Media-icmal 21.05.2016

Dövlət başçısının bu il aprelin əvvəlində Qarabağ bölgəsinə səfəri, Milli Məclisdə qəbul edilən amnistiya aktına münasibət, ölkədə orta biznesin inkişaf imkanları, mövcud iqtisadi durum bugünkü medianın aparıcı mövzusudur.

Qarabağın azad ediləcəyi inamı         

“Azərbaycan” qəzeti  dövlət başçısı İlham Əliyevin bu il aprelin 2-5-də Qarabağ cəbhəsində baş vermiş hərbi əməliyyatlardan sonra Ağdam rayonuna səfəri haqda məqalə dərc edib. Məqalədə dövlət başçısının bu səfəri vətəndaşına sahib çıxmaq nümunəsi kimi dəyərləndirilir. Bu əməliyyatlar zamanı evləri ziyan çəkən Ağdam sakinlərinin evlərində gedən təmir barədə sakinlər özləri danışırlar.

Sakinlər dövlət başçısının həmin səfərinə belə qiymət verirlər: “Dağıdılan evi, malı-mülkü bərpa etmək olar. Amma sınan ümidi, itirilən inamı bərpa etmək çox çətindir. Biz dövlətimizə inanır və güvənirik, dövlət başçısının o gərgin günlərdə Ağdama səfəri yaranmış gərgin vəziyyətlə tanış olması hamımızın könlünə rahatlıq gətirdi”.

Son olaraq müəllifə görə, bu səfər insanların Qarabağın azad ediləcəyinə inamı daha da artırıb: “Qarabağın işğaldan azad ediləcəyinə inamı da böyükdür. Rayonda dövlət başçısının sərəncamı ilə müharibədən zərər çəkmiş evlərin, sosial obyektlərin təmir və bərpası üçün 3 milyon manat vəsait ayrılıb. Bu istiqamətdə layihə-smeta sənədlərinin hazırlanması davam etdirilir. Yaxın günlərdə təmir bərpa işlərinə start veriləcək”.

Hüquq özü “amnistiya”ya düşməyincə

“Azadlıq” qəzeti Milli Məclisin dünən qəbul etdiyi amnistiya aktına öz baxışını sərgiləyir. “Hüquq  “amnistiya” ya düşüb azad olmayınca..” sərlövhəli məqalədə bu haqda söhbət gedir.

Müəllif siyasi və vicdan məhbuslarının amnistiyaya düşməməsini qınayır və buna belə qiymət verir: “Amnistiyayla bağlı elə maddələr seçilib ki, günahsız həbs olunanlar həmin maddəyə düşmür. Yəni, düşmənçilik, qisasçılıq, ədalətsizlik özünü bir daha göstərir”.

Bu amnistiyanın Qarabağ problemilə bağlı danışıqlarda manevr imkanlarını artıracağı haqda mövqe əsassız sayılır və belə dəyərləndirilir: “Beynəlxalq aləm Azərbaycan hakimiyyətindən siyasi məhbusların azadlığını tələb edir. Azərbaycan hakimiyyəti bu adamları həbsdə saxladıqlarına görə tənqid olunur, hakimiyyətin dilini gödək edən onun repessiya siyasətidir”.

Son olaraq isə məqalədə bütünlükdə amnistiya aktına aşağıdakı münasibət ifadə edilir: “Əgər amnistiyanın nəticəsi ədalətə xidmət etmirsə, əgər vicdanlı insanlar yenə də həbsdə qalacaqsa, əgər bundan sonra da hüquqsuzluq meydan sulayacaqsa, heç bir humanizmdən söhbət gedə bilməz. Yəni, bu ölkədə qanun, hüquq, ədalət “amnistiya”ya düşüb azadlığa çıxmayana qədər, heç bir təşəbbüs uğura apara bilməz”.

Daldan atılan daş..   

“Novoye Vremya” qəzeti ölkədə orta biznesin inkişafı məsələsini araşdırır. “Azərbaycanda orta biznesin gələcəyi varmı?” sərlövhəli məqalədə bu suala cavab axtarılır.

Müəllif hakimiyyəti neft gəlirlərinin yüksək olduğu zamanlarda iqtisadi sabitlik, inkişaf və rifah üçün heç nə etməməkdə təqsirli bilir. Neftin  kəskin dəyərdən düşməsindən, iki devalvasiyanın yaratdığı acınacaqlı iqtisadi durumun yaranmasından sonra atılan addımlar gecikmiş və mənasız sayılır. Məqalədə hakimiyyətin bu addımları belə dəyərləndirilir: “Son yenilikləri ölkə iqtisadiyyatının simasını dəyişəcək və ölkədə sahuibkarlığı canlandıracaq addımlar kimi təqdim edirlər. Amma heç də canlanmır. Səbəb də budur ki, neft bumu illərində ölkədə əsaslı kiçik və orta biznes üçün əsaslı mühit yaradılmadı. Fəaliyyət göstərənlərə də yüksək çinli məmurlar bütün güclərilə mane oldular”.

Bununla yanaşı məqalədə bu sahədə hakimiyyətin bundan sonra ata biləcəyi addımlarına etimadla yanaşılmır və bu etimadsızlıq belə əsaslandırılır: “Olduqca paradoksal vəziyyət alınır: neft bumu illərində hakimiyyət nəyin haqqında desən düşünürdü, təkcə ölkədə sağlam əsaslı iqtisadiyyat yaradılmasından başqa. İqtisadiyyat yüksək vəzifəli inhisarçıların qazanc yerinə dönmüşdü. Ölkədə ən yüksək səviyyədə inhisar olması haqda deyilsə də qulaqardına vurulur. Ölkə iqtisadiyyatının yalnız bir ovuc adamın maraqlarına xidmət etmək kimi əsas dəyişilməz prinsipi hələ də qüvvədə qalır. Belə olan halda Azərbaycan iqtisadi böhranı dəf edə bilərmi?”.

Bank sistemi çöküb

“Bizim Yol” qəzeti deputat Vahid Əhmədovun parlamentin İqtisadi siyasət komitəsinin iclasındakı çıxışında ölkədəki iqtisadi duruma dair dəyərləndirməsinə yer verib. V.Əhmədov dünyada yaşanan qlobal maliyyə və iqtisadi böhranın Azərbaycan iqtisadiyyatına hələ də təsir etdiyini bildirir. “Sosial evlərin tikilməsi, sosial ipoteka kreditləri məsələlərində keçən il problemlər yaşandı”.

Daha sonra V.Əhmədov ölkədə aparılan pul siyasətinin narahatlıq doğurduğunu nəzərə çatdırıb. “Bank sistemi demək olar ki, çöküb. Nə fiziki, nə hüquqi şəxslər kredit ala bilirlər, faizlər yenə də yüksək həddədir. İnsanlar kreditlərini ödəməkdə çətinlik çəkirlər, onlarda bir ümidsizlik var”.

V.Əhmədov bu situasiya ilə bağlı 14 səhifəlik təkliflər paketi hazırladıqlarını və onu 3 quruma göndərdiklərini və hazırda cavab gözldiklərini bildirib.