![Açiq mənbələrdən foto.](https://turan.az/resized/media/2020/main/113000034910-750-500-resize.webp)
Açiq mənbələrdən foto.
İkinci Qarabağ Müharibəsində Azərbaycan tərəfinin itkilərinin az olmasının səbəbləri, cəmiyyətdə həmrəyliyin qorunmasının zərurəti, Ermənistanın Azərbaycana ödənməsi ehtimal olunan təzminat barədə mülahizələr, 2021-ci il dövlət büdcəsinin bəzi parametləri və s. məsələlər medianın aparıcı mövzuları sırasındadır.
“Azərbaycan” qəzeti “Vətən müharibəsi zamanı əməliyyatların minimum itkilərlə həyata keçirilməsi böyük uğurdur” sərlövhəli məqalədə İkinci Qarabağ Müharibəsində Azərbaycanın hərbi uğurlarını dəyərləndirir.
Məqalədə deyilir ki, bu il sentyabrın 27-dən noyabrın 9-na kimi davam etmiş İkinci Qarabağ Müharibəsndə Azərbaycan Ordusu 5 şəhər, 4 qəsəbə və 286 kəndi işğaldan azad edib.
Ermənistan tərəfi hazırda azad olan, 30 ilə yaxın işğalda olmuş Azərbaycan ərazilərində istehkamlar yaradaraq Azərbaycan Ordusunun ciddi itkilər verəcəyi düşüncəsində idi.
Amma Azərbaycan Ordusu XXI əsrdə döyüş əməliyyatlarını aparmağa imkan verən ən müasir, beşinci nəsil silahlarla təchiz olunmuşdu, vətənpərvərlik ruhu, peşəkarlıq səviyyəsi yüksək idi.
Müəllifə görə, Şuşa şəhərinin azad edilməsi Azərbaycan Ordusunun yüksək döyüş hazırlığının göstəricisi idi: “Şuşa əməliyyatı isə Azərbaycan Ordusunun peşəkarlığını, yüksək səviyyədə hazırlığını və döyüş ruhunu nümayiş etdirib. Sıldırım qayalardan çıxılaraq düşmənlə yaxın döyüşdə qəhrəmanlıq nümunələri göstərilib və Şuşa işğaldan azad edilib”.
Hazırda Azərbaycan Ordusu ən müasir döyüş standartları əsasında hərbi əməliyyatlar aparıb.
Müəllif deyir ki, İkinci Qarabağ Müharibəsində Azərbaycanaın itkiləri az olub, minimum itkilərlə bu əməliyyatların həyata keçirilməsi isə böyük uğurdur.
Azərbaycan Ordusu düşmənə maksimum zərbə endirməklə onu zəiflədib və beləliklə, öz şəxsi heyəti arasında itkilər az olub.
“Yenisabah.az” saytında isə “Millətin ayağından daş kimi asılıb qalmış adamlar...” sərlövhəli məqalədə milli həmrəyliyin qorunub saxlanması dəyərləndirilir.
Buna nümunə kimi sentyabrın 27-dən başlayaraq 44 gün davam etmiş İkinci Qarabağ Müharibəsində yaranmış həmrəylik göstərilir və vurğulanır ki, bu, cəmiyyətin strateji inkişafı, gələcəkdə görüləcək işlərin bünövrəsilə bağlı məsələdir.
Müəllifə görə, İkinci Qarabağ Müharibəsində Azərbaycana təkcə hərbi-siyasi qələbə qazanmadı, həm də millət olaraq özünü ifadə etdi, bu çərçivədə həmrəyliyə tarixdə az rast gəlindiyi iddia edilir, bunun üçün ən əsas məsələ bu birliyi qorumaq hesab edilir: “Hakimiyyət öz işilə məşğul olmalı, cəmiyyətin müxtəlif sosial qatları problemlərə baxışda düzgün meyarlar müəyyən etməlidir. Cəmiyyətdə dialoq müstəvisi olmalıdır... qarşılıqlı təhqirlər, əsassız ittihamlar bir kənara qoyulmalıdır, İnsanlar normal şəkildə öz işlərini görməlidirlər” deyə səbəblər göstərilir.
