Media-icmal 22.08.2016

Azərbaycanda dayanıqlı iqtisadi  inkişaf, “son vaxtlar “Gülənçi” adı ilə aparılan həbslərə münasibət, Girdman çayında ekoloji durum bugünkü medianın aparıcı mövzusudur.

Dünya bir yana, biz bir yana...

“Azərbaycan” qəzeti “Azərbaycanda dayanıqlı inkişaf təmin edilib” sərlövhəli (http://www.azerbaijan-news.az/index.php?mod=3&id=103502) məqalədə ölkədə iqtisadiyyatın sabit inkişaf etməsındən danışır. Müəllif fikrini belə arqumentləşdirir: “Prezident İlham Əliyevin iqtisadi islahat konsepsiyasında yer alan ən mühüm amil ölkə iqtisadiyyatının davamlı inkişafının təmin edilməsi, regionların tərəqqisinin sürətləndirilməsidir. Yeni iqtisadi islahatlar dövlət başçısının rəhbərliyi ilə həyata keçirilən inkişaf strategiyasının tələblərindən irəli gəlir”. Müəllif bu düşüncədədir ki, Azərbaycan istisna olmaqla, region dövlətlərində də, dünyada xüsusi çəkisi olan dövlətlərdə də iqtisadi artım tempi enir, amma Azərbaycanda dayanıqlı inkişaf təmin edilir. Müəllifə görə, ölkə iqtisadiyyatının inkişafı üçün praqmatik islahatlar modeli formalaşdırılıb ki, bu da bütövlükdə milli inkişafa təkan verən əhəmiyyətli amildir.

Müəllifə görə,  2015-ci ilin sonu və 2016-cı ilin əvvəllərində sahibkarlığın inkişafı ilə bağlı qəbul edilən fərman və sərəncamlar bu modelin tərkib hissəsidir. Ona görə də bunu ölkədə sahibkarlığın inkişafında yeni dövrün başlanğıcı adlandırır. Müəllifin fikrincə, sahibkarlıq subyektlərində yoxlamaların 2 il müddətinə dayandırılması, lisenziya tələb edilən sahələrin 59-dan 37-yə endirilməsi,  rüsumların Bakıda 2, regionlarda 4 dəfə azaldılması da bu modelin tətbiqinə xidmət edir. İqtisadi İslahatların Təhlili və Kommunikasiya Mərkəzində (İİTKM) yeni ideya və layihələrin müasir dünyanın tələbləri baxımından təhlil ediləcəyi, iqtisadi inkişaf modelləri müxtəlif elmlərin baxış bucağından  daha uğurlu məcraya yönəldiləcəyi vurğulanır.

Müəllif yeni iqtisadi modelin tətbiqi üçün vergi və gömrük sistemində aparılan islahatları göstərir və bu sahədə sistemin daha da şəffaf  olacağı vurğulanır.  Müəllifin düşüncəsinə görə, gömrük sistemində xaricdən gətirilən malların qeydiyyatının sadələşdirilməsi, tranzit yüklərin bəzi ödənişlərdən azad olunması, rəsmiləşmə ilə bağlı sənədlərin sayının azaldılması biznes mühitini daha da sağlamlaşdırıb. Müəllifin fikrincə, bütün bu tədbirlər gələcəyə aşağıdakı perspektivi vəd edir: “Sadalanan faktlar bir daha təsdiqləyir ki, Azərbaycan prezidentinin müəyyənləşdirdiyi iqtisadi islahatlar ölkənin yeni inkişaf hədəflərinə hesablanıb və bu, ölkəmizin tərəqqisini daha da sürətləndirəcək”.

Bizim öz adımız var

“Azadlıq” qəzeti isə “Biz necə “Gülənçi” olduq?” məqaləsində son günlərin “Gülənçi” adı ilə baş verən həbslərin səbəblərini müzakirə edir. (http://www.azadliq.info/153184.html)

Müəllif bu son həbslərin səbəblərinə toxunaraq deyir ki, Azərbaycanda vicdanlı olmaq, xalqın mənafeyini düşünmək, dövlətin maraqlarından çıxış etmək cinayət tərkibi yaradır: “Əgər sadaladığımız bu keyfiyyətlərə sahibsənsə, hökumət sənin üçün yeni  “şəxsiyyət vəsiqə”ləri yaratmağa çalışacaq”.

Bu açıqlamadan sonra müəllif  deyir ki, demokratik düşərgənin dünənə qədər həbs edilən üzvləri “polisə müqavimət”də, “ermənipərəstlik”də, “radikal şiəçilik”də günahlandırılırdısa bu gün “Gülənçilik”də ittiham edilirlər. Müəllif əsas hədəfdə yenə də Xalq Cəbhəsi Partiyası (AXCP) üzvlərinin olduğunu bildirir  və  hakimiyyətin AXCP sədrinin müavini Fuad Qəhrəmanlını neçə ay öncə “Nardaran hadisələri” ilə əlaqələndirərək həbsə aldığını xatırladır. Bunun ardınca müəllif xatırladır ki, hakimiyət “Azadlıq” qəzetinin yayım direktoru, həm də AXCP sədri Əli Kərimlinin köməkçisi Faiq Əmirovu avqust ayınn 20-də “Gülənçi” kimi həbs edib.  Müəllifə görə, bu həbslər əsassızdır: “Aydın görünür ki, hökumət “özünütəkzib” ilə məşğuldur, Əli Kərimlinin ən yaxın adamlarından birini şiəlikdə, digərini “Gülənçilik”də ittiham edirlər”. Müəllif bunu da xatırladır ki, AXCP və sədri  Ə.Kərimli Türkiyədə çevriliş cəhdini ilk andan pisləyib və istənilən halda bu ittihamlar əsassızdır. Bununla yanaşı müəllif  hökumətin əsl “Gülənçi”ləri ittiham etmək istəmədiyini də nəzərə çatdırır.

