Media-Monitorinq 02.03.2016

Rəsmi qəzetlər dövlət başçısı İlham Əliyevin qəbulları, Heydər Əliyev Fondunun rəhbəri, deputat Mehriban Əliyevaya ANS-in “İlin adamı” mükafatının təqdimatı  haqda yazır. Müstəqil və multimedia ölkənin sosial, iqtisadi, maliyyə həyatı ilə bağlı mövzuları diqqətdə saxlayırlar.   

“Azərbaycan” qəzeti “Cənub Qaz Dəhlizi” layihəsini “XXI əsrin tarixi layihəsi” adlandırır və bu məsələ ilə bağlı Bakıda keçirilən tədbirin bütün dünya üçün əhəmiyyətli olduğunu vurğulayır.

Belə addımlar üçüncü devalvasiyanı qaçılmaz edir.

“Banklar dollar hərraclarında iştirak etmədikləri üçün tələbatın  100% yerinə yetirilməsi haqda Mərkəzi Bankın bəyanatı reallığa uyğun deyil”. Bunu iqtisadçı Nemət Əliyev “Azadlıq” qəzetinə bildirir. Ekspert bu tipli bəyanatlarla Mərkəzi Bankın ölkədə manat qıtlığı yaratdığını bildirir.  “Mərkəzi Bankın atdığı belə məsuliyyətsiz addımlar böyük fəsad törədəcək və bununla bağlı izahat verməyə məcbur olacaq”. N.Əliyev bu  addımın sonunda Mərkəzi Bankın üzləşəcəyi aqibəti xatırladır.

Ekspert 2015-vi ilin 21 dekabr devalvasiyasından sonra vətəndaşın üzərinə 5 milyard vəsaitin qoyulduğunu deyir. Ekspertlərə görə, ixrac artmadıqca ölkədən kapital axını dayanmayacaq. “Amma hökumət bu yöndə addım atmır, ona görə də bu durum üçüncü devalvasiyanı qaçılmaz edir” deyən ekspert bütünlükdə ölkəni gözləyən neqativ prosesin anonsunu verir.

Dayəyə tələbat var, amma necə dayəyə…

“Azərbaycanda dayələrə tələbat var, amma onların fəaliyyətinə qanun nəzarət edə və tənzimləyə bilmir. Bu gün dayələr, repetitorlar, ev işləri köməkçiləri dövlətə vergi ödəmirlər və ona görə də onlara ildə bir dəfə patent verilməlidir”. QHT rəhbəri Nəriman Ağayev bunu “Exo” qəzetinə bidlirib.

Bu sırada N.Ağayev bu günlərdə Moskvada dayənin azyaşlı uşağı qətlə yetirməsini xatırladaraq dayələrə tələblərin yüksəldilməsini təklif edib. “Dayələrin uşaqları döyməsi, onlara işgəncə verməsi kimi hallar haqda dəfələrlə məlumatlar ortaya çıxıb. Ona görə də qanunvericilik səviyyəsində elə olmalıdır ki, onlar işə başlamazdan öncə psixoloji  yoxlamadan keçsinlər, məhz insanın psixoloji durumunun onun uşaqlarla ünsiyyət  qurmasına adekvat olub- olmadığını müəyyən edir”. N.Ağayev belə yanaşmanı daha zəmanətli sayır.

“Novoye Vremya” qəzeti  parlamentə hesabat verilməsi gözlənilən ərəfədə hökuməti fəaliyyətsizlikdə tənqid edir.

“Ölkənin hətta taleyüklü məsələlərini belə müzakirə etməyi sevməyən bir parlamentdə yüksək vəzifəli məmurların çıxışları lazımdırmı? Bu hesabatlar formal xarakter daşıyır. Təbii ki, ölkəni yeni imtahanlarla üz-üzə qoyan iqtisadi böhran bu mövzunu aktuallaşdırb”,  - qəzet belə yazır.

