Media-icmalı 30.04.2018

"Formula-1" yarışlarına fərqli iki baxış, xırda və orta biznesin tənəzzülü bugünkü (30 aprel, 2018-ci il) medianın aparıcı mövzularındandır.

"Formula-1" tamaşaçıları -ölkədə gedən inkişafın şahidləri

"Azərbaycan" qəzeti "Bakıda möhtəşəm "Formula-1" Azərbaycan "Qran-Pri"si başa çatıb. Azərbaycan prezidenti İlham Əliyev "Qran-Pri"nin açılış mərasiminə və final yarışına baxıb" sərlövhəli məqalədə bu yarışların ölkə üçün əhəmiyyətini (http://www.azerbaijan-news.az/index.php?mod=3&id=145899) dəyərləndirir.

Müəllif aprelin 29-da Bakıda "Formula-1" Azərbaycan "Qran-Pri" yarışlarının əsas mərhələsinin başa çatdığını, dövlət başçısı İlham Əliyevin və ailə üzvlərinin bu yarışları izlədiyini bildirir.

Yazı müəllifi deyir ki, dövlət başçısı və birinci xanım Mehriban Əliyeva yarışların idarəetmə mərkəzindəki şəraitlə tanış olublar, prezident İlham Əliyev "Fox Sport" telakanalına müsahibə verərək bu yarışları dünya əhəmiyyətli tədbir adlandırıb, bu yarışlardan hamının həzz aldığını deyib.

Eyni zamanda dövlət başçısı bu yarışlarda kimin qalib gələcəyi ilə bağlı sualı cavablandıraraq deyib ki, bunu bilmir, amma yarışa qatılan hər kəsə qalib olmağı arzu edib və qalib olan hər kəsin burada qəhrəman olacağını söyləyib.

Müəllif Azərbaycanın dövlət himninin səsləndiyini, daha sonra 51 dövrədən ibarət final mərhələsinə start verildiyini vurğulayır.

Məqalədə deyilir ki, final mərhələsində hər birində iki pilot olan on komanda mübarizə aparıb, 30 pilotdan 13-ü finiş xəttinə çatıb, yarışların qalibi məsafəni 1 saat 43 dəqiqəyə başa vuran "Mersedes" komandasının britaniyalı pilotu Luis Hamilton "Qran-Pri"nin qalibi olub.

Yazı müəllifi vurğulayır ki, "Qran-Pri"nin qalibi L.Hamiltona kuboku dövlət başçısı İlham Əliyev təqdim edib.

Müəllif deyir ki, dünyada yarım milyard tamaşaçısı olan "Formula-1" yarışının növbəti dəfə Bakıda keçirilməsi ölkənin beynəlxalq idman uğurlarını əks etdirir.

Müəllif hesab edir ki, bu, həm də son illərdə ölkənin dünyada getdikcə artan nüfuzu, siyasi və iqtisadi uğurların yetərincə olmasından qaynaqlanır.

Müəllif deyir ki, almaniyalı Herman Tilke tərəfindən layihələndirilən şəhər trası Bakının ən qədim hissəsi olan və UNESCO-nun dünya irsi siyahısına daxil edilən İçərişəhər Tarix-Memarlıq Qoruğunun ətrafında dövr edirdi və yarışı izləyən televiziya tamaşaçıları və qonaqlar paytaxtın gözəlliyini görmək imkanı qazanırdılar.

Müəllif vurğulayır ki, qarşıda hələ beynəlxalq yarışların keçiriləcəyi Bakı yenə də dünyanın diqqət mərkəzinə çevrildi, "Formula-1" tamaşaçıları ölkədə gedən inkişaf proseslərinin şahidi oldular.

Xamlıq, yoxsa israf?

"Azadlıq.info" da isə "Nazir oğlu xalqın pullarının havaya sovrulduğunu etiraf etdi" (https://www.azadliq.info/218881.html) sərlövhəli məqalə oxumaq olar.

Müəllif bu qənaətini Bakı Şəhər Halqasının rəhbəri Arif Rəhimovun açıqlamasına istinadən bildirir.

Müəllif vurğulayır ki, A.Rəhimov "Formula-1" Azərbaycan "Qran-Pri" yarışlarının Azərbaycanda keçirilməsinin 2020-ci ildə bitəcəyini söyləyib.

Məqalə müəllifi deyir ki, A.Rəhimov bu yarışların göstərilən müddətdən sonra davam etdirilib-etdirilməməsi barədə qərarı Azərbaycan "Qran Pri" təşkilatçılarının iyun ayında verməli olduqlarını söyləyib: "Belə ki, "Formula-1" Azərbaycan "Qran-Pri"nin Azərbaycanda keçirilməsi 2020-ci ildə bitir. Müqaviləni daha 5 il artırılıb-artırılmamasına təşkilatçılar qərar verməlidir".

Müəllif A.Rəhimova istinadən deyir ki, Azərbaycan tərəfi yarışı keçirə bilmək üçün xərclərin çox olduğunu nəzərə alaraq ödənişləri azaltmaq istəyir.

