![Media-icmal 27.08.2016](https://turan.az/resized/media/2016/main/082700166879-750-500-resize.webp)
Ölkədə müstəqil siyasət kursu, F.Əmirlinin həbsinə ictimaiyyət simalarının münasibəti, vətəndaşların mənzil problemi, turizm məkanlarında qiymət və xidmət bəhsi bugünkü medianın aparıcı mövzusudur.
Heydər Əliyev kursunun davamı
“Azərbaycan” qəzetində “Müstəqil dövlət olmaq müstəqil siyasət yürütmək deməkdir” ( http://www.azerbaijan-news.az/index.php?mod=3&id=103868) sərlövhəli məqalədə yürüdülən müstəqil siyasət nəticəsində ölkənin əldə etdiyi uğurlardan danışılır.
Müəllif mövcud müstəqil siyasi kursun əsasını keçmiş prezident Heydər Əliyevin qoyduğunu, İlham Əliyevin isə onu davam etdirdiyini deyir və bu mənada İ.Əliyevin rəhbərliyini belə qiymətləndirir: “Xalqın sosial sifarişi əsasında Azərbaycanda Heydər Əliyev siyasi kursunu davam etdirmək kimi çətin və məsuliyyətli bir missiyanı üzərinə götürmüş cənab İlham Əliyev ötən 13 ildə öz siyasətini bu ənənələr çərçivəsində qurur”.
Məqalədə İ.Əliyevin rəhbərliyi dövründə ölkə həyatında baş vermiş haidsələrin demək olar ki, bütün spektrinə toxunulur və dəyərləndirmələr təqdim edir. Yazıda 2012-2013-cü illərdə ölkənin BMT Təhlükəsizlik Şurasına qeyri-daimi üzv seçilməsi yadda qalan tarixi hadisələrdən biri sayılır.
Bu il aprelin 2-5-də Qarabağ cəbhəsində baş vermiş döyüşlərin mahiyyəti də yazıda yer alır və müəllif mahiyyəti dövlət başçısı İ.Əliyevdən sitat gətirməklə izah edir: “Aprel döyüşləri dövlətimizin və ordumuzun gücünü, xalqımızın birliyini, həmrəyliyini və vətənpərvərliyini nümayiş etdirmişdir!”.
Müəllif ölkənin iqtisadi spektrini dünyada baş verən hadisələr fonunda təqdim edir. Yazıda Yaxın və Orta Şərqdə baş verən münaqişələr amma buna baxmayaraq, Azərbaycanın sabit inkişaf etdiyi vurğulanır: “Lakin iqtisadi böhrana, siyasi və sosial gərginliklərə baxmayaraq, Azərbaycanda dayanıqlı inkişaf təmin edilib. Qlobal iqtisadi böhranın hələ də davam etdiyi bir şəraitdə Azərbaycanda makroiqtisadi sabitlik mövcuddur”.
Yazıda Bakı- Tbilisi -Ceyhan, Bakı-Tbilisi-Ərzurum, Bakı-Tbilisi- Qars, “Cənub” qaz dəhlizi kimi layihələrin icrası Azərbaycan dövlətinin dünya arenasında layiqli yerini təmin edir. Müəllif icrasına çalışılan “Şimal-Cənub” nəqliyyat dəhlizi layihəsinin də mühüm əhəmiyyəti olduğunu deyir: “Şimal-Cənub” nəqliyyat dəhlizi də strateji əhəmiyyət daşıyan transmilli layihədir və gələcəkdə bir çox ölkələr bu dəhlizdən istifadə edəcəklər. Bu dəhlizin çox böyük iqtisadi səmərəsi var”. Müəllif deyir ki, dəmir yol xəttinin istifadəyə verilməsi nəticəsində Qafqaz ölkələrinin, Rusiyanın, Şimali və Şərqi Avropanın Fars körfəzinə və Hindistana çıxışı təmin ediləcək.
Müəllif bütünlükdə yürüdülən mövcud siyasi kursu belə dəyərləndirir: “Əminliklə qeyd etmək olar ki, xalq tərəfindən dəstəklənən bu siyasi kurs Azərbaycanı daha da qüdrətli dövlətə çevirəcək”.
İctimaiyyət simaları: “Bu ittiham gülüncdür”
“Azadlıq” qəzeti “Proseslər işin qondarma olduğunu göstərir” sərlövhəli məqalədə ( http://www.azadliq.info/154199.html) qəzetin yayım direktoru Faiq Əmirlinin “Gülənçi şəbəkə”yə aid olması ittihamı ilə həbsinə ictmaiyyətin tanınmış simalarının dəyərləndirmələrini təqdim edir.
Tanınmış jurnalist Elçin Şıxlı qardaş Türkiyədə gedən proseslərin elə Azərbaycanın daxili işlərinə mənfi təsir etməsinin əleyhinə oldğunu deyir: “Təbii ki, mətbuat işçisinin belə qondarma ittihamla həbsinin tam əleyhinəyəm. Insanları öncə həbs edirlər, sonra isə günahkar olduğuna sübut axtarırlar, öncə sübutlar əldə olunmalıdır. Xüsusən də, Fətullah Gülənin ideologiyasından uzaq şəxsin həbsinin əleyhinəyəm”.
Hüquqşünas Əyyub Kərim isə F.Əmirlinin həbsini hüquqi müstəvidən daha çox siyasi müstəviylə bağlayır: “Burada hüquqdankənar münasibət əsas rol oynayıb, ittihamın gülünclüyünü hər kəs bilir, təəssüf ki, bütün bu həbslərdə hüquq deyil, siyasət özünü göstərir”.
