Mətbuat-Monitorinq 19.02.14

Rəsmi qəzetlər dövlət başçısı İlham Əliyevin görüşləri, ölkənin iqtisadi həyatı və s. barədə yazırlar.  

“Azadlıq” qəzeti ölkənin gömrük sistemində 12 milyard manat vəsaitin dövlət xəzinəsindən gizlədilməsi faktını manjetə çıxarıb. 

Gənc siyasi fəal Teymur Kərimov məmur özbaşınalığına etiraz olaraq fevralın 17-dən aclıq aksiyasına başlayıb, səhhətində problemlər yaransa da fəal aksiyanı hələ də davam etdirir.

Siyasi ekspertlər jurnalıst Xədicə İsmayılın istintaqa cəlb olunmasına “jurnalistdən hakim ailəni ifşa edən korrupsiya araşdırmalarının qisasının alınması” şərhini veriblər.

“Zerkalo”  Avropa məhkəməsinin “hüquqi baxımdan “erməni soyqırımı” olması faktını sübut etməyin çox çətin olması” barədə son qərar verməsini diqqətə çatdırır. 

“Ekspress”. Sökülməsinə başlanılan “sovetski” məhəlləsinin sakinlərilə görüşən rəsmilər sakinlərə xidməti tikintiyə, anbara, həyətdəki ağaclara görə kompensasiya ödənəcəyini vəd ediblər.

“Exo” ölkə əhalisinin 2 milyon sakinin mənzilə ehtiyacı olduğunu yazaraq ipoteka vasitəsilə ildə cəmi 6 nəfərin ev ala bildiyini önə çəkir. 

Erkən nikahların hətta ölkənin böyük şəhərləri üçün xarakterik olmağa başladığını bildirən ekspertlər bunu “Azərbaycan üçün ciddi problem” sayırlar.

“Novoe Vremya” Xaçmaz sakini,  14 yaşlı Nurlan adlı yeniyetmənin Suriyada döyüşdə öldürülməsi haqda xəbəri ilk səhifəyə çəkib.

Ekspertlərə istinadən son 10 ildə ölkədən kənara ən azı 30 milyard maliyyə vəsaitinin oğurlanaraq çıxarıldığını yazan qəzet bu məsələdə Gömrük Komitəsinin roluna “gömrük dövlət büdcəsindən talançılığa razılıq verir” mövqeyini ifadə edir.

“Bizim yol” “casus siyahısı” ilə bağlı jurnalist Xədicə İsmayıla cinayət işinin açılmasını önə çəkərək bunu “ABŞ casusları ilə bağlı qalmaqalın böyüməsi” adlandırır.

“Yeni Müsavat”  jurnalist Xədicə İsmayılın barəsində cinayət işinin açılması haqda xəbəri ilk səhifəyə çıxarıb.

“Casus siyahısı” qalmaqalı ilə bağlı danışan jurnalist Eynulla Fətullayev “siyahı”da 100-dən artıq adın olduğu və ölkədə müxtəlif beynəlxalq qurum adı altında gizlənən kəşfiyyatlara qarşı real mübarizə başladığını” bildirib.

Avstriya məhkəməsinin Azərbaycan manatının çapı üçün Mərkəzi Bank rəhbərlyinin Vyana şirkətlə rüşvət əməliyyatına girməsini aşkar etməsini siyasilər “Azərbaycanda indiki iqtidarın rüşvət üstündə qurulması” kimi dəyərləndiriblər.

Konfliktoloq Arif Yunus iqtidarın dindarları daim təzyiq altında saxlamasını  “ölkədə dindarlar arasında məcburi radikallaşma prosesini gücləndirməsi” kimi dəyərləndirib.