Mətbuat-Monitorinq 07.05.14

Rəsmi qəzetlər dövlət başçısı İlham Əliyevin Gürcüstana işgüzar səfəri, burada Gürcüstan və Türkiyə dövlət başçıları ilə görüşü haqda xəbərləri ilk səhifələrə yerləşdiriblər.

“Azadlıq” qəzeti “NİDA”çı gənclərin barəsində məhkəmənin uzunmüddətli həbs cəzası qərarı çıxarmasını “gənclərə amansız hökm” adlandıraraq ilk səhifəyə çəkib. Qanunsuz həbslərinə etiraz olaraq aclıq aksiyası keçirən “NİDA”çı gənclər onlarla bağlı məhkəmənin həbs qərarına “aclığı dayandırırıq, mübarizəmiz isə davam edir” bəyanatını yayıblar. Ölkənin vətəndaş cəmiyyəti institutlarının təmsilçiləri “NİDA”çılarla bağlı həbs cəzasını “hakimiyyətin gənclərə qəddar davranışı”, “Azərbaycanda avtoritar, diktatura rejiminin əyani təsdiqi” sayıblar.

Rəsmi Bakının daha yüksək səviyyəli saziş tələb edərək Avropa İttifaqı ilə assosiasiya sazişini imzalamaqdan imtina etməsini ekspertlər “Azərbaycanın Aİ ilə əməkdaşlıqdan yayınması” hesab ediblər.

Hərbi Dəniz Qüvvələrinin keçmiş komandanı Şahin Sultanovun xanımı İradə Sultanova bu həbsə görə müdafiə naziri Zakir Həsənovu və onun komandasını ittiham edib.

Azərbaycanın Quba-Qusar bölgəsində Rusiya bayraqlarının dalğalanması və Putinin ora gələcəyi haqda təbliğatın aparılmasını ekspertlər “Ukrayna hadisələrindən sonra “5-ci kolon”un fəaliyyəti” kimi şərh ediblər.

“Ekspress”   təhsil naziri Mikayıl Cabbarovun dərs ilinin qısa olmasının şagirdin uğurlarına “mənfi” təsir göstərdiyi üçün dərs ilinin uzadılması təklifini önə çəkib.

“Exo” Rabitə Nazirliyinin ölkə əhalsinin 6,5 milyon nəfərinin İnternet istifadəçisi, bunun yarısının genişzolaqlı isitifadçilər sırasında olması haqda xəbəri önə çəkir.

“Novoe Vremya”  məhkəmənin “NİDA”çı gənclərə uzunmüddətli həbs qərarı çıxarmasına “ədalət mühakiməsi olmayan ölkə” münasibətini ifadə edir.

“Bizim yol”  rus hərbi donanmasının Xəzər dənizində təlimlər keçirməsini önə çəkərək bunu “Rusiyanın Xəzər dənizini atəş zonası elan etməsi” adlandırır.

“Yeni Müsavat”  “NİDA”çı gənclərə üst-üstə 59 il həbs cəzası elan edən məhkəmə qərarına etiraz olaraq məhkəmə binasının önünə toplaşan ictimaiyyət təmsilçilərinin aksiya keçirmələrini önə çəkir.

QHT rəhbəri Anar Məmmədlinin məhkəməsində istintaqın zərərçəkən kimi tanıdığı şəxslərin zərərçəkən olmadıqlarını elan etmələri “məhkəmənin absurda çevrilməsi” kimi qiymətləndirilir.

Qəzetin yazdığına görə bu, il Bakıda “gül bayramı”nın təşkili üçün ölkəyə 4 milyon ədəd gül gətirilib.