhəsində baş verən döyüşlər xatırladılaraq deyilir ki, bu döyüşlər də mövcud “status-kvo”nun dəyişməsini Ermənistanın Azərbaycan torpaqlarını boşaltmalı olduğunu tələb edir.  

Müəllif  xarici siyasətin daha bir uğuru kimi müxtəlif ölkələrlə ikitərəfli münasibətlərin inkişafının əsas vəzifələrdən biri kimi müəyyən edilməsini göstərir.

“Prezident İlham Əliyevin rəhbərliyi ilə Azərbaycan dövlətinin xarici siyasətinin prioritetləri qətiyyətlə, inamla həyata keçirilir və praktikada uğurlu nəticələrlə özünü təsdiq edir”. 

“Uğur olmayan yerdə “uğur”

“Azadlıqinfo” saytındakı “Uğursuzluq bolluğunda “uğur” tapıntısı” sərlövhəli məqalədə (https://www.azadliq.info/177843.html) müəllif  rəsmi Bakının ABŞ və Rusiya hərbi liderlərinin bu günlərdəki Bakı görüşünə uğur kimi yanaşmasını dəyərləndirir.

Müəllif deyir ki, ölkə problemlərini tənqid edərək ön plana çıxaranda  ənənəvi “müxalifət hər şeyi qara rəngdə görür, uğurları görmür” ittihamı ilə qarşılandıqlarını bildirir: “İstəyiblər ki, manatın 150 faiz dəyər itirməsini, ərzaq məhsullarının 50 faiz bahalaşmasını, kommunal xərclərin sürətlə artmasını görməzdən gələk, əvəzində 10 manat maaş artımının sevinciylə yaşayaq, Lapşinin ölkəyə gətirilməsini bayram edək, 24 il öncə işğaldan azad edilmiş Cocuq-Mərcanlı kəndinə görə hökumətə tərif yağdıraq və.s”

Müəllif hesab edir ki, bu qədər “qara bolluğu” olan yerdə hökumət “ağın solğun parıltısı” dan danışılmasını istəyir. Müəllif isə deyir ki, 116 manat minimum əməkhaqqı alan vətəndaşın qara gününü kənara qoyub, Ledi Qaqaya 1 milyon dollar qonarar verilməsini “ağ rəng” kimi qəbul etmək olmaz.

Daha sonra müəllif  Azərbaycan hökumətinin bu günlərdə keçirilmiş ABŞ və Rusiya Baş Qərargah rəislərinin görüşünü Bakı öz xeyrinə “uğur faktı” kimi istifadə etməyə çalışır: “Bir neçə gündür telekanallar, rejim mətbuatı, sinəsi medallı ağsaqqallar iki generalın ölkəyə gəlməsini bayram kimi qeyd edirlər. Sən demə, ABŞ Silahlı Qüvvələrinin Baş Qərargah rəisi, general Jozef Dunfordla Rusiya Federasiyasının baş qərargah rəisi Valeri Gerasimovun Bakıda görüşməsi uzaqgörən siyasətin nəticəsiymiş”.

Hökumətin bu görüşə belə yanaşmasının da əsassız olmadığını deyən müəllifə görə, ölkədə uğursuzluq o qədər boy atıb ki, Bakıda iki ölkənin generalının görüşü, hansısa blogerin Azərbaycana ekstradisiyası,  hansısa tanınmayan jurnalın hökumət haqqında iki cümləlik tərifi mühüm təsəlliyə dönür.

Məqalə müəllifi bu generalların Azərbaycanla bağlı hansısa problemi həll etmək üçün gəlmədiklərinə görə uğur faktı sayılmadığına israr edir: “Biz bu görüşün Azərbaycanda keçirilməsini mənfi saymırıq, sadəcə, bundan böyük uğur dastanı düzəldib, cəmiyyətə yalançı ümidlər verməyin əleyhinəyik”. 

Müəllifə görə, fakt budur ki, Qarabağ münaqişəsinin həllinə əngəl törədən Rusiyadır və  bu ölkə Ermənistana dəstəyini hər gün açıq şəkildə ifadə edir və bundan sonra Rusiyadan Bakıya hər gün 8 general gəlsə də nəticənin dəyişməyəcəyi bildirilir.

