Media-icmal 25.12.18

Ölkənin sosial siyasəti, 2018-ci ilə "Cümhuriyyət İli" müstəvisindən baxış, təhsilin magistratura pilləsinin problemləri və s. məsələlər bugünki (25 dekabr, 2018-ci il) medianın aparıcı mövzularındandır...

Prezidentin sevincini məcburi köçkünlərlə bölüşməsi

"Azərbaycan" qəzeti "Prezidentin hədiyyəsi" sərlövhəli məqalədə dövlət başçısı İlham Əliyevin bir qrup məcburi köçkünə mənzil verməsini dəyərləndirir.

Dekabrın 24-ü həm də dövlət başçısının ad günü olmasına işarə edərək, müəllif İlham Əliyevin ad gününü öz ailəsi ilə - yenə də məcburi köçkünlərlə keçirməsi və 1000 ailəyə və ya 5 min nəfərə yeni mənzil bağışlaması kimi qiymətləndirir.

"Prezidentin dəyişməz ənənəsidir: ad günlərini daim məcburi köçkünlərlə keçirir. Bunun səbəbini ondan soruşanlara isə cavabı konkretdir: məcburi köçkünlər mənim ailə üzvlərimdir, mən də doğum günümdə onlarla - öz ailəmlə bir oluram".

Müəllifə görə, dövlət başçısı ad günü sevincini tam dolğunluğu ilə məhz bu sadə insanların əhatəsində yaşayır, onların arasında daha xoşbəxt, daha məmnun görünür və səbəb də budur ki, onu təmənnasız sevənlərin, ona bütün varlığı ilə bağlı olub, tam inananların içində idi...

Müəllif bu faktı həm də İlham Əliyevin lider kimi əməllərilə vətəndaşlarla ən mükəmməl tərzdə ünsiyyət qurmaq bacarığı var.

1000 ailəyə mənzil verilməsini isə yazı müəllifi prezidentin ad gününə hədiyyə ilə gəlməsi kimi qiymətləndirir: "Prezident tam 1000 ailəyə, təqribən 5000 insana yeni mənzil hədiyyə etdi. Və beləliklə, İlham Əliyev tərəfindən açılan məcburi köçkün qəsəbələrinin sayı 101-ə, Prezidentin yeni mənzil hədiyyəsini alanların sayı isə orta hesabla 60 min ailəyə, yəni 300 min nəfərə çatdı".

Yazı müəllifi deyir ki, prezident açılışda daha 1900 ailə üçün mənzil tikiləcəyi müjdəsi versə də, "gün gələcək belə gözəl şəhərciklər bu gün işğal altında olan torpaqlarda açılacaq" bəyanatı ilə Ali Baş Komandan kimi işğalda olan torpaqların azad ediləcəyi mövqeyi nümayiş etdirib.

Müəllifə görə, elə son 10 gündə hərbçilərə 394 mənzil, idmançılara 25 yeni ev hədiyyəsi, 50 min aztəminatlı ailəyə də birdəfəlik maddi yardım ayrılması, məcburi köçkünlərə 1419 mənzil verilməsi, 15 il ərzində isə 100 minlərlə ailənin sevinci, milyonlarla insanın rifahı sosial siyasətinin, "güclü dövlət - güclü xalq - güclü hakimiyyət" formulunun real mənzərəsidir. Gücünü xalqdan alan müqtədir hakimiyyətin qüdrət bəxş etdiyi dövlətin real mənzərəsidir...

Müəllifə görə, bu görüş həm də sübut edib ki, İlham Əliyev xalqın yalnız 5 il müddətə seçdiyi prezident yox, dayağı, güvənci, sabaha inamı, gələcəyinin yeganə təminatçısıdır. Məqalə müəllifinə görə, dövlət başçısı da məcburi köçkünlərin yanından hədiyyəsiz qayıtmayıb, şəhid analarının, övladlarının alqışlarını, dualarını qazanıb.

İmitasiya ilə yadda qalan "Cümhuriyyət İli"

"Azadlıq.info" saytında isə "Cümhuriyyət İli" nə ilə yadda qaldı?" sərlövhəli məqalə oxumaq olar.

