Bakı, Ankara və Aşqabad üçtərəfli əməkdaşlığı möhkəmləndirir (YENİLƏNİB)

Bakıda Azərbaycan, Türkiyə və Türkmənistanın xarici işlər nazirlərinin görüşünün yekunu olaraq birgə bəyannamə qəbul edilib.

Azərbaycan XİN-in mətbuat xidmətindən Turan-a verilən məlumata görə, xarici işlər nazirləri idarələri arasında, həmçinin Birləşmiş Millətlər Təşkilatı, İslam Əməkdaşlığı Təşkilatı və digər beynəlxalq və regional təşkilatlar çərçivəsində məsləhətləşmələri davam etdirəcəkləri barədə razılığa gəliblər.

Nazirlər terrorizm, ekstremizm və onun bütün forma və təzahürləri, transmilli mütəşəkkil cinayətkarlıq, narkotik maddələrin qeyri-qanuni dövriyyəsi və qanunsuz silah alveri, həmçinin insan alveri və qeyri-qanuni miqrasiyaya qarşı mübarizədə əməkdaşlığı gücləndirəcəklərini xüsusi qeyd ediblər.

XİN rəhbərləri birgə layihə və əməkdaşlıq təşəbbüsləri vasitəsi ilə müxtəlif sahələrdə, xüsusilə enerji, ticarət, nəqliyyat, mədəniyyət, turizm, təhsil və ətraf mühitin qorunması sahələrində əlaqələrin daha da inkişaf etdirilməsi barədə öhdəliklərini təsdiq ediblər.

Onlar Azərbaycan, Türkiyə və Türkmənistanda olan enerji və nəqliyyat layihələrinin vacibliyini vurğulayaraq, sözügedən sahələrdə əlaqələrin genişləndirilməsinin, enerji təhlükəsizliyi və enerji şaxələndirilməsinin təminatı məqsədi ilə birgə irimiqyaslı layihələrdə işitrakın əhəmiyyətini və tarixi və mədəni irsin qorunması sahəsində əməkdaşlığı davam etdirəcəklərini vurğulayıblar.

Siyasi dialoqun, əlaqələndirmənin, regional və beynəlxalq məsələlərdə əməkdaşlığın gücləndirilməsinə yönəldilən üçtərəfli görüşün müntəzəm olaraq keçirilməsinin vacibliyi bəyan edilib.

Növbəti görüş 2014-cü ilin ortalarında Aşqabad şəhərində keçiriləcək.-16D-

*   *   *

2014 May 26 (Bazar ertəsi) 11:57:53

Mayın 26-da Bakıda Azərbaycan, Türkiyə və Türkmənistanın xarici işlər nazirlərinin görüşü başlayıb.

Görüş zamanı nazirlər regiondakı vəziyyəti, Xəzərin statusunu, eləcə də əməkdaşlıq məsələlərini müzakirə edəcəklər. Görüşün yekunları ilə bağlı mətbuat konfransı keçiriləcək.

Qeyd edək ki, Türkiyə XİN rəhbəri Əhməd Davutoğlu ötən ilin sonlarında (ATƏT Nazirlər Şurasının XX iclası çərçivəsində) Türkiyə-Azərbaycan-Türkmənistan üçtərəfli formatının yaradılmasına dair qərarı bəyan etmişdi. Təfərrüat açıqlanmamışdı. Lakin şübhə yox ki, əsas mövzu Türkmənistan qazının Azərbaycan və Türkiyə vasitəsilə Avropaya nəqli olacaq. Belə olduğu halda, Bakı və Aşqabad iki ölkə arasında dənizin dibinin bölünməsi, mübahisəli “Kəpəz” (“Sərdar”) yatağı, gələcəkdə TANAP sisteminə qoşulmaq üçün Türkmənistandan Azərbaycana Transxəzər qaz kəmərinin tikintisi ilə bağlı  problemləri həll etməlidir. -16D04-