Məhkəmə 6 may etiraz aksiyasında saxlanılanların hamısını cəzalandırdı (YENİLƏNİB)

Nəsimi rayon məhkəməsində mayın 6-da NİDA fəalları barəsində hökmə qarşı etiraz aksiyasında saxlanılanlara qarşı inzibati işə baxılması başa çatıb.

Günün birinci yarısında məhkəmə Azərbaycan Xalq Cəbhəsi Partiyasının fəalı Kəmalə Bənənyarlını 20 sutka, Müsavat Partiyasının üzvləri Tural Abbaslı və Orxan Eyyubzadəni, NİDA fəalı Səfi Səfiyevi və “Dalğa” təşkilatının üzvü Hacı Zeynallını 15 sutka inzibati həbs cəzasına məhkum edib.

Eyni ittihamla daha 10 nəfər cərimə olunub. Xüsusən, AXCP fəalı Toğrul İbrahim 600 manat, Müsavat üzvü Şamil Beydullayev və AXCP fəalı Kamran Zeynalov hər biri 500 manat, Nicat Məmmədbəyli (NİDA üzvü), Türkel Əlisoy (AXCP üzvü), Orxan Rüstəmzadə (“Azad Gənclik” hərəkatının üzvü), Rəhman Məmmədli (NİDA üzvü), Rəsul Mürsəlov (AXCP üzvü) hər biri 400 manat, Füzuli Ovçuyev (AXCP üzvü) 300 manat cərimə olunub.

Daha üç gənc fəala – Turan İbrahim, Orxan Rza və Hüseyn Qarasuluya xəbərdarlıq edilib.

Bütün sözügedən şəxslər kiçik xuliqanlıqda və ya polisə tabe olmamaqda təqsirli biliniblər.

AXCP sədr müavini Fuad Qəhrəmanlının sözlərinə görə, 20 sutka həbs cəzası almış Kəmalə Bənənyarlı Nəsimi rayon polis şöbəsində işgəncələrə məruz qalıb. -1606D-

2014 May 07 (Çərşənbə) 14:15:16

Mayın 7-də Nəsimi Rayon Məhkəməsi NİDA fəallarına oxunan hökmə etiraz olaraq keçirilən aksiyanın iştirakçılarını inzibati qaydada həbs edib.

Tural Abbaslı, Kəmalə Bənənyarlı, Orxan Eyyubzadə, Hacı Zeynallı və Şəfi Şəfiyev 15-20 sutkalığa həbs olunublar.

Toğrul İbrahim, Türkel Əlisoy, Orxan Rüstəmzadə 400-600 manat cərimə olunublar.

Cəmi 17 nəfər saxlanılıb. Digərlərinin taleyi hələlik məlum deyil. Saxlanılanların vəkilləri yoxdur. Onlar  NİDA, “Dalğa”, “Azad gənclik” hərəkatlarının, Müsavat və Xalq Cəbhəsi partiyalarının üzvləridir.

Qeyd edək ki, dünən olduğu kimi, bu gün də polis aksiya iştirakçılarının həbsini işıqlandıran jurnalistləri amansızcasına dağıdıb. Müstəqil və müxalifətyönlü KİV-in bir neçə nümayəndəsi zorakılığa məruz qalıb.-16В-

2014 May 07 (Çərşənbə) 12:01:19

Mayın 6-da NİDA hərəkatının fəallarına oxunan hökmə etiraz olaraq keçirilən aksiyanın 15 iştirakçısı Nəsimi Rayon Məhkəməsinə çıxacaq.

Məhkəmə binası polis və mülki geyimli şəxslər tərəfindən əhatəyə alınıb. Onlar jurnalistlərə və fəallara təzyiq göstərərək onları içəri buraxmırlar. Bu barədə Müsavat Partiyası Gənclər Təşkilatının üzvü Rüfət Hacıbəyli məlumat verib.

“Obyektiv TV”nin jurnalisti Hüseyn Əzizoğlu mülki geyimli şəxslər tərəfindən döyülüb. Onun kamerası və eynəyi sındırılıb.

Bu gün Tural Abbaslı, Şamil Beydulla, Orxan Eyyubzadə, Türkel Azərtürk, Kəmalə Bənənyarlı, Toğrul  İbrahim, Füzuli Ovçuyev, Nicat Məmmədbəyli, Şəfi Şəfiyev, Kamran Zeynalov, Rəhman Məmmədli, Turan İbrahim, Orxan Rüstəmzadə, Rəsul Mürsəlov, Hüseyn Qarasulu məhkəmə qarşısında dayanacaqlar.

Onlar AXCP, Müsavat Partiyası və NİDA hərəkatının üzvləridir.—16D-