Media-icmal 29.1018

Ölkənin iqtisadi, sosial uğurlarının düsturu, əqidəsizlik məsələsi, sürüşmə zonalarında əhainin durumu və s. məsələlər bugünki (29 oktyabr, 2018-ci il) medianın aparıcı mövzularındandır...

"Uğur düsturu: "Söz və əməl vəhdəti"

"Azərbaycan" qəzeti "Sözlə əməlin vəhdəti" sərlövhəli məqalədə Azərbaycanda keçirilən beyənlxalq tədbirlərin əhəmiyyətini və ölkənin iqtisadi-sosial uğurlarının səbəblərini dəyərləndirir.

Müəllif hesab edir ki, artıq elə bir zamanda yaşayırıq ki, dünyanı təhdid edən problemlərin həlli artıq bir ölkənin gücü daxilində deyil: "Bundan ötrü dövlətlərin, cəmiyyətlərin bir araya gəlməsinə, tanınmış görkəmli xadimlərin, alimlərin, dünyanın siyasi, elmi və mədəni elitasının nümayəndələri arasında ardıcıl dialoqların aparılmasına ehtiyac var".

Yazı müəllifi deyir ki, Bakı dünyada artıq dialoq məkanı kimi tanınır və bu günlərdə Bakıda keçirilmiş VI Humanitar Forum da bu tarixi missiyanın davamıdır.

Müəllifə görə, Humanitar Forumun 6-cı dəfə Bakıda keçirilməsi beynəlxalq humanitar əməkdaşlığın dərinləşməsi üçün Azərbaycanın çox əhəmiyyətli ölkə olmasının göstəricisidir.

Məqalə müəllifi deyir ki, həm də Forumda müzakirəyə çıxarılan "Yeni dünya və yeni insan formalaşdıraq: kreativlik və insan inkişafı" mövzusu da dünyanın hazırkı əsas probleminin nədən ibarət olduğunu müəyyən edir.

"Qloballaşan dünyada mövcud təhsil və maarif sistemlərinin təkmilləşdirilməsi, mədəniyyətin və incəsənətin dəstəklənməsi, informasiya təhlükəsizliyinin təminatı, intellektual mülkiyyətin müdafiəsi və digər bu kimi aktual problemlər fonunda bu məsələ xüsusilə müstəsna əhəmiyyət kəsb edir. Əslində, dünyanın inkişafı da elə insanın inkişafından başlanır", deyə müəllif bu mövzuya üstünlük verilməsinin çoxcəhətli olduğunu vurğulayır.

Yazı müəllifi hesab edir ki, forumun məqsədi dünyanın və insanın inkişafının hər kəs üçün ən əlçatan, uyğun yollarını tapıb göstərmək, qlobal çağırışlarla bəşəriyyəti bu doğru səmtə yönəltmək olub.

Müəllif deyir ki, Forumda çıxış edən Prezident İlham Əliyev də Bakıda müxtəlif səpkili beyənlxalq tədbirlərin keçirildiyini vurğulayıb və bu beynəlxalq humanitar əməkdaşlıq formatlarının hər birini bu il 10 illiyi tamamlanan "Bakı prosesi"nin tarixi nailiyyətləri adlandırıb: "Bu siyasət bu gün də davam etdirilir. Azərbaycanda bu istiqamətdə dövlət siyasəti çox səmərəlidir və gözəl nəticələrə gətirib çıxarır... Bizim tarixi, dini abidələrimiz həm qədim tariximizi göstərir, eyni zamanda göstərir ki, Azərbaycan müxtəlif dinlərin nümayəndələri üçün doğma diyar, doğma məkan olmuşdur".

Müəllif vurğulayır ki, dövlət başçısı bütün bu addımların əsas məqsədinin sivilizasiyalararası, dinlərarası dialoqun dərinləşməsi, güclənməsi, dünyada risklərin azalması, ayrı-seçkilik, ksenofobiya hallarına düzgün qiymət verilməsi və bu təhlükəli meyllərin qarşısının alınması olduğunu bildirir.

