Mətbuat icmalı

Qəzetlərin baş səhifələri müxtəlif mövzulardan danışır. Rəsmi qəzetlər ənənəsinə sadiqdir və baş məqalə yerində prezident İlham Əliyevin qəbullarından məlumatlar və fotolar dərc ediblər.

 Digər qəzetlər isə baş məqalə yerində Avropa Şurasının dəstəyi ilə Bakıda keçirilən insan hüquqları konfransı, oliqarxların fəaliyyəti, korrupsiya halları, Moskvada Azərbaycanın Dağlıq Qarabağ regionundan olan erməni əsilli vətəndaşlara saxta pasport verilməsi, Azərbaycan hakimiyyətində Rusiya və qərb tərəfdaşlarının münasibətləri, məcburi köçkünlərə saxta yolla mənzil verilməsi ilə bağlı yazıları dərc edib.  

Rəsmi “Azərbaycan”, “Xaılq” və “Respublika” qəzetlərinin səhifələri Azərbaycan haqqında tərifləri əks etdirən məqalə və məlumatları dərc edib. “Respublika” qəzetindəki “Nefçala: sosial-iqtisadi inkişaf hər sahədə özünü göstərir”, “Azərbaycan” qəzetində “Vətənpərvər nəsil yetişir”, “Xalq” qəzetində “Azərbaycan xalqının 6 il bundan əvvəl etimad göstərməsi Heydər Əliyev siyasi kursunun qələbəsi idi” və s. məqalələri buna aid etmək olar.   

Rəsmi qəzetlərin xarici xəbərlər blokuna gəlincə, Rusiya ilə bağlı “Sergey Lavrov: Rusiyanı təcrid etmək mümkün deyil” başlıqlı xəbər dərc etsələr də, Qərblə bağlı “Almaniyada qaz kəmərində güclü partlayış baş verib”, “Xoruz döyüşdürən şahzadə”, “ABŞ-da gəlir azalıb”, “ABŞ-da təyyarə ilə vertolyot toqquşdu” və s. bu kimi tipli məlumatları dərc edib. “Azərbaycan” və “Xalq” qəzetləri sanki Qərblə bağlı daha önəmli xəbər tapa bilmədiklərindən ABŞ-da təyyarə ilə vertolyotun toqquşmasına hər ikisi səhifəsində yer ayırıb.

Azadlıq

AXCP sədri Əli Kərimlinin “Hakimiyyət imitasiya mərhələsinə qayıtmağa məcbur olub” məqaləsi dərc edilib.

“Hakimiyyət daxilində “Rusiya-qərb savaşı” məqaləsində deyilir ki, İlham Əliyevin Qərbdən gözlənilən sanksiya qorxusu qərblə işləyən tərəfin təşəbbüsü ələ almasına səbəb olub. Hakimiyyətdə böyük güc olan ruspərəstlərin yenidən küncə sıxışdırılması üçün  müəyyən addımlar atırlar.

Qəzet hazırda həbsdə olan hüquq müdafiəçisi Leyla Yunusun alimlik dərəcəsinin ləğv ediləcəyini yazır. Bu barədə Haqqın.az saytına AMEA-nin Tarix İnstitutunun direktor müavini Cəbi Bəhramov deyib. Tarixçi- alim Cəmil Həsənli isə deyib ki, Leyla Yunusun dissertasiyasını Azərbaycan deyil, keçmiş SSRİ Nazirlər kabineti yanında Attestasiya Komissiyası təsdiq edib. “Yunusun əsəri plagiat deyil, parlaq müdafiədir”.

“Milyonları gizlədən və aşkar edən deputatlar” yazısı bizneslə məşğul olan çoxsaylı deputatdan bəhs edir.

“Cənab Komissar, münasibət bildirin”  məqaləsində bu günlərdə prezident Əliyevin əfv sərəncamını alqışlayan Avropa İnsan Haqları Komissarının və digərlərinin alqışlamasına qarşıdır. “4 nəfər siyasi məhbusun əfvi, 100 siyasi məhbusun həbsinə bəraət qazandıra bilməz”.   