Daha sonra məqalədə böhrandan çıxmaq üçün hökumətə günümüzün prioritet məsələləri xatırladılır: “Nazirlər Kabineti unutmamalıdır ki, postneft erası başlayıb və neft dolları olmadan yaşamaq imkanları axtarılmalıdır. Bunu təsadüfən yada salmırııq, çünki, hökumətin bir çox üzvləri tezliklə neftin qiymətinin qalxacağı və bununla da iqtisadiyyatdakı problemlərin aradan qalxacağı illüziyası ilə yaşamaqda davam edirlər. İqtisadiyyatın sözdə yox, əməldə diversifikasiya

edilməsi prioritet məsələdir . Hökumətin birinci dərəcəli vəzifəsi isə qeyri-neft sektorunun inkişafına şərait yaratmaqdır”. Qəzet bunu hökumətin görəcəyi işlərlə bağlı xatırladır.

Məntiqsizlik hansı “məntiq”dən doğur

“Burada hava limanı tikintisi heç bir məntiqə sığmır və iqtisadi əsaslandırması yoxdur”. Ekspert Natiq Cəfərli “Bizim yol”a bu açıqlamanı Qubada aeroport tikintisinin gözləntilərilə bağlı deyib.

Hazırda tikintisi aparilmasa da hava limanı Davudoba, Hacıqayıb, Ərməkiqışlaq Dəlləkli, Ağbil və Vladimirovka kəndlərinin təxminən  600 hektarlıq ərazisini əhatə edir. Ötən il tikinti üçün ilkin addımlar atılıb. Dəqiq ərazilər müəyyənləşib və bəzi yerlərə beton tökülüb.

Sakinlər aeroportun bölgə üçün böyük fayda gətirəcəyi fikrindədirlər.

Ekspertlər isə bunun tam əksini düşünürlər. "Orada hava alanının tikintisi heç bir məntiqə sığmır". Bunu ekspert Natiq Cəfərli bildirir. Onun fikrincə, turist cəlb etmək üçün aeroport məsələsi bir nömrəli məsələ olsa idi bu gün Lənkərana, Qəbələyə, Gəncəyə, Zaqatalaya və yaxud da Naxçıvana minlərlə turist gəlməli idi.

“ Yaxşı bəs niyə gəlmir? Lənkəran hava limanı niyə bu gün işləmir? Həftədə cəmi bir reys var. O da Moskvaya. Bakıdan Lənkərana belə reyslər ləğv olunub. Qəbələ aeroportu demək olar ki, işləmir”. Bununla da faktları ortaya qoyur. N.Cəfərli Quba kimi bir regionda meyvə bağlarını inkişaf etdirməkdənsə kənd təsərrüfatına investisiya qoymağı Rusiya bazarına vacib sayır.

Tarixi Sovetski”nin tarixə dönəcək bayram tonqalları

Dünən Bakı dörd Novruz çərşənbəsindən ikincisi olan Od çərşənbəsini qeyd edib. “Yeni Müsavat” qəzeti çərşənbənin qeyd olunmasını indi yarımuçulu halında olan Bakının tarixi “Sovetski” məhəlləsində müşahidə edib. Qəzet bunu sakinlərinin köçəcəyi üçün bu tonqalları “Sovetski”nin sonuncu od çərşənbəsi ” adlandırır.

“Məhəllədə əvvəlki ab-hava olmasa da Novruz tonqalı ucalırdı. Lakin “Sovetski” digər məhəllələrdən fərqli olaraq bu il taxta baxımından korluq çəkmirdi. Sökülmüş evlərin taxta materialları məhəllə meydanına toplanmışdı. Hər tonqalın ətrafına 50-yə yaxın sakin toplanmışdı. Bakının ən böyük tonqalı

“Sovetski”də idi desək yanılmarıq”. Müəllif günümüzün yarımuçulu “Sovetski” məhəlləsində çərşənbənin bu fonda  qeyd edildiyini nəzərə çatdırır. 

Sakinlər bu tonqalları “Sovetski”də yanan son tonqal adlandırırlar. Ona görə də bayramın gəlişinə sevinsələr də bir-birlərindən uzaq düşəcəklərinə də bir o qədər qəmlənirlər.