Media-icmal 26.01.21

"Yenisabah.az" saytı "Sülhməramlılar"ın Qarabağda qanunsuz "anti-terror" təlimləri –əgər silahlı erməni birləşmələrini çıxarsalar" sərlövhəli məqalədə politoloq Məhəmməd Əsədullazadə Qarabağdakı Rusiya sülhməramlılarının anti-terror təlimlərini şərh edir.  

Politoloqa görə, "Rusiya "sülhməramlı" qüvvələrinin Qarabağda, Azərbaycan ərazisində anti-terror təlimləri qanunsuz hərbi təlimlərdir və çoxsaylı suallar doğurur, belə təlimlər onların missiyası ilə uyğun gəlmir".

Politoloq deyir ki, Rusiya bu təlimlərə fərqli don geyindirməyə çalışır, o zaman sual yaranır ki, bu təlimlərlə sülhməramlı qüvvələr özünü kimlərdən müdafiə edir?!

M.Əsədullazadə əlavə edir ki, hazırda Qarabağda 10 noyabr Bəyannaməsinə zidd olaraq qanunsuz erməni hərbi birləşmələri fəaliyyət göstərir: "Son Hadrut terror təxribatları buna sübutdur. Bu təxribatlarda Azərbaycan əsir götürülən silahlı erməniləri haqlı olaraq terrorçu kimi mühakimə edir. Bu, beynəlxalq hüquq çərçivəsinə uyğundur", deyə politoloq bildirir.

Politoloqa görə, bu antiterror təlimləri Rusiyanın erməniləri müdafiə etmək üçün atdığı böyük addımdır, destruktiv hərəkətdir, sülhməramlı deyil, birtərəfli olaraq ermənilərin müdafiəsini həyata keçirməkdir.

M.Əsədullazadə deyir ki, Azərbaycan üçün Qarabağ ətrafında bu il situasiya mürəkkəb olaraq qalacaq. Buna cavab olaraq Azərbaycan Türkiyə və Pakistanla birgə hərbi ittifaq yaratmalıdır.

"Moderator.az" saytında isə "İbtidai siniflərə bu qədər dərs yükü yüklənməsi cinayətdir, bu, uşağı şikəst edir..." sərlövhəli məqalədə ibtidai siniflərin dərs yüklərinin həddən çox olması müzakirə edilir.

Azərbaycan Xalq Cəbhəsi hakimiyəti dövründə təhsil naziri kimi fəaliyyət göstərən Firudin Cəlilov ölkənin təhsil sistemində islahatlara ehtiyac olduğunu bildirib.

Onun fikrincə, ümumiyyətlə, təhsil sistemində islahat lazımdır, xüsusilə orta məktəbdə aşağı sinif proqramları dəyişməlidir: "Birinci sinif şagirdlərinə o qədər dərs yükləyirlər ki, onların beyinləri yorulur. Bundan başqa, proqram daha çox mənasız mövzularla ağırlaşdırılıb. İbtidai siniflərə bu qədər dərs yükü yüklənməsi cinayətdir, bu, uşağı şikəst edir, beyinlərini pozur", deyə eks-təhsil naziri bildirir. 

F.Cəlilov əlavə edir ki, yerlərdə icra hakimiyyətlərinin Təhil Şöbələrinə müdaxiləsi  illərdir davam edir: "Qaldı ki, rayon Təhsil Şöbələrinə yerli icra hakimiyyətlərinin müdaxiləsindən dəfələrlə danışmışıq. Ümumiyyətlə, islahat olanda hər şey yerinə oturur. Yəni Bakıda oturub Ağdamda bir kənd məktəbinin problemini həll etmək lazım deyil, əksinə, məsuliyyəti yerlərə ötürmək lazımdır", deyə F.Cəlilov bildirir. 

"Modern.az" saytı isə "SOCAR-ın maliyyə işlərini nəzarətdə saxlamağa ehtiyac var – deputat" sərlövhəli məqalədə Dövlət Neft Şirkətində Müşahidə Şurasının yaradılmasını deputat Vahid Əhmədovla müzakirəyə çıxarır.

Milli Məclisin deputatı Vahid Əhmədovun sözlərinə görə, SOCAR-ın maliyyə işlərini ciddi nəzarətdə saxlamağa ehtiyac var:"SOCAR Azərbaycanın ən böyük şirkətidir, SOCAR-ın bir sıra dövlətlərdə filialları və çox böyük ixrac potensialı var.

V.Əhmədov əlavə edir ki, Müşahidə Şurasının yaradılması çox vacib bir addımdır, SOCAR-la bağlı həm maliyyə, həm də digər məsələləri müəyyən qədər ciddi nəzarətdə saxlamağa ehtiyac var.

Dövlət Neft Şirkətində Müşahidə Şurasının yaradılmasına gəlincə, deputat hesab edir ki, bu qurum  SOCAR-da nəzarət mexanizminin gücləndirilməsi üçün yaradılıb: "SOCAR-la bağlı mətbuatda müəyyən yazılar gedir. Müşahidə Şurası, yəqin ki, çox ciddi addımlar atacaq və maliyyə məsələlərinin müəyyən qədər düzgün aparılmasını təmin edəcək.

V.Əhmədov deyir ki, SOCAR-ın maliyyə imkanları çox genişdir, ona görə də Müşahidə Şurası şirkətdə nəzarət mexanizminin daha da gücləndirilməsi üçün yaradıldı".

"Müsavat .com" saytı isə "İranın baş diplomatının Bakı səfəri: Ermənistanı yerdən-yerə vuran ilginc açıqlamalar" sərlövhəli məqalədə İran xarici işlər naziri Cavad Zərifin Azərbaycana səfərini dəyərləndirir.

Politoloq Elxan Şahinoğlu vurğulayır ki, İran naziri Azərbaycanı Qarabağ torpaqlarını erməni işğalından azad etməsi münasibətilə tərbrik edib. Bununla birgə, politoloq yada salır ki, bu, həmin İrandır ki, qələbəyə kimi Qarabağ probleminin müharibə ilə həlli yolu olmadığını deyirdi.

Politoloq deyir ki, Azərbaycan bu reallığı dəyişdi və Tehran müharibə ilə qələbə reallığını qəbul etdi.

Politoloq bunu da yada salır ki, C.Zərif Azərbaycandan sonra Ermənistana səfər edəcək və Bakıda dediklərini  orada təkrar edə bilməyəcək: "Ancaq Zərifin Bakıda qələbə ilə bağlı dedikləri müxtəlif dillərə tərcümə ediləcək və Ermənistanda da oxunacaq. Ermənistanda görəcəklər ki, İran Azərbaycanın qələbəsini və Dağlıq Qarabağın Azərbaycana məxsusluğunu birmənalı tanıyıb", deyən politoloq Ermənisatnda Zərifi heç də xoş ovqat gözləmədiyini bildirir.

Digər tərəfdən, İran işğal altındakı ərazilərin bərpasında iştirak etmək istəyir, bu da Azərbaycanın maraqlarına uyğundur, bununla İran bir daha Dağlıq Qarabağın Azərbaycana məxsusluğunu təsdiq etmiş olacaq. Beləliklə, müharibədən sonra Azərbaycanla İran arasında əməkdaşlığı inkişaf etdirmək üçün yeni imkanlar açılıb.