Media-icmal 22.04.20

Koronavirus pandemiyasına və onun təsirlərinə qarşı dövlət səviyyəsində görülən tədbirlər, bu təsirlərin ayrı-ayrı iqtisadi sahələrə təsiri və s. məsələlər medianın aparıcı mövzuları sırasındadır.

“Azərbaycan” qəzeti “Azərbaycan yoluxma zəncirini qırır” sərlövhəli məqalədə ölkədə koronavirus infeksiyasının yayılmasına qarşı mübarizəni dəyərləndirir.

Müəllif deyir ki, koronavirus pandemiyası dünya ölkələrinin iqtisadiyyatına ciddi zərbələr vurub,  əksər dövlətlər ciddi iqtisadi böhran yaşayacaq. Müəllif əlavə edir ki, bəzi ölkələr qabaqlayıcı tədbirlərlə bu prosesdən az itkilərlə çıxmaq istəyirlər və postpandemiya dövründə bu ölkələrin iqtisadiyyatı uğurlu inkişafını təmin edə biləcək.

Yazı müəllifi deyir ki, ölkə rəhbərliyi milli iqtisadiyyatın bir çox strateji sahələrinin fasiləsiz fəaliyyətini təmin edən səmərəli tədbirlər həyata keçirib.

Bu kontekstdə hökumət işçi qüvvəsini qorumaq və sahibkarları daha da həvəsləndirmək üçün mükəmməl qərarlar qəbul edib: “Bu qərarlar Azərbaycan xalqına böyük fayda və milli iqtisadiyyatın inkişafına öz töhfəsini verəcək. 600 min vətəndaşa göstərilən dövlət sosial yardımı 2020-ci ilin ikinci yarısında ölkə iqtisadiyyatının dayanıqlı inkişafını təmin edəcək”.

Müəllifin fikrincə, həyata keçirilən tədbirlər ilk növbədə virusun yoluxma zəncirini qırmağı hədəfləyib, yoluxma, ölüm və sağalma faktları təsdiqləyir ki, görülən işlərin müsbət təzahürləri var.

“Modern.az” da yer alan “Deputat: Kütləvi İnformasiya Vasitələrinin İnkişafına Dövlət Dəstəyi Fondu (KİVDF) yoxlanmalıdır, məsələni mütləq Milli Məclisdə qaldıracağıq” sərlövhəli məqalədə deputat Vahid Əhmədov adı çəkilən qurumun fəaliyyətinin Milli Məclisdə müzakirə ediləcəyini söyləyib.

Onun deməsinə görə, KİVDF-nin köhnə rəhbərliyi zamanı qurumda haqsızlıqlar olduğu barədə fikrilərini bildirib: “Dövlətdən ayrılan vəsaitin paylanmasında, jurnalistlərin ev bölgüsündə, lap elə yazı müsabiqələrində haqsızlıqlara yol verilirdi. Orada yoxlamaların aparılmasına çox ciddi ehtiyac var. Keçən müddətdə ev alanlarla bağlı narazılıqlar yaranmışdı. Ev alanlar arasında heç jurnalist olmayanlar da var. Bu barədə mətbuata mütəmadi olaraq demişik”.

Deputat hesab edir ki, bu qurumlar mətbuatı Azərbaycan xalqının milli xüsusiyyətlərinə xas olmayan söyüş alətinə çevirmişdilər və bütün bunlar faktiki olaraq onların “xidmətləri” idi: “Ona görə də KİVDF mütləq yoxlanılmalıdır, Hesablama Palatası orada yoxlamalara başlamalıdır. Keçən müddətdə Fonda nə qədər vəsait ayrılıb, hara, necə xərclənib, bunun hesabatı aparılmalıdır. Bu yaxınlarda Milli Məclisdə Hesablama Palatasının hesabatını dinləyəndə bu məsələyə mütləq toxunacağıq”.

“Bizimyolinfo.az”da dərc edilən “Koronavirus dövründə daşınmaz əmlak bazarında vəziyyət” sərlövhəli məqalədə ölkənin daşınmaz əmlak bazarındakı vəziyyəti barədə ekspert Nüsrət İbrahimovla söhbətləşir. 

N.İbrahimov hesab edir ki, koronavirus pandemiyası ilə mübarizə tədbirləri çərçivəsində əhalinin işgüzar fəallığının məhdudlaşdırılması daşınmaz əmlak bazarına da təsir göstərib.

Ekspertin deməsinə görə, daşınmaz əmlak bazarında alqı-satqı əməliyyatları sıfıra yaxınlaşıb: “Mənzil bazarında alqı-satqı tam dayanıb. Bu o deməkdir ki, daşınmaz əmlak bazarında qiymət dəyişikliyi müşahidə edilmir. Bu gün isə onu dəyə bilərik ki, koronavirus bazarda aktivliyə mənfi təsir göstərib”.

Ekspert tikinti materialları bazarında aparılan monitorinqlərə əsasən deyir ki, yaşayış  və qeyri-yaşayış sahələri üzrə aparılan tikintilərdə aktivliyin olmaması tikinti bazarında durğunluğa səbəb olub.

N.İbrahimova görə, postpandemiya dövründə daşınmaz əmlak bazarında vəziyyət neftin dünya bazarında qiymətindən asılı olacaq: “Əgər neftin qiymətləri birjalarda bahalaşsa, daşınmaz əmlak bazarında qiymətlər stabil olaraq qalacaq. Yox, əgər neftin qiymətləri ucuzlaşmağa davam edəcəksə, daşınmaz əmlak bazarında da qiymətlər ucuzlaşacaq”.

“Sfera.az”da isə “Azərbaycan aşağı neft qiymətlərinə hansı müddətə tab gətirə bilər?” sərlövhəli məqalədə dünya neft bazarındakı vəiyyətin Azərbaycana təsiri dəyərləndirilir.  

Müəllif deyir ki, neftin qiymətinin ucuzlaşması Azərbaycanda koronavirusun fəsadları kimi insanlarda narahatçılıq yaradan amildir.

Müəllifə görə səbəb də budur ki, neftin ucuzlaşması manatın ucuzlaşmasına, qiymətlərin artması, iş yerlərinin bir hissəsinin bağlanması və s. kimi hallar doğurar: “Həqiqətən də neftin qiymətinin kəskin enməsi ölkəmizin iqtisadiyyatı üçün böyük risk yaradır və bundan hamının zərər görməsi ehtimalı var”deyə müəllif bildirir.

Müəllifə görə önəmli olan neftin qiymətinin nə qədər enməsi yox, neftin aşağı qiymətlərdə nə qədər qalmasıdır, çünki aşağı qiymətlər bir il və daha çox davam edərsə, o halda çox böyük maliyyə itkiləri ilə üzləşmək mümkündr.

Müəllifə görə, apreldən əldə ediləcək gəlir neftin mart ayındakı qiyməti əsasında olacağı üçün gəlirlərdə ciddi azalma baş verəcək, may ayında isə  gəlirlərdə daha çox enmə olacaq. 

Müəllif OPEC-ə istinadən neft bazarında qiymətlərin iyul ayından tədricən yüksəlişə keçəcyini söyləyir.

Müəllifə görə, həmin müddətə qədər neftin orta qiyməti 35-38 dollar aralığında qalır ki, dolların məzənnəsi 1,7 olmaq şərtilə tədiyə balansında tarazlıq yaratmaq çətin görünür.