Vəkillər məhkəməni nurçulara bəraət verməyə çağırıblar

Bakının Yasamal rayon məhkəməsində 2014-cü ilin aprelində saxlanılmış ilahiyyatçı Səid Nursinin ardıcıllarının (nurçuların) işi üzrə məhkəmə prosesi yekunlaşmaq üzrədir.

Sentyabrın 29-da iclasda vəkillər məhkəmədə müvəkkillərinə bəraət verilməsini istəyiblər. Təqsirləndirilənlərdən beşi Bakıda Xıdır Mustafayev küçəsində yerləşən mənzillərdən birində axtarışdan sonra saxlanılıb.

Saxlanılan 40 nəfərdən beşi cinayət məsuliyyətinə cəlb edilib.

Bir il əvvəl Eldəniz Hacıyev, İsmayıl Məmmədov, Rəvan Fərzəliyev, Şahin Həsənov və Zəkəriyya Məmmədov məhkəmə qarşısına çıxarılıb. İlk üçün həbsdə, digər ikisi polis nəzarəti altındadır.

Müttəhimlərə qarşı CM-in 167-2.2.1 (müvafiq icazə olmadan dini məzmunlu ədəbiyyatın yayılması, əvvəlcədən razılaşma ilə və ya mütəşəkkil cinayətkar qrup tərəfindən törədildikdə), 168.1 (dini ayinlərin yerinə yetirilməsi bəhanəsi ilə vətəndaşların hüquqlarına qəsd) və 168.2-ci (yetkinlik yaşına çatmamış şəxslərin cəlb edilməsi ilə dini ayinlərin yerinə yetirilməsi bəhanəsi ilə vətəndaşların hüquqlarına qəsd) maddələri ilə ittiham irəli sürülüb.

Sentyabrın 23-də prokuror İ.Məmmədovu 7, Hacıyev, Həsənov və Z.Məmmədovu 6,5, Fərzəliyevi 4 il müddətinə azadlıqdan məhrum etməyi təklif edib.

Lakin sentyabrın 29-da müdafiəçiləri yekun nitqlə çıxış ediblər və məhkəmədən təqsirləndirilən şəxslərə bəraət verilməsini istəyiblər. Dörd təqsirləndirilən şəxsin vəkili Əsabəli Mustafayev cinayət işinin əsassız olduğunu bildirib. Onun sözlərinə görə, qadağan edilmiş dini ədəbiyyat kimi göstərilən kitablar 2006-2007-ci illərdə dərc edilib və həmin vaxt bu kitabların yayılmasına görə cinayət məsuliyyəti nəzərdə tutulmurdu.

Mustafayev həmçinin istintaqın nurçuların dini ayinlər həyata keçirərkən başqa vətəndaşların hüquqlarına qəsd etməsi barədə iddialarının əsassız olduğunu qeyd edib.

Xüsusən, istintaq dindarların maşınlarını görüşlərinin keçirildiyi evin qarşısında park etməsini və “tıxac” yaratmasını belə pozuntulardan hesab edib. Mustafayev ittihamları uydurma adlandırır.

Digər vəkil Yalçın İmanov da hesab edir ki, bu işdə ümumiyyətlə “cinayət hadisəsi” yoxdur. “Dindarlar bu evdə hər-hansı dini ayin həyata keçirmirdilər. Onlar orada sadəcə “Risale-i-Nur” kitabını oxuyur, bu təlimin əxlaqi əsaslarını müzakirə edirdilər”, deyə vəkil qeyd edib.

Yetkinlik yaşına çatmayanların cəlb edilməsinə gəlincə, həmin gün Fərzəliyevin iki qohumu onun yanına gəlib və orada sadəcə onu gözləyib.

Vəkil hesab edir ki, təqsirləndirilən şəxslərin Azərbaycan Konstitusiyasının 47 (fikir və söz azadlığı), 48 (vicdan azadlığı), 49-cu (toplaşmaq azadlığı) maddələrində zəmanət verilmiş hüquqları pozulub.

Vəkil həmçinin hesab edir ki, təqsirləndirilən şəxslər siyasi konyunkturanın qurbanı olublar. Bu zaman o qeyd edib ki, həbs edilənlər ənənəvi nurçuluq ardıcıllarıdır və Türkiyə və Azərbaycanda tərəfdarları təqibə məruz qoyulan Fətullah Gülənlə heç bir əlaqələri yoxdur. Bu iş üzrə növbəti iclas oktyabrın 5-də keçiriləcək. -06B-