Müəllif bundan irəli gələrək deyir ki, ölkədə həyata keçirilən beynəlxalq enerji, nəqliyyat layihələri də təkcə maddi maraqlara yox, həm də sabitlik və təhlükəsizlik məqsədlərinə xidmət edir.

Müəllif hesab edir ki, bu qlobal tədbirlərin siyasi, mənəvi, tarixi əhəmiyyəti ilə yanaşı, Azərbaycanı dünyaya tanıtmaq kimi xüsusiyyəti var və ölkəyə gələn tədbir iştirakçıları ölkənin iqtisadi, sosial uğurlarının şahidi olurlar.

Müəllif vurğulayır ki, Prezident İlham Əliyev isə Azərbaycanın qısa müddətdə əldə etdiyi bu uğurların formulunu Rusiyanın TASS İnformasiya Agentliyinə belə şərh edib: "Zənnimcə, qısa şəkildə şərh etsək, millətlərarası, dinlərarası həmrəyliyin bu cür yüksək səviyyəsinə necə nail olmağımız onunla bağlıdır ki, biz bu barədə yalnız danışmırıq, həm də bu istiqamətdə düşünürük və fəaliyyət göstəririk. Əgər dünyada bu cür yanaşma üstünlük təşkil etsə, bu zəmində problem olmayacaq".

Müəllif də son olaraq vurğulayır ki, Azərbaycanın uğur formulu sözlə əməlin vəhdətindədir.

Əqidə "sürüşkənliyi"

"Azadlıq.info"da isə "Demokratik düşərgəyə atılan mənən şikəstlər haqqında" sərlövhəli məqalə oxumaq olar.

Saytda kinorejissor Eldəniz Quliyevin düşüncələrinə yer verilib.

E.Quliyev əqidəsizlik problemini, onun nümunələrini və nəticələrini gündəmin müzakirəsinə daşıyaraq deyir ki, bir sıra adamlar əxlaq və ya mərifətli yaşam tərzinə malik deyil. Kinorejissor daha sonra iddia edir ki, belə bir hal hazırda həbsdə olan keşmiş müstəntiq Rüfət Səfərovla yaşanıb. Müəllifin iddiasına görə, birisi jurnalist adıyla siyasi mәhbus Rüfәt Sәfәrovun kamerasına salınır vә özünü müxalifәt tәәssübkeşi kimi göstәrir, hәtta ondan geniş müsahibәlәr dә götürür.

Müəllifin sözlərinə görə, az sonra mәlum olur ki, hәmin o "jurnalist" ona verilən "tapşırığı" yerinә yetirib və daha sonra tapşırıq verilən idarəyə Rüfәt Sәfәrovun cəzaçəkmə müəssisəsində hökumәt әleyhinә tәbliğat aparması, mәhbusları yoldan çıxarıb etiraza tәhrik etməsi və s. barədə donos yazıb.

Müəllifin iddiasına görə, bunun nəticəsi olaraq, R.Sәfәrov haqsızlıqlara məruz qalır, "karsa salınır" və yalnız məsələ ictimailəşdikdən sonra haqsızlıqlara son qoyulur.

E.Quliyevin sözlərinə görə, bu "xidmət"in nəticəsi olaraq hәmin "jurnalist" bir neçә ay içәrisindә, müəyyən öhdəliklə azadlığa buraxılır.

Müəllif deyir ki, həmin şəxs üçün tәlәm-tәlәsik sayt açılır vә müxalifәtçi imici qazanması üçün "icazәli cәsarәt" işığı yandırılır, yəni, hökumәti istәdiyin qәdәr söy, biabır elә, amma әsas vәzifәni, yәni "xəbərçiliyi"ni unutma.

E.Quliyev hesab edir ki, bu "adamın" kimliyini açmaq o qədər də vacib deyil, vacib olan, təəssüf ki, belələrinin olmasıdır.

Müəllifin sözlərinə görə, bu sayaq mәnәn şikәstlәr nüfuzlu müxalifәtçilərin yan-yörәsindә fırlanır vә yazdıqlarının әksәriyyәti dә hökumәt әleyhinә deyilәn pafoslu şüarlardan, bәzәn dә söyüşlәrdәn ibarәt olur.

