Media-icmal 26.08.2016

Paytaxtda inşaat işi, bankın müştəriyə qanunsuz davranışı, tələbələrin yatarxana, valdeiynlərin bağça problemləri bugünkü medianın aparıcı mövzusudur.

Dağıdılan “sovetski”, abadlaşan Bakı

“Azərbaycan” qəzeti “Sosial layihələrin icrası davam edir” sərlövhəli məqalədə ( http://www.azerbaijan-news.az/index.php?mod=3&id=103805) Bakının tarixi “Sovetski” məhəlləsinin yeni siması haqda danışılır.

Müəllif son illərdə paytaxtın simasının dəyişdiyini, yolların dünya standartlarına uyğun hazırlandığını deyir. Müəllifə görə, sovet dönəmində şəhərin bir çox hissələrində evlər plansız tikilib, tikinti və sanitar normalarına əməl olunmayıb və belə ərazilərdən biri “Sovetski”dir.

Müəllif deyir ki, prezident İlham Əliyev Bakını dünyanın  gözəl şəhərlərindən birinə çevirmək üçün böyük işlər görür və “Sovetski”də aparılan işlər də bunun tərkib hissəsidir. Müəllif deyir ki, “Sovetski”də evlərin çoxu öz istismar müddətini başa vurub, odur ki, bu məhəllənin sökülməsi şəhərin abadlaşdırılması baxmından zəruri idi. Bu məhəllənin sökülməsini şəhərin infrastrukturunun yenidən qurulması baxımından vacib sayan müəllif prezident İlham Əliyevdən sitat gətirir: “Sosial infrastruktur layihələri icra ediləcəkdir... Şəhərsalma işi daha da düşünülmüş şəkildə aparılmalıdır. Bizim şəhərimiz böyüyür. Şəhər infrastrukturu buna uyğun şəkildə qurulmalıdır”.

Məqalədə deyilir ki, bu ərazidə işlərin birinci mərhələsində 26 hektarda yolların salınması və abadlıq işlərinin görülməsi nəzərdə tutulur. 23 hektar sahədə yaşıllaşdırma və abadlıq, 3 hektar sahədə isə avtomobil yollarının tikintisi işləri həyata keçiriləcək.

Yazıda dövlət başçısı İlham Əliyevin bu ilin avqustunda bu ərazidə görüləcək çoxcəhətli işlərin davam etdirilməsi üçün daha beş milyon manat vəsait ayırdığı deyilir. Müəllifə görə, bunun nəticəsində yaxın vaxtlarda köhnə “Sovetski”nin yerində paytaxtın abad və gözəl bir guşəsi özünü göstərəcək.

Bank: Böyrəyini sat, amma krediti ödə!

“Azadlıq” qəzeti “Unibank” böyrəyini satdırmaq istədiyi borclunu həbs etdirdi” (http://www.azadliq.info/153964.html)  yazısında kredit borcuna görə bankın davranışı barədə hüquqşünas Əkrəm Həsənoun Facebook səhifəsindəki məlumatını yayıb.

Hüquqşünas “Unibank”a təxmini 3000 borcu olan 38 yaşlı işsiz ailə başçısı Mübariz Bayramov haqda aprel ayında məlumat verildiyini xatırladır. Hüquqşünas deyir ki, bank M.Bayramova böyrəyini satıb kreditini qaytarmağı təklif edib.   M.Bayramov isə Ə.Həsənovun təsis etdiyi “Antikollektora müraciət edib, məsələ ictimailəşib, sakitlik yaranıb.

Avustun 25-də isə Nərimanov Rayon Məhkəməsi bu borca görə M.Bayramovu 5 günlük həbs edib. Ə.Həsənov deyir ki, tələsik keçirilən bu məhkəmə iclasında “Unibank”ın da nümayəndəsi iştirak edib və M.Bayramovun cəzalandırılmasını istəyib. Ə.Həsənov məhkəməyə gedib qərarın surətini aldığını deyir və işdə sona qədər vətəndaşın hüquqlarını müdafiə edəcəyini bildirir.

Ə.Həsənov deyir: “ Həbs yalnız borcun üzrsüz səbəbdən ödənilməməsinə görə ola bilər. Yəni, borclunun pulu var, amma ödəmir. Bu faktı da icra məmuru sübut etməlidir. Təqsiri olmayan şəxsin cəzalandırılması qanuna ziddir.”

Borca görə həbs Azərbaycanın qoşulduğu Mülki və siyasi hüquqlar haqqında beynəlxalq Paktın və Avropa İnsan Hüquqları Konvensiyasının uyğun maddələrinin pozulması deməkdir.

