Ölkə mediası nədən yazır? (media-icmal) 04.01.21

Azərbaycanın 2020-ci ildəki uğurları, distant təhsil almış Azərbaycan vətəndaşlarının diplomlarının ölkədə tanınmamasının səbəbləri, koronavirus infeksiyasına qarşı hazırlanan peyvəndlər əleyhinə iddialar, Rusiyanın 2020-ci il 10 noyabr bəyanatının müddəalarını pozması qayğıları və s. məsələlər medianın aparıcı mövzuları sırasındadır...

"Azərbaycan" qəzeti "Sevinc Fətəliyeva: Prezident İlham Əliyevin rəhbərliyi ilə Azərbaycan dünyanın ən sürətlə inkişaf edən dövlətinə çevrilib" sərlövhəli məqalədə Azərbaycanın isyasi, hərbi və iqatisadi uğurlarını deputat Sevinc Fətəliyeva ilə dəyərləndirir.

Müəllif deyir ki, Prezident İlham Əliyevin rəhbərliyi ilə Azərbaycan dünyanın ən sürətlə inkişaf edən, yeniləşən, müasirləşən, demokratikləşən dövlətinə çevrilib: "Qazanılan uğurlar, torpaqlarımızın işğaldan azad olunması isə regionda yeni vəziyyət yaradır. Bu amil Azərbaycanın beynəlxalq aləmdə mövqeyini əhəmiyyətli dərəcədə gücləndirəcək", deyə müəllif bildirir.

Müəllif hesab edir ki, bundan sonrakı mərhələlərdə Azərbaycan daha da güclənəcək, dünyada nüfuzunu daha da artıracaq, regionda yeni gücə çevriləcək.

Deputat əlavə edir ki, 2020-ci il Azərbaycan üçün istər siyasi, istər diplomatiya, istər hərbi, istərsə də digər sahələr üzrə uğurlarla yadda qaldı, amma ən mühümü isə 44 günlük Vətən müharibəsində qazanılan qələbədir.

Deputat vurğulayır ki, ölkənin iqtisadi sahədə əldə etdiyi uğurlar hesabına Silahlı Qüvvələrin hərbi qüdrəti artırılıb, keçirilən islahatlar respublikanı güclü iqtisadi dayaqlara malik ölkəyə çevirib.

"Yeni sabah.az" saytında isə "Gənclərin xarici ölkələrdə aldığı distant təhsil diplomu ona görə tanınmır ki... - ekspert rəyi" sərlövhəli məqalədə haqqında danışılan məsələnin mahiyyətinə aydınlıq gətirilir.  

Müəllif 2020-ci ildə COVİD-19 pandemiyası ilə bağlı kütləvi toplantıların, o cümlədən dərslərin ənənəvi keçirilməsinə son verildiyini, distant təhsil üsuluna keçildiyini bildirir.

O yada salır ki, bu fakta qədər xarici universitetlərdə distant təhsil alan gənclərin diplomlarının ölkədə tanıdılması ciddi çətinliklərlə üzləşirdi: "Lakin 2020-ci ilin mart ayından başlayaraq Azərbaycanda da distant təhsil forması tətbiq olunur. Bu isə onu deməyə əsas verir ki, xarici distant diplomun tanınmasından imtina üçün əsaslar aradan qalxır", deyə müəllif ümidini ifadə edir. 

Məsələyə şərh verən təhsil sahəsi üzrə ekspert Kamran Əsdəov deyir ki, "Təhsil haqqında" qanunda distant təhsil təhsil növü kimi nəzərdə tutulub və Azərbaycan 2020-ci ildə distant təhsil tətbiqinə icazə verib.

Ekspert yada salır ki, Azərbaycan diplomların tanınması ilə bağı konvensiyaya qoşulsa da, çox ciddi məsələlər var ki, yerinə yetirilmir.

K.Əsədova görə, hüquq, tibb kimi spesifik ixtisaslar istisna olmaqla, qalan diplomlar tanınmalıdır , üstəlik dünya reytinqində ilk 1000-liyə daxil olan universitetlərin diplomları birbaşa tanınmalıdır.

Ekspert deyir ki, hazırda ölkə vətəndaşlarının cəmi 17%-i ali təhsillidir, odur ki, diplomların tanınması sadələşdirilməlidir ki, əmək bazarında rəqabət mühiti yaransın.

