Naxçıvan sakini milli ayrı-seçkiliyə məruz qaldığını iddia edir

Naxçıvanın məşhur Nehrəm kəndində sahibkar və torpaq mülkiyyətçiləri rəsmi icra qurumlarının özbaşınalıqlarından şikayət edirlər.

Kənd sakini Vəfadar Eyvazov həyətyanı sahəsini suvara bilmədiyini, anası rus millətindən olduğu üçün məmurların özbaşınalığı ilə üz-üzə qaldığını iddia edir. Onun sözlərinə görə, Rusiyanın Krımı işğalından sonra ailələrinə qarşı ayrı-seçkilik  göstərilir. V.Eyvazov “rədd olun, gedin, taxılınızı Rusiyada əkin, orada sizə hər şey verərlər, sizin taxılınıza ehtiyac yoxdur”, - deyə Nehrəm Sudan İstifadə edənlər birliyinin sədri Cəmşid Həsənov tərəfindən təhqirə məruz qaldıqlarını bildirir.

V.Eyvazovun fikrincə, belə həssas dönəmdə milli ayrı-seçkilik salınması “durumu gərginləşdirmək və təxribatdır”. Bununla bağlı Naxçıvan Ali Məclisinə müraciət etsə də, cavab verilməyib. Bundan sonra kənd sakini məsələni mətbuat vasitəsilə ictimailəşdərərə,k ümidini Bakıya və Rusiyanın Azərbaycan səfirliyinə bağladığını bildirib. “Tezliklə bu özbaşınalıq aradan qaldırılmasa, Rusiya dövlətinə ailəmizə sahib çıxmaqdan, Rusiya vətəndaşlığını qəbul etməkdən başqa çıxış yolumuz qalmır”, - deyə V.Eyvazov durumlarının ağır olduğunu vurğulayıb.

Bir müddət əvvəl də Nehrəm kəndində sahibkarlar və torpaq mülkiyyətçiləri C.Həsənovdan şikayət edərək ictimai müqavimət göstəriblər. Kənd sakinləri Nehrəm Sudan İstifadə edənlər Birliyinin sədri C.Həsənova etimadsızlıq göstərərək, yeni sədr seçmək istəsələr də, polis təzyiqilə üzləşiblər.

Məsələyə aydınlıq gətirmək üçün Babək rayon icra hakimiyyətinin kənd təsərrüfatı ilə əlaqəli məsul şəxsi Abbas adlı şəxs burada hər-hansı qərəzin olmadığını deyib. Torpaqların növbə ilə suvarıldığını nəzərə çatdırıb. -05B-