Ə.Həsənova görə,  bununla banklar borcluları bu cür qorxutmaqla kreditləri ödətdirmək istəyirlər. Ə.Həsənov xatırladır ki, belə bir oxşar iş üzrə artıq Avropa Məhkəməsinə şikayət verilib.

Tələbələrin yataqxana dərdi

“Exo” qəzeti isə “Tələbə yataqxanaları yenə əlçatmazdır” sərlövhəli məqalədə (http://www.echo.az/article.php?aid=104608) yeni dərs ilində tələbələrin yataqxana təminatını ekspertlərlə araşdırır.

Yazıda tələbələrin yataqxana təminatının fəlakətli dərəcədə pis olmasının heç kəs üçün sirr olmadığı deyilir, bu vəziyyətin neçə 10 illərdir ki, davam etdiyi vurğulanır. Müəllifə görə, aylıq gəliri 500 manat olan ailələr övladlarına ali təhsi vermək problemi yaşayırlar. Məqalədə yataqxana məsələlərini həll edə bilmək üçün tələbələrin həm də işləməyə məcbur olduqları nəzərə çatdırılır.

Ekspert Məlahət Mürşüdlü Bakıya gələn hər bir tələbənin başı üstə “tavanı” olmadığını deyir: “Bir zamnalar məcburi köçkünlərin yaşadıqları tələbə yataqxanaları onların yeni evlərə köçməsilə sərbəstləşib, amma bu yataqxanalara indiyə kimi universitetlərə qaytarılmayıb”. Ekspert deyir ki, bir çox ali məktəblərin rəhbərlikləri problemi həll etmək üçün təşəbbüs belə göstərmirlər.

Ekspert bildirir ki, tələbədən təhsli haqqını vaxtında vermək tələb edilir, amma onların problemi heç kəsi maraqlandırmır. M.Mürşüdlü qəzetə yataqxanalarda qiymətin bahalığını da çatdırır: “Bir otaqlı 200 manata, ikiotaqlı 400 manata, 3 otaqlı isə 500-600 manata başa gəlir”.

“Əmlak bazarının iştirkçıları” birlyinin sədri Ramil Osmanlı deyir ki, icarə mənzil bazarı demək olar ki, tələbələrin hesabına varlığını davam etdirir. Amma bu bazar indi problemlər yaşayır, belə ki, şəhər içində icarə haqları baha olduğu üçün tələbələr şəhərin kənarında və ya qəsəbələrdə ev kirayələyirlər. R.Osmanlı bunu da deyir ki, iş adamları yataqxanalar tikərək onu aşağı qiymətlə icarəyə versələr belə yenə də qazanc götürə bilərlər, amma bu, edilmir.

İlk addımı rüşvətlə

“Bizim yol” qəzeti “İlk addımını rüşvətlə atanlar...” sərlövhəli məqalədə (http://www.bizimyol.info/news/83522.html) müəllif uşaqların bağça ilə bağlı təminatının səviyyəsini araşdırır.

Müəllif övladlarını bağçalara göndərmək istəyən valideynlərin “bağça rəhbərlikləri tərəfindən “yer yoxdur” sözləri ilə qarşılaşdıqlarını deyir.

Məqalədə deyilir: “Valideynlər var ki bağçalarda yer olmadığından şikayətçidirlər. Uşaqlara yetəcək qədər bağça yoxdur. Olanlara da “hörmətlə” ya da “tanışlıqla” qəbul edirlər uşaqları. Bu məsələyə baxılsa yaxşı olar. Çünki məktəbdən öncəki təhsil hər bir uşaq üçün vacibdir və hər uşağın buna hüququ var”.

Təhsil Nazirliyinin məktəbəqədər təhsil sektorunun müdiri Nərminə Alnağıyeva “sosium” proqramında çıxışı zaman deyib ki, ölkənin 75,5 faizində məktəbəqədər təhsil müəssisəsi çatışmır.

Müəllif sosial şəbəkədə apardıqları sorğu nəticəsində əldə edilən nəticələr barədə valideynlərin maraqlı məqamlara toxunduqlarını nəzərə çatdırır.

Valideyn Natavan Süleymanlı dövlət bağçasına qəbul üşün 300-500 manat tələb edildiyini deyir, hər ay da valideynlərdən 20 manat alınır, bunun müqabilində uşaqlara baxım səviyyəsi aşağıdır, bağça saat 19:00-a kimi işləməliykən saat 17:00-da zəng edirlər ki, gəlin uşağı aparın.

Müəllif valdeynlərə istinadən yenə də qeyd edir ki, özəl bağçalarda qiymətlər 600-700 manatdan başlanır ki, bu da əksər valideynlər üçün əlçatan deyil.

Müəllif deyir ki,  valideynlərin düşüncəsinə görə, buna dövlət səviyyəsində müdaxilə olmasa bu sahədə vəziyyət düzələn deyil.