Qadın Krizis Mərkəzinin rəhbəri Mətanət Əzizovanın mənzilində axtarış başa çatıb (YENİLƏNİB)

Mətanət Əzizovanın hüquqi nümayəndəsi Samirə Ağayeva Turan-a bildirib ki, hüquq-mühafizə orqanlarının əməkdaşları üç kompüter, o cümlədən M.Əzizovanın yetkinlik yaşına çatmayan oğlunun  kompüterini, fleş-kartları, mənzilin mülk kağızını, bank sənədləri və vizit kartlarını götürüblər.

2014 May 06 (Çərşənbə axşamı) 18:02:23

Qadın Krizis Mərkəsinin rəhbəri Mətanət Əzizovanın mənzilinə axtarış üçün gəliblər. Əzizova özü xaricdə konfransda ezamiyyətdədir. Konfrans mayın 12-də başa çatacaq. Bu barədə Turan-a M.Əzizovanın həyat yoldaşı Eldar Əzizov bildirib.

Onun sözlərinə görə, o, etibar etdiyi insanlar gəlmədən hüquq mühafizəçilərini mənzilə buraxmır. Axtarış yerində Əzizovanın hüquqi nümayəndəsi Samirə Ağayeva da iştirak edir.

Axtarış üçün gələn qrup arasında üç MTN əməkdaşı, Baş Prokurorluğun 1 nümayəndəsi və MTN-in iki videooperatoru var.

Əzizov qeyd edib ki, hüquq-mühafizə orqanlarının nümayəndələri Əzizovanın mənzilində Qadın Krizis Mərkəzinin möhürünü və sənədlərini axtarırlar.

Son məlumatlara görə, axtarış başlayıb. Hal şahidi qismində vətəndaş cəmiyyətinin iki fəalı – Samir Kazımlı və Əfqan Muxtarlı iştirak edirlər.

Eyni zamanda, jurnalistlər mənzilə buraxılmayıb.

Qeyd edək ki, mayın 1-də Əzizova artıq Baş Prokurorluq tərəfindən dövlətə xəyanətdə ittiham olunan jurnalist Rauf Mirqədirovun işi üzrə dindirilib. Lakin ona daha çox Leyla Yunusun rəhbərlik etdiyi Sülh və Demokratiya İnstitutunun fəaliyyəti haqqında suallar veriblər. Qadın Krizis Mərkəzi bu İnstitutla eyni ofisdə yerləşir. -06B-