Media-icmal 28.01.20

TAP qaz boru kəməri tikintisinin başa çatmaqda olması, boşanmaların artmasının səbəbləri, Mirzə Davud küçəsinin sakinlərinin məişət qayğıları və s. məsələlər medianın aparıcı mövzuları sırasındadır.

Azərbaycan qazı Avropaya yola düşür

“Azərbaycan” qəzeti “Cənub” qaz dəhlizinin sonuncu seqmentinin çəkilişi başa çatır” sərlövhəli məqalədə tamamlanmaqda olan Transadriatik Qaz Boru Kəmərinin (TAP) çəkilişinin əhəmiyyətini dəyərləndirir.  

Müəllif deyir ki, kəmərin çəkilişinin tamamlanması ilə nəhəng “Cənub” qaz dəhlizi layihəsinin icrası başa çatacaq və Azərbaycana qaz ehtiyatlarını Avropa bazarlarına şaxələndirilmiş yolla çatdırmağa imkan verəcək.

Yazı müəllifi hesab edir ki, TAP strateji əhəmiyyətli layihədir, Avropanın mavi yanacağa olan tələbatını ödəyəcək və enerji təhlükəsizliyinə ciddi dəstək verəcək: “Xəzər dənizinin Azərbaycan sektorundakı “Şahdəniz” yatağının işlənməsinin ikinci mərhələsi çərçivəsində hasil olunan qazı Türkiyəyə və oradan da Avropaya daşıyacaq 3500 kilometrlik “Cənub” qaz dəhlizinin tərkib hissəsi olan TAP Cənubi Qafqaz Boru Kəmərinin (CQBK) və Transanadolu Qaz Boru Kəmərinin (TANAP) davamıdır. “Cənub” qaz dəhlizinin üç seqmenti – “Şahdəniz-2”, CQBK-nın genişləndirilməsi və TANAP layihələri artıq fəaliyyətdədir. İndi növbə TAP-ındır” deyə müəllif  vurğulayır.

Müəllif  deyir ki, hazırda TAP-ın tikinti meydançalarında işlər başa çatmaqdadır və bu da kəmərin Azərbaycan qazını Avropaya nəzərdə tutulduğu vaxtda, yəni bu il çatdıracağına zəmanət verir.

Müəllif bildirir ki, uzunluğu təxminən 878 kilometr olan kəmərin 550 kilometri Yunanıstanın, 210 kilometri Albaniyanın ərazisindən, 105 kilometri Adriatik dənizinin altından keçir və sonuncu - bir neçə kilometrlik hissəsi İtaliya torpağında quru sahəyə çıxır. Kəmərin çəkilişinə 2016-cı ildən başlanılıb.

Məqalə müəllifi deyir ki, TAP layihəsində BP (20 faiz), SOCAR (20 faiz), "Snam S.p.A.”  (20 faiz), "Fluxys” (19 faiz), "Enagas” (16 faiz) və "Axpo” (5 faiz) şirkətləri tərəfdaşlıq edirlər.

Yazı müəllivi bildirir ki, kəmərin ilkin ötürücülük qabiliyyəti ildə 10 milyard kubmetr olacaq, gələcəkdə 20 milyard kubmetrədək artırılması nəzərdə tutulur və layihənin kapital xərcləri 4,5 milyard avrodur.

Müəllifə görə, TAP-ın ən aşağı hissəsi dəniz səviyyəsindən təxminən 820 metr dərinlikdə, ən yüksək hissəsi Albaniya dağlarında 1800 metr hündürlükdən keçir, kəmərin diametri əsasən 48 düymdür, yalnız dənizin altından keçən hissəsində 37 düymlük borular düzülüb.

Müəllifə görə, layihə İtaliyada başa çatsa da təbii qazın gələcəkdə ara keçid boru kəmərləri vasitəsilə İsveçrə, Avstriya, Fransa, Almaniya, Belçika, hətta İngiltərəyə ötürüləcəyinin mümkün olacağı istisna edilmir.

Boşanmaların artmasının səbəbləri nədir?

“Oxu.az” da isə “Həyəcan təbili: Azərbaycanda boşanmaların əsas səbəbi sosial şəbəkələrdir” məqalə oxumaq olar.

Müəllif Azərbaycanda boşanmaların artmasının səbəbləri barədə psixoloq Aytən Ələkbərova ilə söhbətləşir.

“İstər iqtisadi, istər sosial problemlər, istərsə də sosial şəbəkələrin birbaşa müdaxiləsi nəticəsində ailələr dağılır”. Bunu “Oxu.az”a açıqlamasında psixoloq Aytən Ələkbərova 2019-cu il üzrə boşanmaların sayının artmasını şərh edərkən deyib. 

