Media-icmal 25.01.21

“Redaktor.az” saytı “Cavad Zərifin Bakı səfəri: Çantasındakı təkliflər – Mehri dəhlizi və...” sərlövhəli məqalədə yanvarın 24-də İranın xarici işlər naziri Cavad Zərifin Azərbaycana səfərini dəyərləndirir.

Səfəri şərh edən eks-xarici işlər naziri Tofiq Zülfüqarova görə, bu səfər iki ölkə arasında olan əlaqələrin inkişafı ilə bağlıdır.

O, C.Zərifin Bakı səfərinin əhəmiyyətindən bəhs edərək deyir : “İran 44 günlük müharibə zamanı Azərbaycan əleyhinə heç bir əks-mövqe sərgiləmədi. Təsadüfi deyil ki, Azərbaycan da İranın bu mövqeyini müsbət qarşıladı və məmnundur”.

T.Zülfüqarov əlavə edir ki, regionda Azərbaycanın yaratdığı yeni reallıqlar var, bu səbəbdən İranla Azərbaycan arasında müzakirəyə ehtiyac duyulan mövzular çoxdur, odur ki, səfəri əhəmiyyətli hesab edir.

C.Zərifin baş nazirin müavini Şahin Mustafayevlə gözlənilən görüşünə toxunan eks-nazir deyib ki, bu görüş təsadüfi deyil, Şahin Mustafayev Mehri dəhlizinə aid həyata keçiriləcək işlərdə üçtərəfli komissiyanın üzvlərindən biridir.

T.Zülfüqarova görə, bu isə İrann Mehri dəhlizi ilə maraqlandığını, regionda yaradılacaq dəmir yolu şəbəkəsinin bir parçası olmaq istədiyini göstərir.

“Moderator.az” saytı isə “Təəssüf ki, özəl televiziyalarda daha çox şübhəli imici olan adamlar efirə dəvət olunur” sərlövhəli məqalədə ölkə televiziyalarında verilişlərin keyfiyyətini şərh edir.

Media eksperti Qulu Məhərrəmliyə görə, son bir ildə televiziyada bayağı verilişlərin sayı qismən azalsa da bəzi problemlər hələ də ciddi şəkildə qalmaqda davam edir,

Ekspertə görə, televiziya bir vitrin, göstəricidir, cəmiyyətin güzgüsüdür: “Bura çıxan, təbliğ olunan, dəvət olunan insanlar cəmiyyətdə müəyyən dərəcədə dəb təlqin edən, səviyyəli adamlar olmalıdır. Amma təəssüf ki, xüsusən özəl televiziyalarda nəyinsə xatirinə daha çox subyektiv mülahizələr və şübhəli imici olan adamlar efirə dəvət olunurlar”, - ekspert vurğulayır.

Ekspert hesab edir ki, belə davranışlar ciddi narazılıq doğurur, bunun qarşısını almağın isə çox sadə yolu var, bu da dəvət edilən şəxslərə konkret və dəqiq kriteriyalar olmalıdır. 

Media eksperti deyir ki, bu tələblərin olmaması səbəbindən bəzi telekanalların efirində çox ciddi biabırçılıqlar baş verir , qıcıqlandırıcı şou-proqramlar var və onların aparıcıları da daxil olmaqla, dəvət olunan qonaqların davranışı, geyimi, vulqar yanaşmaları insanları qıcıqlandırır. Ekspertə görə, belə hallarla bağlı müyyən addımlar atılmalıdır.

“Modern.az” saytı isə “Ya rəhbərlik dəyişəcək, ya da idarəetmə Müşahidə Şurasına keçəcək - Rövnəq Abdullayev erası bitir” sərlövhəli məqalədə Dövlət Neft Şirkətində Müşahidə Şurasının yaradılmasının səbəblərinə toxunulur.

Yada salaq ki, yanvarın 23-də prezident İlham Əliyev Dövlət Neft Şirkətinin Müşahidə Şurasının tərkibinin təsdiq edilməsi haqqında sərəncam imzalayıb və iqtisadiyyat naziri Mikayıl Cabbarov Şuranın sədri təyin edilib.

İqtisadşı-ekspert Natiq Cəfərli deyir ki, son zamanlar dövlət şirkətlərinin qeyri-effektiv çalışması, xərclərin şişirdilməsi barədə rəsmi səviyyədə açıqlamalar olub, SOCAR da belə qurumlardan biridir.

Ekspert deyir ki, ötən il prezident İlham Əliyevin sərəncamı ilə Azərbaycan İnvestisiya Holdinqi yaradıldı və SOCAR-ın idarə edilməsi bu holdinqin tərkibinə daxil edildi.

Ekspertə görə, Müşahidə Şurasının yaradılması növbəti addımdır, bu qurum SOCAR-ın fəaliyyəti ilə bağlı məsələlərin həll olunmasında iştirak edəcək və nəzarət mexanizmini həyata keçirəcək.

SOCAR-ın rəhbərliyinin işinin nədən ibarət olacağı ilə bağlı şərh verən N. Cəfərli deyir: “Ya rəhbərlik dəyişəcək, ya da idarəetmə Müşahidə Şurasına keçəcək. Əsas məqsəd SOCAR-ın qeyri-effektiv xərcləmələrinin qarşısının alınması, rentabelli çalışmasına şəraitin yaradılmasıdır. Çünki SOCAR çox qəribə bir şirkətdir. Həm ən çox vergi ödəyən, həm də dövlət büdcəsindən ən çox dotasiya alan şirkətlərdən biridir”.

Ekspertə görə, Mikayıl Cabbarovun rolu işlək bir sistemin qurulmasından ibarətdir.

“Hit.az” saytı isə “Qarabağda yeni iqtisadi model - onu türkiyəli iş adamları quracaq” sərlövhəli məqalədə işğaldan azad edilmiş ərazilərdə görüləcək bərpa-tikinti işlərini deputat Vüqar Bayramovla müzakirə edir.

Deputat vurğulayır ki, burada yeni iqtisadi modelin tətbiqi nəzərdə tutulur, artıq bu proses başlayıb, həmin ərazilərdə formalaşacaq infrastruktur beynəlxalq standartlara uyğun olacaq

Deputat əlavə edir ki, müasir standartlara uyğun olaraq azad edilmiş ərazilərdə yaradılan müasir infrastruktur iqtisadiyyatın formalaşmasına imkan verəcək: “Eyni zamanda, burada yeni modelin tətbiq edilməsi nəzərdə tutulur. Bu model özündə vergi güzəştlərini, təşviq mexanizmlərini, o cümlədən xarici investisiyaların cəlbi üçün xüsusi zonaların yaradılmasını da ehtiva edir”, - deputat bildirir”.

V.Bayramov qeyd edib ki, azad edilmiş ərazilərdə infrastruktur, iqtisadi menecment və biznes mühiti müasir çağırışlara və beynəlxalq standartlara uyğun olaraq formalaşacaq.

Deputat hesab edir ki, Qarabağın yenidən qurulmasında ən uyğun təcrübə Türkiyə modelidir, bununla bağlı Türkiyənin Ətraf Mühit və Şəhərsalma Nazirliyi ilə görüş keçirilib.