"Redaktor.az" saytı isə "Koronavirusla bağlı hər şey məlum oldu - dərmanı tapılıb, amma gizlədilir" sərlövhəli məqalədə barəsində danışılan iddiaların nə qədər gerçək olması ilə bağlı mühakimələr yürüdülür.

İddianın mahiyyəti budan ibarətdir ki, Çin hökuməti qlobal nüfuzuna xələl gətirməməsi üçün elmi araşdırmaları təhrif edir, ya da onlara maneə törədir. 

Üstəlik, bu da vurğulanır ki, bəzi Çin alimləri mediaya virusun  mənşəyi ilə  bağlı elmi araşdırmaların siyasiləşdirilməsinə dair müsahibələr veriblər.

Müəllifin sözlərinə görə, Çinin cənubunda virusun mənşəyini araşdıran alimlərə yüz minlərlə dollar vəsait verilib, əvəzində isə hər şeyi sirr kimi saxlamaq tapşırılıb.

İddialara görə, Çin rəsmiləri məlumatları ciddi şəkildə məhdudlaşdırır və beynəlxalq müstəvidə alimlərlə iş birliyinin qarşısını alır.

"Azpolitika.info.az" saytında "Noyabrın 10-dan sonra əsir düşən erməni yaraqlıları mühakimə olunmalıdır - tanınmış vəkil" sərlövhəli məqalədə kimlərin hərbi əsir olub-olmaması  məsələsi şərh edilir.

Müəllif deyir ki, İkinci Qarabağ müharibəsi 2020-ci il noyabrın 10-da başa çatsa da, erməni tərəfi bu tarixdən sonra da Azərbaycan tərəfin saxladığı silahlı erməni dəstələrinin üzvlərini hərbi əsirlər sayır və dərhal qaytarılmalarını istəyir.

Müəllif yada salır ki, Qrabağa göndərilmiş silahlı dəstənin 100-dən çox yaraqlısını Azərbaycan noyabrın 29-da əsir götürüb.

Könüllü təslim olan 30 nəfər Rusiya sülhməramlılarına təhvil verilib, 62 yaraqlı Bakıya göndərilib.

Hüquqşünas Fuad Ağayev isə hesab edir ki, noyabrın 10-dan sonra Azərbaycan ərazisini tərk etməmiş, təxribat törətdiklərinə görə ələ keçirilmiş silahlı ermənilər hərbi əsir sayıla bilməz.

"Beləliklə, bəyanat sülh bərqərar olana qədər əsir götrülmüş hərbçilərin və digər şəxslərin mübadiəsinə şamil olunur.

Noyabrın 10-dan sonra əsir düşənlərin probleminin həlli üşün isə mexanizm hazırlanmalı və qəbul edilməlidir", deyə hüquqşünas bildirib.

"Müsavat.com" saytında "Rusiya razılaşmanı pozur - Qarabağa göndərilən hərbiçilərin və mülki vəzifəlilərin sayı artır" sərlövhəli məqalədə Rusiyanın 2020-ci il 10 Noyabr bəyanatının müddəalarının pozulması araşdırılır. 

Müəllif yada salır ki, Dağlıq Qarabağda təmas xətti və Laçın dəhlizi boyunca xidmət edəcək sülhməramlıların sayı 1960 nəfər olmalıdır, amma rusların fərqli şəxslər və vəzifəlilərlə bölgəyə göndərdiyi personal sayı 5 min nəfəri ötür, bu isə narahatlıq yaradır. 

Müəllifə görə, rus hərbiçilərin Qarabağın dağlıq bölgələrində tam təchizatlı təlimlər keçməsi də mənfi düşüncələrə yol açır, sülhməramlıların bitərəfliyi qorumamaları Azərbaycan ictimaiyyəti arasında narahatlığa əsas verir. Buna daha bir səbəb budur ki, sülhməramlı qüvvələr erməni silahlı dəstələrini Azərbaycandan çıxarmalı ikən bunu etmir. Odur ki, bölgədə türk əsgərlərinin çox olmasına üstünlük verilməlidir: "…razılaşmanın ziddinə olaraq, Rusiyanın separatçı qüvvələri tərəf kimi görmələri də səhvdir, davranışları tərəf olduqlarını göstərir".