A.Ələkbərovanın deməsinə görə, nə qədər ailə sosial şəbəkələr səbəbindən boşanmaq həddinə çatır və psixoloqlara müraciət edir. 

“Şəxsən mən özüm 29 belə ailəni yenidən bərpa etmişəm”, - A.Ələkbərova söyləyib. 

Psixoloq A.Ələkbərova hesab edir ki, işsizliyin boşanma üçün səbəb gətirilməsi düzgün deyil: 

“İnsan işləmək istəyirsə, haradasa iş tapa bilər. Vacib deyil ki, öz sahəsi ilə bağlı iş olsun. Buna görə də işin olmamasını bəhanə edərək ayrılmaq qərarı vermək yanlışdır”.

Psixoloq işsizliyi əsas gətürərək ailəni dağıdan ailə başçılarına xatırladır ki, hətta işsizlik səbəbindən də ailə dağıdıldıqda övladlara verilməsi üçün aliment ödənişi tələb edilir.

Psixoloq bu məsələdə bir məqamı da yada salır ki, ata alimenti ödəməyəndə məhkəməyə verilir və bu məhkəməyə cəlb edilmə uşaqların gələcəyinə problem yaradır:

“Sabah bu ailədə böyüyən övlad dövlət məmuru olmaq istəyəndə onun qarşısına bu faktı çıxarırlar ki, atan cinayət məsuliyyətinə cəlb edilib”, - psixoloq A.Ələkbərova atalara bu əməllərin pespektivini yada salır.  

Müəllif xatırladır ki, Dövlət Statistika Komitəsinin məlumatına görə, Azərbaycanda 2019-cu ildə boşanmaların sayında artım olub.

Müəllif  rəsmi statistikaya istinadən deyir ki, 2018-ci ildə Azərbaycanda 13 min 655 boşanma olub. 2019-cu ildə isə ölkədə 15 min 635 boşanma qeydə alınıb, bu isə 2018-ci illə müqayisədə çoxdur. 

Bir küçə sakinlərinin məişət qayğıları

“Bizimyol-info.az”da isə “Bakıda yiyəsiz küçə: “Gərək ölüm ola ki, gələsiniz?” sərlövhəli məqalə diqqəti çəkir.

Müəllif Xətai rayonundakı Mirzə Davud küçəsinin sakinlərinin problemlərini gündəmə daşıyır.

Müəllifin deməsinə görə, sakinlər kommunal xərclərini, dövlətə olan vergi borclarını ödəyirlər, amma aidiyyatı qurumlar bu küçədə yaşayanların problemləri ilə maraqlanmırlar.

Müəllif deyir ki, bu küçənin sakinləri piyadalar üçün  nəzərdə tutulan kəsə yoldan Nobel prospektinə keçmək üçün təxminən 15 il öncə qoyulan beton pilləkənlərdən istifadə edirlər. “Həmin pilləkənlərlə üz- üzə 59 saylı orta məktəb yerləşir. Hər gün bu pilləkənlərdən minlərlə şagird və valideyn istifadə edir, bunu nəzərə alsaq nə qədər insanın canının təhlükə qarşısında olduğunu anlamaq olar. Hələ yaşlı qəsəbə sakinlərini demirəm”, - müəllif problemin mahiyyətini anladır.

Müəllifin deməsinə görə, bu pilləkənlərdən istifadə edərkən xəsarət alan küçə sakini isə deyir: “Əlimizə çəkic alıb divara bir mismar vura bilmirik, o saat tökülürlər pul almağa. Bəs problem həll etməyə niyə gəlmirlər. Gərək kimsə ölə, onda gələlər? Dərdimizi sağkən dinləyin də”.

Yazı müəllifinin təsvirinə görə, ətrafı zibilliklə örtülmüş bu pilləkənlər qırıq, çökük vəziyyətdədir, qaranlıqda isə ümumiyyətlə, keçilməz olur, qışda bir balaca yağıntı, buzlanma olanda pilləkənləri qalxmaq problemə dönür, buradan istfadə edən neçə sakin, neçə şagird dəfələrlə yıxılıb xəsarət alıb.

Müəllif sakinlərin sözlərinə istinadən deyir ki, burada bələdiyyə fəaliyyətsizdir, hətta sakinlər bu qurumun üzvlərini belə tanımırlar.

Müəllifin deməsinə görə, sakinlər bu küçədə ancaq JEK-in (MİS) fəaliyyətdə olduğunu bilirlər, amma bu, onların probleminə bağlı məsələ deyil: “O da məktəbdən arayış istəyəndə gedirik, MİS-dəkilər də birillik zibil pulunu almadan o arayışı verməzlər” deyə sakinlər bildirirlər.

Müəllifin deməsinə görə, sakinlər çirkab sularla, kanalizasiya problemləri, bütün məişət problemləri ilə özlərinin məşğul olduğunu iddia edirlər.