Vəkil Əsabəli Mustafayev bu ittihamı keçmiş MTN-nin tikdiyi “torba” adlandırır: “Faiq Əmirlinin də belə maddələrlə ittiham edilməsi gülüncdür. Burda əsas motiv tamamilə başqadır, bu, insanların ictimai, siyasi və yaradıcı fəaliyyətiylə əlaqəlidir. Faiqin ictimai-siyasi fəaliyyətinə görə o ittiham elan olunub. Indilikdəsə proseslərin əksinə cərəyan etməsi işin qondarma olduğunu göstərir”.
Vəkil Fuad Ağayev də F.Əmirliyə ittihamı güzgün saymır: “Hətta zahiri əlamətlərinə görə də burada məqsədin hüquqdankənar olduğu görünür”.
Boş mənzillər və mənzilsizlər
“Exo” qəzetində “Boş qalan mənzillərə vergi” sərlövhəli məqaləni oxumaq olar.(http://www.echo.az/article.php?aid=104705) .
Məqalədə bir tərəfdən tikilən mənzillərin adambaşına düşən sahəsinin azlığı, digər tərəfdən tikilən binalarda mənzillərin boş qalmasına baxmayaraq, mənzil bazarında qiymətlərin bahalığı tənqid edilir. Yazıda BMT-nin adambaşına düşən mənzil sahəsinin 30 kv. metr olması barədə mövqeyi xatırladılır. Eyni zamanda bu standartlara Azərbaycanda əməl olunmadığı deyilir. Müəllifə görə, ən yaxşı halda adambaşına düşən sahə 20 kv. metri keçmir.
Mənzil almağa gəlincə, müəllifə görə, bu, hamı və ya əksər əhali üçün əlçatan deyil. Məqalədə hətta böhran nəticəsində mənzillərin ucuzlaşmasının onu aztəminatlı ailələr üçün əlçatan etmədiyi deyilir. “Bu gün Azərbaycan sərt mənzil böhranı ilə əhatələnib, mənzilsizlik insanları ailə qurmaq imkanlarından məhrum edir”. Məqalədə deyilir ki, ölkənin illik 33-35 min kv.metr mənzil sahəsinə ehtiyacı var, amma cəmi 17-20 min kv.metr tikilir.
Müəllif deyir ki, paytaxt Bakıda mənzillərin 35-40% boşdur və məqalədə mənzillərin satılması və ya icarəyə verilməsi üçün mənzil vergisi tətbiqi mümkün sayılır: “Bu təcrübə Azərbaycan üçün də faydalı ola bilər, bizdə də minlərlə kv.metr mənzil sahəsi boş qalaraq imkanlı adamlar üçün investisiya mahiyyəti daşıyır”.
Qəzetə şərh verən ekspertlərə görə, boş qalan mənzillərə vergi tətbiqi aşağıdakı nəticələri doğuracaq: “Ya onu tezliklə satmaq, ya icarəyə verərək sakin sayından asılı dövlətə kommunal vergiləri ödəmək, ya da boş qalan mənzilə görə vergi vermək”. Ekspertlər deyirlər ki, nəticədə daşınmaz əmlak bazarında mənzilləri təkcə imkanlı şəxslər almayacaq, təklif artaraq qiymətləri aşağı salacaq və əlçatanlıq dairəsini genişləndirəcək.
Baha qiymət, səviyyəsiz xidmət
“Bizim Yol” qəzetiindəki “Bakıda dənizi, rayonlarda isə dağları, meşələri hasarlayıblar” (http://www.bizimyol.info/news/83580.html) sərlövhəli məqalədə isə turizm məkanlarında qiymət və xidmət səviyyəsi müzakirə edilir. Bu dəfə bu məkanlardakı durumu ekspert rolunda jurnalist və iqtisadçılar dəyərləndirirlər.
Jurnalist Zaur İbrahimli deyir ki, lüks kateqoriyasında qiymətlər yenə baha olaraq qalır, hətta İspaniya turları belə daha sərfəli görünür. Qiymətlərdə güzəşt olsa da xidmət və istirahətin təşkili minumum tələblərə cavab vermir. “Regionlarda qiymətləri yüksək olan istirahət mərkəzləri belə turist üçün onun marağına səbəb olacaq istirahətin təşkilini həyata keçirə bilmirlər, yalnız voleybol meydançası və hovuz tikməklə iş bitmir”. Bu məsələnin həlli üçün müxtəlif əyləncə növləri, səfərlərin təşkili təklif edilir və bunun əksi olacaqsa aşaığdakı məntiqi nəticə xatırladılır: “Bunlar olmayacaqsa azərbaycanlılar yenə Gürcüstan və s. ölkələrə üz tutacaqlar”.
İqtisadçı ekspert Nazim Məmmədova görə, isə turizm məkanlarında infrastruktur, xidmət sektoru kifayət qədər cəlbedici deyil. O deyir ki, üç il əvvəl çəkilən asfalt örtüyünün böyük hissəsi sıradan çıxıb, səbəb isə ayrılan maliyyə vəsaitinin mənimsənilməsidir. Ekspert deyir ki, bulaqlar, mineral sular müxtəlif insanlar tərəfindən zəbt olunub: “Hətta yerli camaat öz ehtiyacları üçün bulaq suyundun istifadə etməkdən ötrü icazə almalı olurlar, iqtisadiyyatda olan inhisarçılıq bu sahəni də ağuşuna alıb”.
N.Məmmədov deyir ki, bu səbəbdən Azərbaycandan Gürcüstana ildə 1 milyondan artıq vətəndaş turist kimi gedir: “Sahibkarlara dəstək, infrastruktur yaranmış olsa idi vətəndaşlar turist kimi hər il xarici ölkələrə xərclədiyi milyonları regionlara yönəltmək olardı”.
Rəy yaz