Qəzet Müsavat Partiyasında qurultaydan sonra baş verənlərlə bağlı da iki yazı dərc edib.

Yeni Müsavat

“Siyasi açılımlar üçün yaradılan təşkilatın üzvləri danışıd-məqsəd” məqaləsi insan hüquqları problemləri üzrə birgə qrupun təsisçiləri danışır.  Qrupun üzvləri dekabrın 31-də yeni əfv olacağına ümid edir.

Müsavat Partiyasının başqanı Arif Hacılı müsahibəsində bildirir ki, bu gün Müsavat Məclisində boş yerlərə seçkilər keçiriləcək.  “Müsavat Partiyasında strukturlaşma başa çatdıqdan sonra Azərbaycan müxalifət qüvvələrinin birgə fəaliyyətinə nail olmaq üçün növbəti bir cəhd etmək niyyətindəyəm”, o qeyd edib.

Qəzet politoloq Zəfər Quliyevin “Putin ən azı 50 il gecikib” başlıqlı yazısını dərc edib. “Putin Çar və ya Sovet imperiyasını yeni formatda bərpa etmək kimi özünün sayıqlama-ideyası ilə böyük “islam xilafəti” yaratmaq kimi irreal ideya ilə yaşayan İŞİD liderlərini xatırladır”, politoloq qeyd edir.

“Şeyxə qarşı gizli hücum –Paşazadələri bitirmək istəyirlər” məqaləsində deyilir ki, ölkənin baş ruhanisinin mövqeyi zəiflədilir, şeyxülislama qarşı hücumun arxasında biznes maraqları da var.

“Moskvada Qarabağ ermənilərinə saxta pasportlar paylanır” məqaləsi Kremlin Bakıya qondarma qurumu tanıma hədəsi kimi qiymətləndirlir.  Separatçlı Dağlıq Qarabağın erməni sakinləri Rusiyanın rəsmi qurumlarından “Dağlıq Qarabağ dövləti” adına kimlik sənədi, sürücülük vəsiqəsi və başqa sənədlər ala bilir. Qəzet Rusiyada verilmiş bir sürücülük vəsiqəsinin fotosunu da dərc edib.

  “İŞİD-ə Azərbaycanın şimal bölgəsindən qoşulanlar niyə çoxdur?” məqaləsində bu bölgədən İraqda və Suriyada İŞİD tərəfində döyüşənlərdən bəhs edir.

Qəzet kommunikasiya sistemlərinin qışa hazırlıq vəziyyəti və Göyçayda korrupsiya ilə bağlı da yazılar dərc edib.

Bizim Yol

“Hökumətin təzyiqlərə dözmək fikri yoxdur”  yazısında Dövlət Neft Fondunun prezidenti Şahmar Mövsümov Azərbaycanın mədən Sənayesində Şəffaflıq Təşəbbüsünü bu qurumu tərk edəcəyi ilə hədələyib.

Bakıda daşınmaz əmlak ucuzlaşmağa başlayıb. Qəzet bunu neftin qiymətinin dünya bazarında ucuzlaşması ilə əlaqələndirir.

“Oliqarx qardaşlar haqqında növbəti şok ittihamlar” yazısı Xaricdə Yaşayanlarla İş üzrə Dövlət Komitəsinin sədri Nazim İbrahimov və onun qardaşlarının qazandığı qanunsuz vəsaitlərdən bəhs edir.

Ekspress

Həccdən gələn Sumqayıt şəhər sakini “Ebola” xəstəliyi ilə bağlı müayinədən keçmək üçün müraciət edib.

Beynəlxalq humanitar təşkilatların Azərbaycanda fəliyyəti” məqaləsi bu təşkilatların qaçqın və məcburi köçkünlərə yardımlarından danışır.