RF aviasiya strukturları tərəfindən aldatma cəhdinin qarşısı alınıb

Azərbaycan Yüksək Texnologiyalar, Rabitə və Nəqliyyat Nazirliyi yanında Mülki Aviasiya Agentliyi (MAA) Rusiyanın "Ural Hava Yolları" aviaşirkətinin Moskva-Bakı marşrutu üzrə uçuşuna “heç bir izahat” olmadan icazə verilməməsilə bağlı mətbuatda yayılan iddiaların həqiqətə uyğun olmadığını və çaşdırıcı olduğunu bildirib.

Moskvanın "Jukovski" aeroportundan təyyarənin Bakıya uçmamasının səbəbilə bağlı Turan agentliyinin sualına MAA-da cavab veriblər: 23 yanvar 2024-cü ildə "Jukovski" hava limanından Bakıya uçuşla bağlı "Ural Hava Yolları"ndan sorğu daxil olub. MAA cavab verməyib ("nə müsbət, nə də mənfi"), sorğu nəzərdən keçirilir.

MAA-da həmçinin bildiriblər ki, Bakı (Heydər Əliyev aeroportu) - Moskva ("Jukovski") reysinə bilet satışı Azərbaycan və RF aviasiya qurumlarının icazəsi olmadan həyata keçirilib. "Ural Hava Yolları" Azərbaycana uçuşlar haqqında sorğuya cavabın qaydaları və müddəti barədə məlumatlıdır, çünki bir ay əvvəl Yekaterinburqdan Bakıya uçuşa icazə alıb və Samaradan uçuşa (slot) icazənin vaxtından əvvəl verilməsi prosedurunu razılaşdırıb.

MAA "Jukovski" aeroportundan Bakıya uçuşa icazə verilməsi və Bakının günahı səbəbindən sərnişinlərin Azərbaycana  gələ bilməyərək narahat olması barədə bağlı mətbuatın iddialarının əsassız olduğunu göstərir.

Bundan əvvəl "Ural Hava Yolları" aviaşirkəti məlumat yayıb ki, "reys baş tutmayıb, belə ki, "Ural Hava Yolları"nın təyinatı, eləcə də reysin yerinə yetirilməsi və təminatı üçün bütün texniki imkanlarının olmasına baxmayaraq, Azərbaycanın aviasiya rəhbərliyi buna icazə verməyib. "Azərbaycanın aviasiya rəhbərliyinin bu qərarının səbəbi dəqiqləşdirilməyib. İmtina üçün səbəb yoxdur, çünki "Ural Hava Yolları" bütün hüquqlara malik olan və daşımaların həyata keçirilməsi üçün heç bir məhdudiyyəti olmayan təyinatlı daşıyıcıdır. Aviaşirkət Yekaterinburqdan Bakıya uçuşlar həyata keçirir", - məlumatda deyilir.

Rusiya KİV-in digər məlumatında bildirilib ki, Bakıya ilk reys fevralın 8-də olmalıydı. Baza telegram-kanalın yazdığına görə, təyyarə Moskvadan uçmadığı üçün sərnişinlər bir sutkadan çox müddətə Bakıdan Rusiyanın paytaxtına geriyə reyslə uça bilməyiblər. Səbəbini izah etmədən onu qeyri-müəyyən müddətə təxirə salıblar, aviaşirkətdə isə vəziyyəti izah etməyiblər, kanal yazır. “Qaynar xətt”də sərnişinlərə məsləhət görüblər ki, biletləri geri qaytarsınlar.

"Ural Hava Yolları" aviaşirkəti fevralın 17-dək “Jukovski”dən Bakıya uçuşları dayandırıb,- fevralın 9-da Federal Hava Nəqliyyatı Agentliyinin (Rosaviasiya) mətbuat xidməti bildirib. Aviaşirkətdə əlavə ediblər ki, Bakı ilə danışıqları davam edir.

