Media-icmal 24.09.20

Pandemiyaya qarşı mübarizə, koronavirus əleyhinə vaksin hazırlığı, toy mərasimlərinin bərpa edilməsi mümkünlüyü və s. məsələlər medianın aparıcı mövzuları sırasındadır...

"Azərbaycan" qəzeti "Vətəndaşların sağlamlığı dövlətin əsas prioritetidir" sərlövhəli məqalədə COVİD-19 pandemiyasına qarşı Azərbaycanda aparılan mübarizəni dəyərləndirir.

Müəllif deyir ki, Azərbaycanda yeni növ koronavirusa qarşı mübarizə davam edir, görülən tədbirlər infeksiyanın nəzarət altında saxlanmasına, əhalinin təhlükəsizliyinin, sağlamlığının və rifahının təmin edilməsinə yönəlib.

Müəllif əlavə edir ki, bununla bağlı ölkədə virusdan qoruyucu vasitələrin istehsalı başladı, yeni və modul tipli xəstəxanalar tikildi, 36 mindən çox vətəndaşın xəstəlikdən sağalması bu tədbirlərin nəticəsidir.

Yazı müəllifi vurğulayır ki, ölkəyə yeni təcili tibbi yardım maşınlarının gətirilməsi, modul tipli daha 7 xəstəxananın tikilməsinin nəzərdə tutulması bu tədbirləin hələ də davam etdirilməsi deməkdir. 

Müəllif deyir ki, hazırda ölkədə COVID-19 xəstələri üçün 46 xəstəxana fəaliyyət göstərir və həmin xəstəxanaların 41-i son 17 il ərzində inşa edilib.

"Göründüyü kimi, ölkəmiz COVID-19-un yayılmasının qarşısının alınması istiqamətində uğurlu fəaliyyət göstərir. Hökumət tərəfindən həyata keçirilən bütün tədbirlər vətəndaşların təhlükəsizliyinin təmin edilməsi, Azərbaycanın hər bir sakininin sağlamlığının qorunması məqsədini daşıyır", deyə müəllif bildirir.

"Modern.az" "Koronavirusla bağlı vaksinasiya könüllü olacaq" sərlövhəli məqalədə TƏBİB-in İdarə Heyətinin sədri Ramin Bayramlının mövzu ilə bağlı fikirlərinə yer verib.

Onun sözlərinə görə, Azərbaycanda ilkin mərhələdə əhalinin 20 faizi koronavirusa görə vaksinasiya olunacaq".

R.Bayramlı vaksinasiya ilə bağlı risk qruplarının müəyyən edildiyini də diqqətə çatdırıb: "Risk qrupuna səhiyyə işçiləri, əhali ilə sıx təmasda olan hüquq-mühafizə orqanları, eyni zamanda əhalinin yanaşı xəstəliyi olan hissəsi, o cümlədən dializ xəstələri, şəkərli diabet xəstələri, ürək, qan-damar xəstəlikləri, böyrək çatışmazlığı olan və digər xəstəliyi olan şəxslər daxildir".

TƏBİB rəsmisi əlavə edib ki, vaksinasiya prosesi könüllü olacaq: "Yanaşı xəstəlikləri olanlar və 65 yaşdan yuxarı olanlar risk qruplarıdır".

Onun sözlərinə görə, aşağı yaşlarda, o cümlədən reproduktiv yaşda olanlara vaksin vurulması nəzərdə tutulmur, amma bu sahədə hazırlanan strategiyanın detalları və istehsalçının tövsiyələri barədə əhali məlumatlandırılacaq".

R.Bayramlı deyib ki, Azərbaycanda əhalinin 10 faizi üçün çoxtərəfli formatda vaksinlər əldə edilməsi razılaşdırılıb.

Onun sözlərinə görə, "Gavi" tərəfindən 1 doza vaksinin orta qiyməti 1,60 ABŞ dolları proqnozlaşdırılır. Hər şey daxil olmaqla, 1 doza üçün cəmi məbləğ 10,55 ABŞ dolları hesablanır. Azərbaycanın 10 milyon 112 min əhalisinin 10 faiz hissəsinə görə 2 dozalıq vaksinin sifarişi üçün yekun ödəniş məbləği 21 milyon 336 min 320 ABŞ dollarıdır:

"Öhdəlikli satınalma variantında ilkin ödəniş daha azdır. 2 milyon 22 min 400 doza vaksinin hər dozası 1,60 dollar olmaqla, 3 milyon 235 min 840 dollar təşkil edir. Hər şey daxil isə 2 milyon 22 min 400 doza vaksinin hər dozası 8,95 dollar olmaqla, 18 milyon 325 min 480 dollar təşkil edir. Müqavilənin şərtlərinə görə, hökumət və Mərkəzi Bank tərəfindən maliyyə təminatı verilir".

"Müsavat.com" saytı isə "Azərbaycanda toyların bərpası dəqiqləşdi" sərlövhəli məqalədə toy mərasimlərinin keçirlməsindən bəhs edir.  

Müəllif oktyabr ayından Azərbaycanda toy mərasimlərinin bərpa edilə biləcəyini diqqətə çatdırır: "Son bir neçə gün ərzində ərazi icra hakimiyyətlərindən şadlıq evlərinə ünvanlanan sorğular belə deməyə əsas verir. Şadlıq evləri də artıq müəyyən hazırlıqlara başlayıblar. Paytaxt ərazisində yerləşən obyektlərin administratorlarının sözlərinə görə, son 1-2 gündə sifariş yazdıranların sayında müəyyən artım hiss edilir. Əsasən toyları karantinə görə dəfələrlə təxirə düşən müştərilər müraciət edirlər".

Müəllif deyir ki, hələlik toyların bərpası ilə bağlı rəsmi məlumat yoxdur, amma bəzi restoranlarda oktyabr ayına boş yer tapmaq belə mümkün deyil.

Toy mərasimlərinin oktyabrın 18-dən sonra bərpası istisna olunmur. Saray rəsmiləri hələlik dəqiq məlumat olmadığı üçün yeni qiymət siyasətləri ilə bağlı da məlumat verə bilməyəcəklərini deyirlər.

Şadlıq sarayalrının məsulları bildirirlər ki, bununla bağlı icra hakimiyyətlərindən zəng edib şadlıq saraylarının fəaliyyətə başlayacağını bildirirlər: "Amma şərtlər belədir ki, məsələn, 400 nəfərlik zalda 200 nəfər olmalıdır. Gözləyirik ki, əmr verilsin, biz də işimizi bilək".

Şadlıq saraylarından fəaliyyətə başladıqları halda qiymət artımının gözlənilən olduğunu deyiblər.