Sayt siyasi şərhçi Nəsimi Məmmədlinin "Azərbaycan Xalq Cümhuriyyəti İli" elan olunmuş 2018-ci ilin bu baxış baucağından nə ilə yadda qalması ilə bağlı düşüncələrinə yer verib.

Müəllif xatırladır ki, prezident Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında 2018-ci ili ölkədə "Azərbaycan Xalq Cümhuriyyəti İli" elan etdi.

Qısa müddət sonra, 2018-ci il yanvarın 10-da bu barədə rəsmi Sərəncam da imzalandı. Həmçinin, prezidentin 2017-ci il 16 may tarixli 2867 saylı "Azərbaycan Xalq Cümhuriyyətinin 100 illik yubileyi haqqında" Sərəncamına əsasən, Nazirlər Kabinetinə həm ölkəmizdə, həm də xaricdə müvafiq tədbirlər planının hazırlanıb həyata keçirilməsi tapşırıldı: "Artıq il sona yaxınlaşır, "Cümhuriyyət İli" hansı tədbirlərlə yadda qaldı?" sualı ilə yola çıxan müəllif baş verənləri şərh edir.

Siyasi şərhçiyə görə, bu qərar cəmiyyət çoxluğu tərəfindən müsbət qarşılanan azsaylı qərarlardan biridir, ölkənin fəal və siyasi təfəkkürü formalaşan insanları üçün cümhuriyyət dəyərlərinin ən müqəddəs ictimai-siyasi dəyərlər sistemi olmasının göstəricisidir.

Müəllif vurğulayır ki, hökumət 2018-ci ildə 100 illik yubileyi tamam olan Xalq Cümuriyyətinin tarxinin tədqiqi, bu fenomeni, onun dəyərlərini təbliğ və təşviq baxımından ölkə alimlərinə belə fürsət yaratmadı, əksinə Cümhuriyyət tarixinə aid sənədlər tədqiqatçıların üzünə bağlandı.

Müəllifə görə, bu il ölkədə çoxpartiyalı siyasi sistemə meydan açılması, siyasi məhbusların azad edilməsi, mətbuat, söz və ifadə azadlığını təmin etmək, demokratik seçki keçirmək bu ilə tövhə ola bilərdi, amma belə fürsətlər qaçırıldı.

Siyasi şərhçiyə görə, Cümhuriyyəti, onun demokratik platformasını dünyaya tanıtmaq baxımından da hökumət hər hansı yadda qalan bir iş görmədi, halbuki, bu məsələ, Qarabağ probleminin həlli baxımından, ölkənin daim müsbət beynəlxalq imicə ehtiyacı olması baxımından vacib idi.

Müəllifə görə, bu müstəvidə hökumətin baxış bucağı kəskin fərqlidir: "Hətta beynəlxalq arenada belə bir rəy yaratmağa çalışırlar ki, xalqımız demokratik dəyərlərə hələki hazır deyil. Təəssüf ki, ölkəmiz bütün beynəlxalq hesabatlarda insan hüquq və azadlıqlarının durumuna görə "qeyri-azad ölkə" statusu alıb".

Siyasi şərhçi hesab edir ki, hakimiyyət 2018-ci ili "Cümhuriyyət ili" elan etmək qərarını 100 il əvvəlki böyük uğura rəğbətdən yox, məcburiyytədən verib, belə ki, xalq içində bu tarixin böyük hörmət və dəyəri var və bu dövrün rəsmi olaraq təbliğ olunmaması bunun bariz göstəricisidir: "İqtidarın indiyə kimi müşahidə edilən davranışlarını analiz etsək, belə görünür ki, AXC-nin 100 illiyində bu addımın atılması ictimai məcburiyyətdən doğub. Nəticə göstərdi ki, bu qərar ictimai qınaqdan yayınmaq naminə sadəcə konyuktura idi".

Siyasi şərhçiyə görə, görünən budur ki, AXC-nin 100 illiyi ilə bağlı tədbirlər keçirmək üçün yalnız hüquqi qərar yetərli olmadı, həm də siyasi iradə lazım idi, bu olmadı və təəssüf ki, "Cümhuriyyət İli"də imitasiya kimi yadda qaldı.

