Şahbaz Xuduoğlu ittiham, meriya isə təkzib edir

Bakı/07.06.19/Turan: Bakı Şəhər İcra Hakimiyyəti parklarda kitab yarmarkalarının keçirilməsinə icazə vermir. Bu barədə "Qanun" nəşriyyatının rəhbəri Şahbaz Xuduoğlu bildirib.

Sahibkarın sözlərinə görə, bir neçə aydır ki, ucuz qiymətə kitab satışından ötrü yarmarkaların keçirilməsi üçün şəhər administrasiyasından icazə ala bilmir.

"Bakı Şəhər İcra Hakimiyyəti yanında Ticarət Departamenti öncə bizim yazılı müraciətimizə cavab olaraq bildirdi ki, Formula-1 yarışları ilə əlaqədar yarmarkaların keçirilməsi məqsədəuyğun deyil. Sonra Avropa Liqası bəhanəsilə imtina etdilər. İndi də heç cavab vermirlər", - Ş.Xuduoğlu deyib.

Onun sözlərinə görə, Ticarət Departamentindən nəşriyyatın əməkdaşlarına şifahi şəkildə bildiriblər ki, yarmarkaya Bakı Şəhər İcra Hakimiyyətinin başçısı Eldar Əzizov icazə vermir.

Ş.Xuduoğlu aşağı qiymətə kitab satışı üçün yarmarkaların keçirilməsinə icazə verilməməsini yolverilməz hesab edir.

O qeyd edib ki, yarmarkalar kitab oxumanın təbliğinə xidmət edir və şəhərin əvvəlki rəhbərliyi buna icazə verirdi.

Bakı Şəhər İcra Hakimiyyətinin mətbuat xidmətindən Turan-a bildiriblər ki, kitab yarmarkalarına qadağa qoyulması barədə məlumatları yoxdur və bununla bağlı əlavə informasiya veriləcək.

Lakin şəhər administrasiyasının mətbuat xidmətinin rəhbəri İsrafil Kərimov sonradan KİV-ə bildirib ki, kitab yarmarkalarına qadağa qoyulması ilə bağlı Ş.Xuduoğlunun söylədikləri "həqiqətəuyğun deyil".

Onun sözlərinə görə, Ş.Xuduoğlu "yarmarkanın "Gənclik" metro stansiyasının çıxışında keçirilməsi üçün" müraciət edib və Ticarət Departamentindən ona deyiblər ki, həmin ərazi Bakı metropoliteninin nəzarətindədir. 06D--