Müəllif deyir ki, bəlkə də bu barədə yazmağına dəyməzdi, amma yazmayanda da kiçik fəsadlar sonra böyük problemə dönür, zaman-zaman bunun ziyanı çəkilir.

Son olaraq müəllif bunu da vurğulayır ki, söhbət təkcə hansısa bir-iki "jurnalist"dən getmir, belə qüsurların tədricən böyüyərək təhlükə mənbəyinə çevrilməsindən gedir...

Sürüşmə zonalarında yaşayanlar

"Yeni Müsavat" qəzetində "Badamdarda sakinlər hələ də təhlükəli zonadadır - son durum" sərlövəhli məqalədə müəllif sürüşmə zonasındakı və buradakı sakinlərin vəziyyətini eskpertlərlə müzakirə edir.

Müəllif deyir ki, Badamdar ərazisində aktivliyin davam etməsi artıq ərazidə olan yaşayış evlərinə də birbaşa təhlükə yaradır.

Yazı müəllifi deyir ki, Eologiya və Təbii Sərvətlər Nazirliyi tərəfindən yaradılan qərargah üzvlərinin Badamdar sürüşmə zonasında apardıqları monitorinqin 27 oktyabr açıqlamasına görə, torpaq kütləsinin aşağı axınında artım var.

Müəllifin sözlərinə görə, sürüşmə artıq evlərin hasarlarına yaxınlaşıb və evlərdə yaşayışın davam etməsi isə təhlükəlidir.

Ərazidəki və sürüşməyə ən yaxın məsafədə yerləşən 11 evin sakinlərinin hələ də burada yaşadığını deyən müəllif bu sakinlərin generatorlar vasitəsilə elektrik enerjisi alıb, evlərində yaşamağa davam etdiklərini bildirir.

Müəllifin sözlərinə görə, sürüşmə ilə bağlı Yaponiyadan gələn mütəxəssisin ilkin rəyi də bəlli olub. Yaponiyadan gələn mütəxəssis quyular qazılaraq qrunt sularının üzə çıxarılmasını vacib sayır.

Ekspert Əzim Məsimov isə "Yeni Müsavat"a deyib ki, həmin ərazidə quyuların qazılması heç nəyi dəyişməyəcək, sürüşməyə səbəb kanalizasiya sularıdır, odur ki, kanalizasiya xətti çəkilməlidir.

Müəllif vurğulayır ki, ötən həftə Zığ şossesində də uçqun tipli sürüşmə prosesi baş verib, uçqun zamanı yol kənarına çəkilmiş istinad divarının 30 metr uzunluğunda olan hissəsi uçaraq cənub istiqamətində hərəkət edib.

Müəllifin sözlərinə görə, artıq həmin istinad divarı tamamilə uçurulub və yaxın günlərdə yenisinin inşa ediləcəyi bildirilir.

Müəllifə görə, hazırda ən gərgin və sabahı bilinməyən durumda olan sürüşmə zonası Bayıl yamacıdır.

Müəllif xatırladır ki, keçən ilin qış aylarında Bayıl yamacında "Teleqüllə" ətrafındakı ərazidə sürüşmə hadisəsi baş verib, 4 ev dağılıb, 2-si isə zərər görüb .Əhali isə Badamdardan fərqli olaraq dərhal 11 aylıq müddətə ərazidən köçürülmüşdü. Lakin sakinlər heç də 11 aylıq müddətdə kirayə mənzillərdə qalmadılar. Onlar bir müddət sonra hissə-hissə evlərinə qayıdıb, Bayıl yamacında yaşamağa davam etdilər və indi də yaşamağa davam edirlər.

Müəllifə görə, səbəb də bu idi ki, onlara verilən kirayə pulu ilə Bayılda ev tapmaq mümkün olmayıb. Sakinlər söylədilər ki, onlar gələcək talelərinin necə olacağını bilmirlər. Hələ də onlara evlərinin söküləcəyi, yoxsa geri qaytarılacağı ilə bağlı yekun fikir bildirilməyib.

Burada yaşayan insanların taleyinin necə olacağı məlum deyil, soyuqlar gəlir, həmin evlərdə istilik yoxdur.