Məqalədə həmrəyliyin pozulmasının səbəbləri də göstərilir, korrupsiyanın, vəzifədən sui-istifadənin, məmur özbaşınalığının burada xüsusi rol oynadığı vurğulanır.
Eyni zamanda məqalədə deyilir ki, millətin ayağından daş kimi asılıb qalmış yüksək vəzifəli məmurlar var idi ki, onları kənara atdılar, bununla da ölkə strateji hədəflərinə daha ciddi yanaşmağa başladı və buradan geriyə yol yoxdur.
“Redaktor.az” saytı isə “Müharibədə məğlub olan Ermənistan nə qədər ödəyəcək?” sərlövhəli məqalədə Ermənistanın 28 il işğal altında saxladığı Azərbaycan ərazilərinə vurduğu ziyana görə ödəyəcəyi təzminatın həcmi müzakirə edilir.
Məqalədə belə hesab edirlir ki, Ermənistan hakimiyyəti törətdiyi hərbi cinayətlərin dairəsini ya tam təsəvvür edə bilmir, ya da etmək istəmir.
Hazirda erməni işğalında ancaq Laçın rayonu qalır və bu yaşayış məntəqəsi dekabrın 1-də Azərbaycanın nəzarətinə verilməlidir, bundan irəli gələrək erməni tərəfi Kəlbəcər, Ağdam və s. rayonlarda olduğu kimi burada da evlərə, meşələrə, infrastruktura ziyan vururlar.
Məqaləyə görə, bütün əvvəlki oxşar hərbi cinayətlərin araşdırılması göstərir ki, bu ziyanlara görə böyük məbləğdə təzminat tələbi və ödənilməsi ortaya çıxır.
“Dünya Bankının metodologiyasına görə, ziyanın hesablanması əmlak və infrastruktura, insanların həyatını itirməsi və məcburi köçkün həyata yaşaması nəticəsində, iqtisadi nəticələrdən yaranan və insan inkişafına vurulan ziyanlar olmaqla dörd mühüm istiqamət üzrə ziyanın hesablanması həyata keçirilir.
“Bizimyolinfo.az” saytı isə “Millət vəkili gələn ilin dövlət büdcəsi layihəsindəki əsas prioritet istiqamətləri açıqlayıb” sərlövhəli məqalədə 2021-ci ilin dövlət büdcəsinin bəzi parametrləri müzakirə edilir.
Məqalədə 2021-ci ilin büdcə layihəsinin Milli Məclisə təqdim edilməsinin gecikməsinə əsas səbəb kimi ərazilərin işğaldan azad edilməsi ilə bağlı aparılmış müharibə göstərilir.
Bunu Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bildirib.
Deputatın deməsinə görə, dövlət büdcəsində də şəhid ailələri və qazilərin yaşayış səviyyəsinin yüksəldilməsi, onların evlə təmin olunması və müavinət məsələlərində problemlərinin olmaması ilə bağlı olacaq: “İkincisi, büdcədə işğaldan azad edilmiş ərazilərin ilk olaraq minalardan təmizlənməsi ilə bağlı məsələ əksini tapacaq. Üçüncüsü, həmin ərazilərdə infrastruktur layihələrinin həyata keçirilməsi, icra orqanlarının bərpa edilməsi ilə bağlı məsələ də büdcədə nəzərə alınacaq.Eyni zamanda, həmin ərazilərdə kənd təsərrüfatı və digər sahələrin inkişafı məsələsini biz nəzərə almalıyıq”.
Deputat deyir ki, hazırda Qarabağda 1 milyon hektara yaxın yararlı torpaq sahələri var və bu ərazilərə kifayət qədər böyük vəsait lazımdır.
V.Əhmədov deyib ki, gələn ilin büdcə layihəsində hərbçilərlə bağlı məsələyə də xüsusi diqqət yetiriləcək, həmçinin pandemiya ilə bağlı işləməyən insanlar var, büdcədə məsələlər də öz həllini tapacaq”.
Rəy yaz