Media-icmal 24.12.18

Azərbaycanın sosial-iqtisadi və milli-mənəvi uğurları, BMT qətnaməsi ılə əlaqədar Azərbaycanın mövqeyinə baxış, paytaxtda kirayə mənzil qıtlığı və s. məsələlər bugünkü (24 dekabr, 2018-ci il) medianın aparıcı mövzularındandır.

Modern dövlət modeli

"Azərbaycan" qəzeti "İlham Əliyevin modern dövlət modeli" sərlövhəli məqalədə 2018-ci ildə iqtisadi-sosial və milli-mənəvi dəyərlər sahəsində dövlət siyasətini dəyərləndirir.

Müəllif deyir ki, Azərbaycan tarixinin ən qüdrətli dövrünü yaşayır və buradakı dövlət quruculuğu təcrübəsi dünyada mükəmməl örnəklərdən biri sayılır.

Fikrini qüvvətləndirmək üçünyazımüəllifi Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasda dövlət başçısı İlham Əliyevdən sitat gətirir:"2018-ci il ölkəmiz üçün uğurlu il olmuşdur. İlin əvvəlindən qarşımıza qoyduğumuz bütün vəzifələr uğurla və vaxtında icra edilir. Azərbaycan 2018-ci ildə də öz dinamik inkişafını təmin etmişdir və ölkəmiz əmin-amanlıq, sabitlik, təhlükəsizlik şəraitində yaşamışdır".

İlin uğurlarınq gəlinə, müəllif Xəzər dənizinin hüquqi statusuna dair Konvensiyanın imzalanmasını, yeni əməkdaşlıq sazişi imzalanması üçün Avropa İttifaqı-Azərbaycan danışıqlarını, "Cənub" qaz dəhlizi və TANAP qaz kəmərlərinin rəsmi açılışını, Ələt Beynəlxalq Dəniz Ticarət Limanının istifadəyə verilməsini, Türkiyədə Azərbaycana bağlı bəzi obyektlərin işə salınmasını iqtisadi uğurlar kimi dyərləndirir: "Bütün bu göstəricilər ölkəmizin beynəlxalq maliyyə institutları və aparıcı təşkilatlar tərəfindən dünya ölkələri arasında ən etibarlı və sağlam tərəfdaş kimi tanınmasına şərait yaradıb ki, bu uğurlu inkişafın təməlində prezident İlham Əliyevin düşünülmüş, uzaqgörən siyasəti dayanır".

Ssosial siyasətə dair isə müəllif deyir ki, əhalinin sosial rifah halı yaxşılaşıb, işsizliyin və yoxsulluğun aradan qaldırılması yönündə mühüm addımlar atılır və bunlar sosialyönümlü dövlət quruculuğu göstəricisidir:

Əsas hissəsi milli- mənəvi siyasətə həsr edilən məqalədə deyir ki, 2018-ci il qonşu və islam ölkələrilə əlaqələrin yeni inkişaf mərhələsinə qədəm qoyması ilə də yadda qalıb.

Müəllifə görə, sivilizasiyalararası, dinlərarası dialoqun dərinləşdirilməsi, bütün dinlərin nümayəndələrinə bərabər şəraitin yaradılması bu sahədəki siyasətin ana xəttidir: "Ölkədə güclü tolerantlıq ənənələrinin getdikcə daha da möhkəmləndirilməsi Azərbaycanı dünyada multikulturalizmin əsas mərkəzinə çevirib".

Müəllifə görə, dini sahədə problemlərin ortaya çıxmasının əsas səbəbi dini savadsızlıq, islamın olduğu kimi təbliğ olunmamasıdır, odur ki, ölkədə dini maarifləndirmə və milli-mənəvi dəyərlərin təbliğinə xüsusi önəm verilir.

Müəllif bu istiqaməti Dini Qurumlarla İş üzrə Dövlət Komitəsinin əsas fəaliyyət sahələrindən biri adlandırır, bu yöndə qəzet və urnal nəşr edildiyini bildirir.