Müəllifin düşüncəsinə görə, bu ittiham və həbslərdə siyasi mahiyyət də var, belə ki, hakimiyyət qarşıdakı  referendum öncəsi və ağır iqtisadi böhran durumunda narazı kütləni ardınca apara biləcək qüvvəni  “Gülənçi” ittihamı ilə sıradan çıxarmaq istəyir. Müəllifə görə, narkotikada, polisə müqavimətdə günahlandırılmaq “Gülənçi” ittihamının yanında “toya getməlidir”. Müəllif AXCP fəalı Fuad Əhmədlinin “Gülənçilik”də ittiham olunmasını belə dəyərləndirir ki, Fuad Əhmədlini “Gülənçilik”də ittiham etməklə yadplanetlilərlə işbiriliyində ittiham etmək arasında fərq yoxdur, çünki bu adamın yadplanetlilərlə əlaqəsi nədirsə, Gülənlə də əlaqəsi odur.

Son olaraq müəllif hakimiyyətin AXCP-yə sərgilədiyi bu davranışı belə izah edir: “Bəli, çirkaba bulaşmadığımız üçün, haqsızlıqla barışmadığımıza görə “Gülənçi” olduq. Gülən mövzusu dəbdən düşəndən sonra bizə yeni “adlar” yapışdırmağa davam edəcəklər. Biz isə hamını öz adı ilə çağırmağa davam edəcəyik”. 

Yaşıl rənglu su: səbəbi

“Yeni Müsavat” qəzeti (http://musavat.com/news/olke/bu-rayonlarin-ichmeli-suyunun-rengi-deyishib-tehluke_372125.html)   İsmayıllı və Ağsu rayon sakinlərinin içmək və suvarma üçün istifadə etdiyi Girdman çayının sularında təhlükəli durumun yarandığını  bildirir.

Məqalədə deyilir ki, 10 gündən çoxdur ki, çayın suları naməlum səbəb üzündən yaşıl rəngə boyanıb. Müəlliflərə görə, suyun dadının və rənginin dəyişməsinə, sudan qeyri-adi qoxu gəlməsinə səbəb çaya çirkli maddələrin axıdılmasıdır. Məqalədə qeyd edilir ki, hətta çayın daşları da yaşıl rəngə boyanıb.

Müəllif bildirir ki, bu təhlükəli çayın suyundan istifadə edən İsmayıllının Gəraybəyli, Xəlilli, Eyyubbəyli və Ağsunun Külüllü, Pirhəsənli, Padar, Nəmirli, Gursulu, Kəlağaylı, Sarvan, Qasımlı, Bəyimli, Mustafalı kəndlərinin və Ağsu şəhərinin sakinlərinin narahatlığına səbəb olub.

Səbəblər hələ ki bəlli deyil, amma 10 gün öncə Girdman çayı boyunca köpüklü su gəlib və sonra isə yaşıl rəngdə çirkli su axmağa başlayıb. Bu axın hələ də davam edir.

Məqalədə çayda bş verən ekoloji dəyişiklik barədə ehtimal olaraq deyilir: “Rayon ərazisində zavod və fabrik olmadığı üçün ehtimal olunur ki, İsmayıllı rayonunun şimalındakı meşəlik ərazilərdə, Girdiman çayının kənarında fəaliyyət göstərən istirahət mərkəzləri tərəfindən qanunsuz olaraq çaya çamaşırxana və kanalizasiya tullantıları axıdılır”.

Müəllifə görə, zəhərli toksik maddələrin axıdıldığı Girdman çayının suları artıq insanların sağlamlığına ciddi ziyan vurur. Məqalədə buna nümunə olaraq son günlər Gəraybəyli kəndində 15-ə yaxın insanın  mədə-bağırsaqlarında yaranan problem, işləmə-qusma halları ilə həkimlərə müraciət etdiyi vurğulanır.

Kənd sakinləri bildirirlər ki, zəhərli toksik maddələrlə çirkləndirilən Girdman çayının suyundan artıq içməli su kimi istifadə etmək, hətta çimmək və paltar yumaq mümkün deyil. Onlar içmək üçün hazırda avtomobillərlə baha qiymətə su almaq məcburiyyətində qaldıqlarını deyirlər. Kənd sakinləri məsələnin tezliklə araşdırılmasını və insanları təmiz sudan məhrum edən şəxslərin tapılmasını aidiyyatı qurumlardan xahiş edirlər.