Vətəndaş cəmiyyəti institutları: İnsan haqları bərbad haldadır

“D-18” gənclər ictimai birliyi bazar ertəsi RATİ-də “Cümhuriyyət ideallarına sədaqət” mükafatının təqdimetmə mərasimi keçirib.

Mükafatı təqdim etməzdən öncə Azərbaycanda respublika qurulmasının 96-cı ilinin tamam olduğu qeyd olunub. “96 il öncə Azərbaycanda demokratik cümhuriyyət qurulması Azərbaycan insanının düşüncə tərzinin məhsulu idi və cümhuriyyət insanların bütün təməl haqlarını tanıdı”, - deyə “D-18” hərəkatının rəhbəri Ruslan İzzətli 1981-20-ci illər cümhuriyyətinə dəyər verib.

İndi müstəqil Azərbaycana başçılıq edən iqtidar xalqa yaxınlıq və insan haqlarını tanımaq, davranış baxımından kəskin tənqidə məruz qoyulub. “O zaman cümhuriyyətə Məhəmmədəmin Rəsulzadə, Topçubaşov, Fətəli xan Xoyski, Hacınski kimi şəxsiyyətlər başçılıq edirdi, indiki iqtdar isə sələflərinə layiq deyil”, - deyə R.İzzətli nəzərə çatdırıb. Bu gün ölkə iqtidarının müstəqil Azərbaycanda insan haqlarını tanımaması, siyasi fəallıqlarına görə gənclərin, dindarların, jurnalistlərin, ictimai fəalların həbsə alındıqlarına diqqət çəkilib.

Son müstəqillik dövründən 22 il ötsə də, ölkədə insan haqlarının bərbad şəkildə qaldığı vurğulanıb. Bu sahədə inkişaf əvəzinə ilbəil ancaq geriləmələr olub, son illərdə isə əsassız həbslərin baş alıb getdiyi vurğulanıb. “İnsan haqları baxımından biz elə XX əsrin sonu, XXI əsrin əvəllindəki kimi qalmışıq, hər- hansı mütərəqqilik yoxdur və sanki bu sahədə zaman elə “donub” qalıb”, - deyə REAL Hərəkatının icraçı direktoru Natiq Cəfərli bildirib. Ölkədə inkişafa nail ola bilmək üçün ölkənin demokratikləşdirilməsi, azad seçkilər keçirilməsi, insan haqlarının tanınması əsas şərtlər sırasında sadalanıb. Bu reallıqlardan sonra cümhuriyyət ideallarının hökmən bərpa ediləcəyinə inam ifadə edilib.

Ölkənin demokratikləşməməsinə səbəb kimi mövcud olan prezidentlik üsul-idarəsi göstərilib. “Kiçik ölkələrdə prezidentlik şahçılığa, böyük ölkələrdə parlament respublikası isə anarxiyaya gətirir”, - deyə Demokrat Partiyasının sədri Sərdar Cəlaloğlu Azərbyacanda demokratikləşməmənin mənbəyini göstərib. Xalqın öz haqlarından istifadə etməməsinin də hüquqlarının məhdudlaşmasına səbəb olduğu deyilib. Digət bir səbəb kimi ölkədə hakimiyyət bölgüsünün aparılmaması göstərilib. Belə ki, qanunvericiliyə görə Konstitusiya dövlət başçısına 110 səlahiyyət verib, amma onun məsuliyyəti haqda bir maddə belə əksini tapmayıb. 

Tədbirdə ABŞ-ın Azərbaycan səfiri R.Morninqstarın rəsmi Bakını tənqidə məruz qoyan müsahibəsindən sonra rəsmi Bakının Rusiyameylli davranışı da diqqət mərkəzində olub. Rəsmilərin son zamanlardakı anti-Qərb çıxışları ölkənin müstəqilliyinin təhlükə altına alınması kimi dəyərləndirilib. “Bu mənada Ramiz Mehdiyevin bəyanatı milli istiqlal üçün təhlükədir və ölkə ictimaiyyəti buna diqqətli olmalıdır”, - deyə Vətəndaş və İnkişaf Partiyasının sədri Əli Əliyev bildirib.

130 nəfərdən çox siyasi məhbusu olduğu halda Azərbaycanın Avropa Şurası Nazirlər Kabinetinə sədrlik etməsi absurd adlandırılıb. Hətta məhbusların nəinki istintaq vaxtı, hətta həbsxanalarda belə işgəncələrə məruz qaldıqları vurğulanıb. “Biz Azərbaycanı siyasi məhbuslarısız, insan haqlarına əməl edən ölkə kimi görmək istəyirik”, - deyə “Siyasi Məhbuslarsız Azərbaycan” Alyansının rəhbəri Elşən Həsənli qeyd edib.

Bundan sonra mükafatın təqdim olunması keçirilib. İctimai birliyin sorğusunun nəticələrinə əsasən mükafat ReAl Hərkatının həbsdə olan sədri İlqar Məmmədova verilib. Məmmədov həbsdə olduğuna görə mükafat Hərəkatın icraçı direktoru Natiq Cəfərliyə təqdim olunub. -05C-