Turan bu insident barədə məlumat toplayarkən "Ural Hava Yolları"na Moskvanın "Jukovski" aeroportundan bir neçə ölkənin paytaxtına sərnişin reysləri həyata keçirməsi üçün icazə verilməməsi hallarını aşkar edib. Əvvəlki illərdə “Jukovski”nin statusu ilə əlaqədar RF və xarici ölkələrin aviasiya rəhbərlikləri arasında fikir ayrılıqları olub. Moskvaya yaxın yerləşməsinə baxmayaraq, RF onu regional aeroportlara aid edir ki, bu da beynəlxalq reyslərdə daşıyıcıların və uçuşların sayını məhdudlaşdırmamaq hüququ verir (belə məhdudiyyətin tətbiq olunduğu Moskva aviaqovşağı aeroportları - "Şeremetyevo", "Domodedovo" və "Vnukovo"dan fərqli olaraq). Müxtəlif vaxtlarda Gürcüstan, Fransa, Tacikistan, İsrail və İtaliya hakimiyyətləri bununla razılaşmayıblar, "Jukovski" vasitəsilə reyslərin paritet şərtlərlə yerinə yetirilməsinə israr ediblər. Bir neçə dəfə mübahisələr ölkələr arasında aviaəlaqənin qismən məhdudlaşdırılmasına qədər uzanıb.

Mülki aviasiya pilotu, təqaüdçü Fazil Məmmədov Turan-a izah edib ki, ölkələr arasında uçuşlar paritet olmalıdır, yəni ölkələr arasında reyslərin sayı eyni olmalıdır. Bu o deməkdir ki, əgər (məsələn, rəqəmlər şərtidir - Red.) Rusiya aviaşirkətləri Azərbaycana ayda 45 dəfə uçmaq istəyirlərsə, bizim şirkətlərin Rusiya Federasiyasına uçuşları da eyni sayda olmalıdır.

"Bizim bu sayda uçuş etmək imkanımızın olmaması, Rusiya Federasiyasına ayda ancaq 30 dəfə uçmaq imkanımızın olması isə başqa məsələdir. O zaman müqavilə bağlanır və 15 qeyri-paritet reysdən qazancın bir hissəsini Rusiya aviaşirkəti AZAL şirkətinə ödəyir".

Fazil Məmmədov hesab edir ki, Qərb bizim ölkənin Rusiya ilə münasibətlərini minimuma endirmək istəyir və İKAO beynəlxalq hava əlaqəsi təşkilatı kimi qurumların vasitəsilə əlaqəni məhdudlaşdırmağı "tövsiyə edə" bilər. Ola bilsin ki, "Jukovski" aeroportundan uçuşların qadağan edilməsinin səbəbi onun yaxın vaxtlara qədər hərbi liman olması və buna görə də beynəlxalq sertifikat almaması ola bilər ki, bu da həmin aeroportdan uçuşlara icazə verilməməsinə səbəb olub.

"Bu gün Azərbaycan yaxşı mülki aviasiya infrastrukturuna malikdir, çox sayda sərnişin təyyarəsinə, daha çox yük təyyarəsinə sahibdir və biz bütün dünyada uçuruq, ona görə də bizə Rusiyaya uçmağı qadağan edərək "əlimizi-qolumuzu bağlaya" biləcək digər ölkələrdən asılıyıq. Nə qədər çox “zənginiksə”, bir o qədər çox asılıyıq", - ekspert əlavə edib.

Rusiyanın ixtisaslaşmış mətbuatında RF dövlət aviasiya strukturunun “Jukovski” aeroportundan qəsdən uçuş təyin etməsi ehtimalı müzakirə olunur, çünki bu liman beynəlxalq yox, regional statusa malikdir ki, bu da Rusiyanın digər beynəlxalq aeroportlarına şamil edilən paritetlik prinsipindən yan keçməyə imkan verir.