Paytaxt yollarında sürət rejimi sürücüləri pozuntuya sövq edir

Bakı/07.06.18/Turan: Azərbaycanda yol tikintisinin sürətlə artması fonunda istənilən sürücü sürəti aşmaya görə cərimə edilə bilər. Yol hərəkəti mütəxəssislərinin fikrincə, bu vəziyyət yeni trasslarda sürət həddinin düzgün təyin edilməməsi ilə bağlı yaranıb.

Onu demək lazımdır ki, ötən il qeydə alınan pozuntuların 52,5%-i sürət həddinin aşılması ilə bağlıdır. Bu barədə Dövlət Statistika Komitəsinin məlumatında deyilir. Tətbiq edilən cərimələrin cəmi 73,7 mln. manat təşkil edib (2016-cı ildə - 85,4 mln. manat). 2018-ci ilin vəziyyətinə görə, protokolların 33,1%-i müəyyən edilmiş hərəkət sürətinin aşılması səbəbindən tərtib edilib.

Yeni yollarda müəyyən edilmiş sürət rejimləri sürücülər üçün başağrısına çevrilib. SIPAR hüquq-müdafiə təşkilatının rəhbəri Fazil Məmmədov Turan-a bildirib.

"Qəflətən dəyişən sürət rejimi sürücüləri pozuntuya təhrik edir. Bu, əsasən icazə verilən sürət həddinin aşılması ilə bağlı olur. Buna görə də cərimələrin və bizim təşkilata müraciətlərin sayı artır", - hüquq müdafiəçisi qeyd edib. Belə çıxır ki, tez-tez və qəflətən dəyişən sürət rejimləri sanki sürücüləri qəsdən pozuntuya sövq edir.

Yaranmış vəziyyətin miqyasını qiymətləndirmək çətin deyil. Son 10 ildə 165 avtomobil yolunun və yol qurğusunun açılışı və təməlqoyma mərasimi olub. 207 yeni körpü istismara verilib.

Tikilən yolların keyfiyyətindən və sayından (bu yaxınlarda Azərbaycan yolların keyfiyyətinə görə MDB ölkələri arasında növbəti dəfə lider olub, 4,8 bal toplayaraq 2017-2018-ci illər üçün qlobal rəqabət qabiliyyəti indeksi üzrə 36-cı yeri tutub) danışan mütəxəssis diqqəti yeni yollarda icazə verilən sürətin kəskin dəyişdirilməsinin sürücülər üçün çətinlik yaratmasına yönəldib. İnzibati Xətalar Məcəlləsinin yeni versiyasına əsasən pozuntulara görə cərimələrin xeyli artması faktı da vəziyyəti gərginləşdirir.

Hazırda sürücülərin yollarda müəyyən edilmiş sürəti 10-20 km/s aşmasına görə 10 manat cərimə tutulur. 21-40 km/s üçün 50 manat, 41-60 km/s - 150 manat, 60 km/s-dan çox üçün 250 manat cərimə nəzərdə tutulub.

Müqayisə üçün deyək ki, iki il öncə müəyyən edilmiş sürəti 10-30 km/s aşmaya görə cərimə 15-20 manat təşkil edirdi, 30-60 km/s - 20-40 manat, 60 km/s-dan çox 40-60 manat edirdi.

"Aydın deyil, sürət məhdudiyyəti hansı mülahizələrdən irəli gəlir, çünki bundan ötrü adekvat səbəb yoxdur. Məsələn, sürücü müəyyən edilmiş sürət - 60 km/s ilə gedir və iki kilometrdən sonra qəflətən icazə verilən sürət həddi 90 km/s-a qalxır, bir kilometrdən sonra yenidən 60 km/s olur", - ekspert qeyd edib. Onun sözlərinə görə, belə rejimə əməl etmək demək olar ki, mümkün deyil və sürücülər buna məhəl qoymurlar. Ona görə də pozucuların sayı və cərimələrin həcmi artır.

Hüquq müdafiəçisinin məlumatına görə, rəhbərlik etdiyi qurum piyadaların iştirakı ilə yol-nəqliyyat qəzalarına qeyri-obyektiv baxılması ilə bağlı Prezident Aparatına, Ali Məhkəməyə, Ədliyyə Nazirliyinə, Daxili İşlər Nazirliyinə və Baş Prokurorluğa yazılı müraciət edib. Çünki müvafiq orqanlar və məhkəmələr qanunverciliyi və Azərbaycan Konstitusiyasını pozaraq 98% halda sürücünü günahlandırmağa tələsir. Qərəzli münasibətin motivləri haqda mülahizə yürütmək olar.

"Avtomobil sahibinin maddi üstünlüyü onu yol-nəqliyyat qəzalarında günahlandırmağa əsas vermir", - F.Məmmədov vurğulayıb. Bu arada piyadaların iştirakı ilə yol qəzalarının artan statistikası problemi dərinləşdirib.

Bu il iyunun 1-nə olan statistikaya görə, ötən il 1 833 yol qəzası qeydə alınıb. Bu qəzaların nəticəsində 750 nəfər həlak olub, 1719 nəfər yaralanıb. 2013-cü ildə Azərbaycanda avtomobil qəzalarında 1 164, 2014-cü ildə 1 124, 2015-ci ildə 894, 2016-cı ildə 759 nəfər həlak olub. 2013-cü ildə törədilən qəzalar nəticəsində 2948 nəfər yaralanıb, 2014-cü ildə - 2 676, 2015 - 2 265, 2016 -cı ildə 2003 nəfər yaralanıb.-0-