Media-Monitorinq 10.03.2016

Rəsmi qəzetlər rəsmi  qəbullar haqda yazır. Ölkə həyatında mövcud olan problemlər isə müstəqil medianın aparıcı mövzusu kimi gündəmdədir.

Bu tədbirlər görüntü üçündür

“Hər dəfə ölkəmizdə Forum keçiriləndə hökumətin təbliğatı “fontan vurur, hökumət mətbuatı, telekanalları bəh-bəhlə təqdimat verirlər”. “Azadlıq” qəzetindəki “Sabiqlərin Bakı Forumu Azərbaycana nə verib” sərlövhəli müəllif yazısında bu gün başlayacaq IV Bakı Qlobal Forumu belə dəyərləndirilir.

Müəllif rəsmi Bakının dünyaya inteqrasiyada maraqlı olmadığı üçün bu tədbirlərin hər hansı müsbət nəticəsi olmayacağını bildirir. Yazıda əsasən keçmiş siyasi liderlərin bu tədbirlərə qatılmalarına “bir-iki günlük yemək- içmək məclisinin qurulması” prizmasından baxılır.

“Əminliklə demək olar ki, bu tədbirlər görüntü yaratmaq üçündür, hökumət göstərmək istəyir ki, qlobal problemlərin həlli Azərbaycanda müzakirə edilir, reallıq isə budur ki, Azərbaycan çoxqütblü dünyadan kənarda qalıb”, - müəllif foruma münasibətini ifadə edir.

F.Mustafa: “Bu layihəyə qarşı çıxacağam”

“Avropa İnsan Haqları Məhkəməsi qərarlarından imtina ilə bağlı qanun layihəsi müzakirəyə çıxarılsa ona qarşı çıxacağam”. Deputat Fazil Mustafa bunu həmkarı Rafael Cəbrayılovun müəllifi olduğu qanun layihəsini “Yeni Müsavat” qəzetinə şərhində deyib.

“Əlbəttə, bu, Azərbaycan-Qərb münasibətlətini gərginləşdirə bilər. Çox yanlış yoldur. Rusiyaya sanksiya tətbiq olunub, ciddi problemləri var. Ona görə də Rusiya beynəlxalq qərarları qəbul etməklə belə addım atıb. Bu addımın özü də beynəlxalq hüquq normalarına ziddir”, - F.Mustafa fikirlərini davam etdirib.

F.Mustafa Rusiyanın yedəyində Azərbaycanın da belə addımlar atmağa çalışmasının ölkəyə xoşagələn perspektiv vəd etmədiyini deyir.

“Düşünürəm ki, bu, təhlükəli yol seçməkdir. Durduğumuz yerdə Avropa qurumları ilə müharibə vəziyyətinə gəlirik. Məncə, ölkənin dövlət maraqları bunu tələb etmir ki, belə təhlükəli yol seçək. Bu yol seçilərsə Avropa qurumları ilə əməkdaşlığa son qoyula bilər.

Qanun layihəsi müzakirəyə çıxarılsa kəskin şəkildə etiraz edəcəyəm. Əvvəlcədən də bildirmişəm ki, belə bir layihə olsa əleyhinə səs verəcəyəm”, - depuatat mövqeyini birmənalı bildirib.     

Ekspert Nəriman Ağayev: “İxracın enməsi iflasdır” 

“Əgər ixrac enərsə o zaman iqtisadi iflasdan qaça bilməyəcəyik. Bizim əsas bazar Rusiya bazarıdır. Bu bazarda hazırda xarici mala, o cümlədən Azərbaycan malına tələbatın endiyini görürük. Bu, təkcə ərzağa aid deyil, valyuta kursunun dəyişməsi bu məsələdə böyük rol oynayıb”, - ekspert Nəriman Ağayev ölkənin xarici ticarət sahəsindəki durumu “Exo” qəzetinə belə dəyərləndirib.

Çıxış yolu kimi yeni bazarların əldə edilməsini göstərən ekspert ötən illərlə müqayisədə bu il bazar uğrunda mübarizənin heç də asan olmayacağını vurğulayır.

Daha sonra qeyri-neft sahəsində müsbət meylləri nəzərə çatdıran N.Ağayev ölkənin itcarət dövriyyəsi strukturunda MDB ölkələrilə ticarət dövryyəsinin 9,6%, Avropa Birliyi ölkələrilə 48,2%, digər ölkələrlə isə 42,2% təşkil etməsini göstərib.

“Dünya siyasətçiləri xammal və maliyyə bazarlarındakı təlatümlərin yaratdığı iqtisadi artımın azalmasına və yeni təhlükələrə qarşı təcili tədbirlər görməlidir. İndi iqtisadi fəallığı qəti şəkildə dəstəkləmək və dünya iqtisadiyyatında “daha sabit yer tutmağı təmin etmək lazımdır”, - ekspert indiki halda konkret hansı istiqamətin xarici ticarətdə öndə yer aldığını göstərir.  

Müstəqil vəkillik institutu sıradan çıxarılır 

Yalnız Vəkillər Kollegiyasının üzvü olan şəxs vəkil kimi fəaliyyət göstərə bilər və bu məsələ Cinayət Prosessual Məcəlləsinə edilən dəyişiklikdə əksini tapır. Bu müzakirəni isə “Bizim yol” qəzeti açıb.

“Hüquqşünaslar bu müddəanı müdafiə sektorunun inhisara alınması, Vəkillər Kollegiyasının sədri Azər Tağıyevin özünə “bazar” yaratması ilə əlaqələndirirlər”. Qəzet belə yazır.

Tanınmış vəkil Qurban Məmmədov bunu müdafiə sektorunun Vəkillər Kollegiyasının sədri Azər Tağıyevin inhisarına verilməsi kimi şərh edir, həm də vətəndaşın konstitusiya ilə təsbit edilən müdafiə hüququnun kobud şəkildə pozulması adlandırır.

“Məqsəd Azərbaycanda insanları müdafiəsiz qoymaqdır”. Bu fikri isə ölkənin tanınmış vəkillərindən biri Aslan İsmayılov ifadə edib. A.İsmayılov müstəqil vəkillərin sıxışdırılması səbəbindən minə yaxın insana hüquqi yardım etmək imkanında olmadıqlarını da nəzərə çatdırıb.