Yazi müəllifi bununla birgə gənclərin zərərli dini cərəyanların təsiri altına düşməsinin qarşısının alınması üçün din 550-dən artıq tədbirin həyata keçirildiyini vurğulayır.

Müəllif bu ildən fəaliyyətə başlayan Azərbaycan İlahiyyat İnstitutunun (Aİİ) yaradılması zərurətini xalqın dini sahədə yüksək ixtisaslı kadrlara olan tələbatını təmin etməklə, ilahiyyat sahəsindəki problemlərə dair tədqiqatlar aparmaqla, tərəfsiz və bütün konfessiyalara dözümlülüklə yanaşan din xadimləri yetişdirməklə əsaslandırır.

Müəllifə görə, sadalanan bütün faktlar deməyə əsas verir ki, ölkədə dövlət-din münasibətləri də sağlam təməllər üzərində qurulub, İlham Əliyevin rəhbərliyi ilə dünyada nümunə göstəriləcək bir inkişaf modeli formalaşıb və bu modern Azərbaycan dövləti modelidir.

Kimin yanında olmaq düsturu

"Strateq.az" saytında isə Azərbaycan BMT-də Ukraynaya dəstək vermədi -Türkiyə və Ermənistanın mövqeyi necə olub?" sərlövhəli məqalə oxumaq olar.

Müəllif vurğulayır ki, BMT Baş Assambleyası işğal olunmuş Ukrayna əraziləri Krım və Sevastopolda insan haqlarının pozulması ilə bağlı qətnamə qəbul edib. Lehinə 67 ölkə, əleyhinə 27 ölkə səs verib.

Yazı müəllifinin vurğulamasına görə, Türkiyə qətnamənin lehinə, Ermənistan isə əleyhinə olub.

"Azərbaycan son həftədə ikinci dəfə Ukrayna ilə bağlı səsvermədə iştirak etməyib. Mən yaxşı başa düşürəm ki, Rusiya ilə bağlı ehtiyatlı siyasət aparmalıyıq, onu özümüzə qarşı aqressivləşdirməyə ehtiyac yoxdur. Amma Rusiyadan çəkinməyin də bir həddi olmalıdır". Bunu isə "strateq.az-a açıqlamasında politoloq Şahin Cəfərli bildirib.

Azərbaycanın Rusiyadan çəkinməsinin "həddi" barədə danışan Ş.Cəfərli bu mənada Rusiyaya münasibətdə Gürcüstanın yürütdüyü siyasəti göstərib: "Məsələn, Gürcüstan davamlı və açıq şəkildə antirusiya siyasəti yeridir, postsovet məkanında Amerikanın dayaq məntəqəsinə çevrilib, lakin bu, Rusiya ilə iqtisadi əlaqələrin inkişafına təsir etmir".

Politoloq Şahin Cəfərli vurğulayıb ki, Azərbaycan da, Ukrayna ərazi mənasında eyni problemlərdən əziyyət çəkən ölkələrdir.

Ş.Cəfərli hesab edir ki, elə eyni problemlərdən əziyyət çəkdiklərinə görə Azərbaycan Ukraynanın yanında olmalıdır və bu Qarabağ probleminin həllində Azərbaycana çoxsaylı tərəfdaşlar qazandırar: "Əgər eyni problemdən əziyyət çəkən dost və GUAM üzrə yaxın tərəfdaş olan dövlətin yanında olmuruqsa, onu dəstəkləyən müasir dünyadan özümüzü ayrı tuturuqsa, onda apardığımız diplomatiya nüfuz qazana və beynəlxalq dəstək toplaya bilməz:

Politloloq Qarabağ probleminə münasibətə görə, Azərbaycanın dünyanı ədalətsizlikdə ittiham etməsini haqlı saysa da Ukrayna probleminə tutduğu münasibəti doğru saymır: "Dünyanı haqlı olaraq ədalətsizlikdə ittiham edirik, halbuki, özümüz də ədalətli deyilik və xarici siyasətdə ikili standart bizdə də var",deyə bu münasibətə mövqe ifadə edir.