Yazi müəllifi deyir ki, ağır vəziyyət hökm sürür, hökumət real islahatlar aparmaq iqtidarında deyil və ölkəni daha ağır böhran gözləyir: “Kimlərinsə gəliş-gedişiylə, kimlərinsə həbsiylə ölkəni xilas etmək mümkün deyil.  Bu mövsümi uğurlar yalnız hökumət üçün təsəlli ola  bilər”.

“Özbaşına” kommunal qiymətləri

“Exo” qəzetində “Bakının yeni hündürmərtəbəli binalarında kommunal xidmətlərin qiyməti artırılıb” (http://ru.echo.az/?p=56812) səlrövhəli məqalə oxumaq olar. Müəllif  yeni tikilmiş hündürmərtəbəli binalarda kommunal qiymətlərin artırılmasını ekspertlərlə müzakirə edir. 

Müəllif deyir ki, Bakıda hündürmərtəbəli binalar tikintisi aparan bir çox şirkətlər kommunal xidmətlərə görə qiymətləri artırıblar, bəzi şirkətlərin isə bu qiymətləri iki dəfə artırdığı bildirilir.    

“Əgər bina istismara verilibsə və icra hakimiyyətinin balansına keçibsə tikinti şirkəti kommunal xidmətə görə qiymətləri qaldıra bilməz. Amma binada cəmi bir neçə mənzil satılıbsa və bina tam istismara verilməyibsə tikinti şirkəti öz baxışından irəli gələrək qiyməti artıra və ya endirə bilər. Situasiyanı dəyərləndirə bilmək üçün binanın icra hakimiyyətinin balansına keçib-keçmədiyini aydınlaşdırmaq əsas məsələdir”. Bu şərhi qəzetə ekspert Rəşad Əliyev verib.

Onun sözlərinə görə, kommunal xidmətlərə görə qiymətləri bahalaşdıran  tikinti şirkətləri görünür, bu yolla elektrik enerjisi və qazla bağlı məsrəflərini kompensasiya etmək istəyirlər.

Ekspert deyir ki, bu, bina istismara verilmədiyi halda mümkündür, amma  bir qayda olaraq sakinlər mənzilə sahiblik hüququ əldə edirsə, bu o deməkdir ki, bina tam çəkildə istismara verilib və icra hakimiyyətinin  balansına keçib.

R.Əliyev bildirir ki, bu halda tikinti şirkətinin hər hansı qərar qəbul etmək hüququ yoxdur: “Yox, əgər bina hələlik də olsa tikinti şirkətinin balansındadırsa, sakinlər şirkətə müraciət edərək qiyməti qaldırmaması və güzəştə getməsi xahişi edə bilər”.

Azad İstehlakçılar Birliyinin (AİB) sədri Eyyub Hüseynov da tikinti şirkətlərinin vəziyyətdən istifadə edərək kommunal xidmətlərin qiymətlərini artırdıqlarını və bu addımlarını izah etmədiklərini bildirir: “Nəticədə vətəndaşlar əziyyət çəkirlər, belə yanaşma düzgün deyil və AİB belə qərarların əleyhinədir”.

Ə.Hüseynov 2016-ci ildə Nəsimi rayonundakı hündürmərtəbəli binalardan birinin sakinlərinin kommual xidmətlərə görə haqların  qaldırılması ilə müraciət etdiklərini xatırladır.

Məqalədə deyilir ki, bir sıra məhkəmə proseslərindən sonra qiymətlər aylıq 53 manatdan 33 manata endirildi: “Təəssüf ki, tikinti şirkətləri ancaq özlərinə əlverişli olan qiymətlər müəyyən edilər. Bundan əlavə, bəzi tikinti şirkətləri mənzil sahəsini olduğundan artıq göstərməklə vətəndaşlardan əlavə pul alırlar”.

Birlik sədri bununla bağlı sənədləri məhkəmə instansyasına hazırladıqlarını deyir.