Rusiya Ermənistandakı mövqelərini itirməkdən qorxur

Bakı/30.04.18/Turan: Ötən istirahət günləri moskvalı emissarlar Yerevana gələrək baş verən hadisələri araşdırmağa çalışıblar və Ermənistanın Qərbə "yönəlməsinin" mümkünlüyü ilə bağlı narahatlıqlarını bildiriblər.

Eyni zamanda Ermənistan hökumətinin üzvləri Moskvaya səfər ediblər, XİN-də və digər qurumlarda danışıqlar aparıblar. Kremldəkilər Serj Sarkisyanın komandasını hakimiyyətdə saxlamağın mümkün olmadığını başa düşərək siyasi rejimin dəyişməsi, yəni Respublika Partiyasının hakimiyyəti itirməsi təhlükəsinin olduğunu dərk ediblər.

Dövlət Dumasının deputatı və keçmiş SSRİ-nin keçmiş baş naziri Nikolay Rıjkov Yerevanda etirazçıların lideri Nikol Paşinyanı "ağıldankəm" adlandırıb və ona belə sərbəstlik verdiklərinə görə erməniləri utandırıb.

Digər rusiyalı deputat Konstantin Zatulin fikrini daha açıq ifadə edib: "Əgər Ermənistanın yeni hakimiyyəti Rusiya ilə əldə olunmuş razılaşmalardan imtina edərsə Moskva "de-yure" münasibətindən "de-fakto" münasibətinə keçəcək". Zatulin işarə edib ki, Ermənistan rusiyapərəst mövqeyini dəyişərsə Moskva onu dəstəkləməyəcək.

Nəhayət, Kremlin nəzarətində olan Rusiya telekanalları daha konkret fikir yürüdərək bildiriblər ki, Ermənistan Gümrüdəki Rusiya hərbi bazasını pulsuz saxlamaqda davam etməli, KTMT və Gömrük İttifaqında qalmalıdır. Ermənistanın hakim Respublika Partiyası Moskvaya məhz buna görə zəmanət vermişdi.

Görünür, dəyişiklik yaxındadır və parlamentin iki fraksiyası - Daşnaksütyun və Sarukyan bloku Nikol Paşinyanı dəstəklədiklərini bəyan ediblər.

Mayın 1-də baş nazir seçkisi olacaq. Respublika Partiyasının 58 yer, Sarukyan blokundan 31 deputat, Paşinyanın tərəfdarlarının "Yelk" blokundan 9 deputat, Daşnaksütyundan 7 deputat qatılacaq.

Baş nazir seçkisi sadə səs çoxluğu, 105 deputatın səsilə seçiləcək. Hazırda 47 deputat Paşinyana səs verməyə hazırdır. Ancaq ona minimum 53 səs lazımdır.

Öz namizədliyini irəli sürməyən respublikaçılar Paşinyanı dəstəkləmək istəmirlər.

Əgər baş nazir seçilməsə parlament buraxılmalı olacaq. Lakin konstitusiyaya görə, yeni seçkiləri Respublika Partiyası keçirə bilər. Məhz buna görə də etirazçılar hakimiyyətin tam dəyişdirilməsini tələb edirlər ki, Respublika Partiyası öz məğlubiyyətini etiraf edərək mövqelərini təhvil versin.

Görünür, Serj Sarkisyanın tərəfdarları hakimiyyəti saxlaya bilməyəcəklər və təhlükəsizliyə zəmanətin müqabilində mitinqçilərə güzəştə gedəcəklər.

Bu fonda Ermənistanın gələcək yeni hökumətinin xarici siyasət məsələsi, ilk növbədə Azərbaycan və Türkiyə ilə münasibətlər əsas intriqa olaraq qalır.

Paşinyan hər vəchlə Qarabağ nizamlanması məsələsindən yan keçir. Bundan öncə də onun bu məsələ ilə bağlı təkcə onun hökumətinin taleyində yox, eləcə də Ermənistanın həyatında əsas rol oynaya biləcək xüsusi proqramı olmayıb.

Hələlik Paşinyan heç bir geosiyasi dəyişikliyin olmayacağı barədə bəyanatlar verməklə kifayətlənib. Lakin bu məsələdən qaçmaq ona müyəssər olmayacaq və yaxın vaxtlarda bu, Paşinyanın komandası üçün çox mühüm məsələyə çevriləcək. -02D-