Bakının "kirayə mənzil qıtlığı" ajiotajı

"Yeni Müsavat" qəzetində isə "Bakıda kirayə ev böhranı yaşanır: Mənzil bazarından reportaj" sərlövhəli məqalə diqqəti cəlb edir .

Müəllif deyir ki, Nazirlər Kabinetinin qərarına əsasən paytaxt Bakıda pilot layihə çərçivəsində köhnə və qəzalı vəziyyətdə olan yaşayış binalarının sökülməsi yeni bir kütlənin kirayə mənzil bazarına axınına səbəb olub: "Nəticədə son aylarda Bakıda kirayə mənzillərin qiymətinin hiss olunacaq dərəcədə bahalaşıb, mənzil tapmaq isə problemə dönüb.

Yazı müəllifi vurğulyır ki, pilot layihə qaydalarına əsasən sökülən binaların sakinləri yeni bina hazır olana qədər tikintini aparan şirkətin hesabına kirayə mənzillərə köçürülür, yeni binada mənzillər tam təmir olunduqdan sonra həmin sakinlərə təhvil verilir. "Bu proses əsasən şəhərin mərkəzində, metro stansiyalarının yaxınlığında, magistral yollara və infrastruktura yaxın ərazilərdə yerləşən mənzillərin bahalaşmasına səbəb olub"-deyə müəllif pytaxtda "kirayə mənzil problemi" yaşanmasının səbəbinə aydınlıq gətirir .

Müəllif deyir ki, kirayə mənzil bazarında son durumu öyrənmək üçün Nizami rayonu ərazisindəki "maklerlər bağı"na və alqı-satqı ofislərinə baş çəkib.

Yazı müəllifinin deməsinə görə, maklerlər də etiraf edirlər ki, son zamanlar kirayə mənzil axtaranların sayı artıb, amma vətəndaşlar istədiyi şərtlə ev tapmaqda çətinlik çəkirlər: "Metroətrafı ərazilərdə isə boş kirayə ev demək olar ki, yoxdur.

Son üç ayda hər gün toplaşdığımız "maklerlər bağı" müştərilərlə doludur.

Onların əksəriyyəti metro ətraflarında, mərkəzə yaxın ərazilərdə ev tutmaq istəyir. Ancaq tələbat çox olsa da, kirayə evlər azdır".

Məqalə müəllifi deyir ki, maklerlər də bu "kirayə mənzil qıtlığı ajiotajının yaşanmasını rayon ərazisində pilot layihə çərçivəsində aparılan söküntü işləri ilə əlaqələndirir:"Kirayə mənzillərin qıtlığı avtomatik bahalaşmaya səbəb olub. Əvvəlki kimi müştərilərə bir neçə variant təklif edə bilmirik. Bu durum mənzil sahibləri üçün fürsətə dönüb, evləri daha baha qiymətə kirayə verməyə niyyətlənirlər. Təəccüblü olsa da, baha təklif edilən bu evlərə qısa zamanda tələbat yaranır, bahalaşma baş verir. Hazırda 300-400 manat arasında təklif olunan evlərin qiymətində ən azı 50 manat artım olub".

Müəllif deyir ki, maklerlər evlərini kirayə vermək istəyənlərin də sayının azaldığını bildirirlər, həm də kirayə evlərə tələbat o qədər artıb ki, artıq mənzil sahibləri özləri rahatlıqla müştəri tapa bilirlər.

"Son aylarda kimsə gəlib, evini kirayə vermək üçün ofisə müraciət etməyib.

Özləri makler bazarına gedərək, qısa zamanda rahatlıqla müştəri tapırlar".

Müəllifin deməsinə görə, Nizami rayonunda birotaqlı əşyalı evin qiyməti 250-300 manat, ikiotaqlı əşyalı evin qiyməti 350-400 manat, üçotaqlıların qiyməti isə 450-600 manat arasında dəyişir, boş evlə əşyalı evin arasında 100-150 manat qiymət fərqi var.