A.Rəhimov vurğulayıb ki, müqavilə şərtlərini müzakirə edən zaman pul məsələsi danışılan şərtlərdən, sadəcə, biridir.

Müəllif deyir ki, A.Rəhimov pul məsələsilə yanaşı daha bir neçə məsələnin tərəflər arasında müzakirə mövzusu olduğunu bildirib.

Müəllifin deməsinə görə, A.Rəhimov bir tərəfdən "Formula-1" yarışlarının Azərbaycanda keçirilməsinin davamlı olmasını istədiklərini vurğulayıb.

Müəllif deyir ki, bununla yanaşı Bakı Şəhər Halqasının rəhbəri onu da bildirib ki, bu yarışlar üçün lazım olandan daha çox pul ödənildiyini də anlayırlar.

Müəllif vurğulayır ki, A.Rəhimov ona görə də bu məsələdə tərəflərin ortaq məxrəcə gələrək qərar qəbul etməyə çalışdıqlarını söyləyib.

Məqalə müəllifi də məhz A.Rəhimovun bu yarışlara "lazım olandan artıq ödəniş edilməsi" etirafına görə, bu addımı xalqın pullarının havaya sovrulması adlandırır.

Son olaraq müəllif xatırladır ki, Bakı Şəhər Halqasının rəhbəri Arif Rəhimov gənclər və idman naziri Azad Rəhimovun oğludur.

Ölməkdə olan xırda və orta biznes

"Exo" qəzetində isə diqqəti "Açıq desək, hazırda Azərbaycanda xırda və orta biznes ölür..." (http://ru.echo.az/?p=69551) sərlövhəli məqalə cəlb edir.

Müəllif ölkədə orta və xırda biznesin vəziyyətini deputat, iş adamları və iqtisadçılarla müzakirə edir.

Müəllif deyir ki, deputat Rüfət Quliyev gələcək iqtisadi inkişafın iri yox, xırda və orta biznesin əlində olduğunu bildirib: "Hazırda parlamentdə qanun layihəsi müzakirə edilir ki, qanuna əsasən xırda və orta biznes anlayışı ilə yanaşı mikrobiznes kimi anlayış da bura daxil ediləcək".

Deputat deyib ki, hazırda ABŞ, Yaponiya və Avropada ÜDM-in 55%-dən 65%-ə kimi hissəsi xırda və orta biznesin hesabına yaranır, İspaniyada isə bu göstərici 70%-ə qalxır.

Deputat hesab edir ki, həm dövlət başçısının məmurlara müntəzəm olaraq iş adamlarına maneə yaratmamaları tələbi, həm də hökumətin tərkibindəki yeni dəyişikliklər bu sahənin inkişafına səbəb olacaq.

"Açıq danışsaq, hazırda Azərbaycanda xırda və orta biznes ölür. Ən kəskin problem iqtisadiyyatda şəffaflığın olmamasıdır. Bundan əlavə, vergi siyasəti islahat tələb edir. İş adamlarının əksəriyyəti məhz bu səbəblər üzündən ölkəni tərk ediblər. Bizim vətəndaşlar əsasən Gürcüstana gediblər və hətta rəsmi rəqəmlər də təsdiq edir ki, Azərbaycan Gürcüstanın ən iri sərmayə yatırımçısıdır". Bunu isə qəzetə xırda biznesin təmsilçisi Məmməd Osmanov bildirir.

M.Osmanov deyir ki, yeni nazir Mikayıl Cabbarovdan vergi qanunvericiliyi sahəsində ciddi dəyişikliyin olacağı kimi gözləntisi var: "Mən gözləyirdim ki, nazir öncə "Sədərək" və "Binə" bazarlarında qayda-qanun, iş adamlarının gətirdikləri hər məhsula görə sənədin olması məsələsini həll edəcək. Təəssüf ki, bu, olmadı. Azərbaycan pərakəndə ticarətin şəffaf olmasını təmin etməkdən başlamalıdır".

Maliyyə eksperti Fərhad Əmirbəyov isə kredit olmadan bu sahəni inkişaf etdirməyin mümkünsüzlüyünü, kredit almağın isə çətinliyini bildirir.

F.Əmirbəyov deyir ki, müddətindən asılı olaraq kreditlər 11-18 faiz arasında verilir və bu, əlverişsizdir: "Təbii ki, belə faiz dərəcəsi xırda və orta biznesin maliyyə imkanlarına uyğun deyil. Xarici valyuta ilə faiz dərəcəsi manatla müqayisədə aşağıdır, indi bunu heç kim etməz, çünki risk olduqca böyükdür".

F.Əmirbəyov deyir ki, vaxt var idi, ölkə banklarının kredit portfeli 22 milyard manat idi, indi isə 11 milyard 656,1 manatdır, dollara çevirdikdə bu məbləğ iki dəfə də azalır, bu isə kredit protfelinin 5 dəfə azalması deməkdir.

Ekspert hesab edir ki, Mərkəzi Bank manatın məzənnəsini, inflyasiyanı aşağı salmağı hədəfləyib, işsizliyi həll etmək əvəzinə valyuta ehtiyatlarını artırmağı əsas sayır.