Milli Demokratik Hərəkat yaradılıb

Bakı/10.08.20/Turan: XX əsrin 80-ci illərinin sonlarında baş vermiş Azərbaycan Mili Azadlıq Hərəkatının bir qrup iştirakçısı Milli Demokratik Hərəkatı (Xilas) təsis ediblər. Bu barədə Hərəkatın adından yayılan Plartormada deyilir.

Platformada elan edilir ki, ölkənin bütün problemlərinin həlli  və inkişafı xalqın toparlanaraq öz iradəsini ortaya qoymasından keçir.

Platforma müəllifləri bəyan edirlər ki, 1993-cü il iyunun 4-də baş vermiş qiyamla milli  dövlətçiliyin forma və məzmunu dəyişib. Ölkədəki müxalif siyasi və ictimai təşkilatlar milli hakimiyyətin bərpası üçün çalışsalar da hələ ki bunu reallaşdırmaq mümkün olmayıb.

Müəlliflərə görə, bu reallaşmanın baş tutmamasının səbəbləri var. Onalara görə, Ermənistanın öz havadarı Rusiya imperiyasının dəstəyi,  təhriki ilə işğalçılıq siyasəti aparması, Rusiya və İranın Azərbaycanın müstəqil dövlət  olmasını həzm edə bilməməsi; qiyamla hakimiyyətə gəlmiş rejimin antixalq mahiyyəti, ən əsası xalqin böyük kəsiminin milli dövlətçilik məfkurəsinə tam yiyələnməməsi, milli dövlətçilik prinsiplərinin qorunması naminə birləşə bilməməsidir.

“Hesab edirik ki, ilk iki səbəbi maksimum zərərsiz etmək üçün üçüncü amilin ustundə durmalı və milli dövlətçilik məfkurəsi daha çox insanımıza- vətəndaşımıza catdirilmalidir”.

Platforma müəllifləri deyirlər ki, müəyyən  məsləhətləşmələrdən sonra  Milli Demokratik Hərəkatı (Xilas) yaratmağa qərar verlib.

Hərəkat Azərbaycanda milli dövlətciliyin bərpasını, demokratik seçki yolu ilə milli hakimiyyətin formalaşdırılmasını, qüdrətli dövlətə cevrilməyi, xalq rifahının yüksəlməsini, torpaqların azad olunmasını və s. əsas hədəflər elan edir.

Hərəkat siyasi hakimiyyətə iddialı olmadığını, ölkədə xalq hakimiyyətinin qurulmasına, hüquq dövlətinin formalaşmasına yardım etmək iddiasında olduğunu, milli dövlətçilik əleyhinə olan bütün fəaliyyətlərə qarşı duracağını  bəyan edir.

Bir daha xüsusi vurğulayırıq ki, Milli Demokratik Hərəkat (Xilas)  Platforması ictimai müzakirə, təbliğat, təşviqat və xalqı maarifləndirmə platformasıdır və yaşından, siyasi mənsubiyyətindən asılı olmayaraq, milli-demokratik-hüquqi dövlətciliyin əsaslarını dərk və qəbul edərək mənimsəmiş hər kəsə açıqdır, platformada bərabərhüquqlu fəaliyyət uçün heç bir məhdudiyyət yoxdur.

Müəlliflər xarici təcavüzə qarş xalqı təşkilatlandırmağı, xarici təcavüzün daxildəki uzantılarına qarşı milli birliyin təmin etməyi, hakimiyyətin demokratik yollarla formalaşmasını təmin etməyi və s. əsas hədəflər sayırlar.

MDH(X)-nin Təşəbbüs qrupu üzvləri:

1) Aydın Bayram - Milli Azadlıq Hərəkatının iştirakçısı, ictimai xadim,

2) Bəybala Əbil - Milli Azadlıq Hərəkatının iştirakçısı,  Bakı şəhəri, Qaradağ RİH-nin sabiq başçısı, ictimai xadim,  AXC Ali Məclisinin üzvü olmuş.

3) Elxan Nuriyev - Milli Azadlıq Hərəkatının iştirakçısı,  Qubadlı RİH-nin sabiq başçısı, Qarabağ qazisi, ictimai xadim.

4) Eynulla Qara - Milli Azadlıq Hərəkatının iştirakçısı, Ucar RİH başçısının sabiq I müavini, Qarabağ qazisi, ictimai xadim,  AXC Ali Məclisinin üzvü olmuş.

5) Əli Quluyev - Milli Azadlıq Hərəkatının iştirakçısı,  Bakı şəhəri, Nəsimi RİH-nin sabiq başçısı, ictimai xadim, AXC Ali Məclisinin üzvü olmuş.

6) Əlövsət Sadıqlı - Milli Azadlıq Hərəkatının iştirakçısı,  ictimai xadim, hüquq müdafiəçisi,  AXC Təşkilat Şöbəsinin əməkdaşı olmuş.

7) Fəhmin Haçıyev  - Milli Azadlıq Hərəkatının iştirakçısı,  1992-93 cü illərdə AR DİN Daxili Qoşunların komandanı, 1994-2004 cü illərdə siyasi məhbus, içtimai-siyasi xadim.  AXC Ali Məclisinin üzvü olmuş.

8) İlham Həsən - Milli Azadlıq Hərəkatının iştirakçısı , Kəlbəcər RİH-nin sabiq başçısı, Qarabağ qazisi, ictimai xadim, AXC Ali Məclisinin üzvü olmuş.

9) Pənah Məmmədzadə - Milli Azadlıq Hərəkatının iştirakçısı, ,Göygöl RİH-nin sabiq başçısı, ictimai xadim, AXC Gəncə şəhər şöbəsi İH-nin sədr müavini olmuş.-0--