Tələbələrin magistratura narazılıqları

"Modern.az" saytnda isə "Tələbə şikayətləri - "Azərbaycanda magistr təhsili almaq mənasızdır - səbəb" sərlövhəli məqalə diqqt çəkir.

Müəllif Azərbaycanda magistr pilləsi təhslinin beynəlxalq standartlara uyğunlaşmaması problemini təhsil eksperlərilə müzakirə edir.

Yazı müəllifi vurğulayır ki, magistratura - ali təhsilin ikinci səviyyəsinin tələblərinə uyğun olaraq, yüksək ixtisaslı, sərbəst yaradıcılıq fəaliyyəti göstərə biləcək mütəxəssislərin hazırlığını təmin edən təhsil prosesidir, bəzən belə ifadələr səsləndirirlər: "Azərbaycanda magistraturanı oxumaq mənasızdır".

Müəllif iddia edir ki, son zamanlar isə belə düşünən tələbələrin sayı kifayət qədər çoxalıb, hətta belə qənaət yaranır ki, Azərbaycanda magistr təhsili alan tələbələrin bir çoxu xaricə getmək imkanı olmadığı, ikinci diplomu almaq xətrinə, zamanını boş keçirməmək üçün magistratura təhsili alır.

Yazı müəllifi deyir ki, bu sahədə tələbələr bakalavr pilləsində keçirilən Psixologiya, Pedaqogika, Fəlsəfə, Xarici dil kimi fənlərin "əlavə fənn" adı ilə magistraturada yenidən siyahıya salınmasından şikayət edirlər.

Təhsil sahəsil üzrə ekspert Kamran Əsədovun "modern.az"a açıqlamasına görə, tələbələrin şikayətçi olduqları məsələlər əsasən dövlət universitetlərində baş verir, özəl ali məktəblərdə isə vəziyyət bir qədər fərqlidir: "Hər hansı ixtisas üzrə özəl universitetlərdə əlavə fənlər tədris olunmur. Dövlət universitetləri büdcədən daxil olan vəsaiti xərcləmək və müəllimlərə əlavə dərs saatı ayırmaq üçün belə addım atırlar. Ona görə, magistraturada tədris olunan fənlərin 60-70 faizi bakalavr pilləsinin təkrarı və əlavə fənlərdir".

K.Əsədov hesab edir ki, dünya təcrübəsindən istifadə etmək lazımdır:

"Biz Boloniya sisteminə qoşulmuşuq. Ona görə, kreditlərin sayı və həcmi ixtisasa uyğun gələn fənlər üzərində olmalıdır. Əlavə fənlərin təkrar tədris edilməsi, üstəlik ixtisas fənni səviyyəsində kredit hesablanması yolverilməzdir".

K.Əsədov deyir ki, magistratura dünyada elmi səviyyə kimi qəbul edilsə də, Azərbaycanda hələ də bu səviyyəyə çatmayıb, bunun üçün magistraturada tədris fənlərinin sayı azaldılmalı, ixtisasa uyğun fənlər tədris olunmalıdır ki, kadrlar əmək bazarının tələblərinə cavab verə bilsinlər.

Müəllif bildirir ki, Bakı Mühəndislik Universitetinin elmi işlər üzrə prorektoru Elçin Süleymanov da magistratura səviyyəsində dünya təcrübəsinin Azərbaycan təhsil sisteminə tətbiq edilməsinin vaxtı çatdığını və magistratura pilləsi tədris planının tələbənin tədqiqatçı kimi yetişməsinə kömək etməli olduğunu bildirir: "Hazırda Avropada və Türkiyədə dərslərin əksəriyyəti tədqiqat yönümlü fənlərdir. Tədqiqat metodları, ixtisasa uyğun müxtəlif proqramlar, təhlil aparma metodları və s. magistrantlara tədris edilir. Məsələn, iqtisadiyyat sahəsini götürsək, bakalavr pilləsində iqtisadiyyatın əsasları, giriş hissəsi, magistraturada isə onun tətbiqi öyrədilir. Bizdə bir problem də var ki, bəzən tətbiqi fənləri proqrama salırlar, amma bunu tədris edəcək müəllim tapılmır. Belə hallar tələbələri magistr təhsilindən daha da soyudur. Həm dərs keçmək metodu, həm də fənlərin konteksti dəyişməlidir".