Vüqar Hacıyev: Qardaşım Bəxtiyarın səhhəti ağır və kritikdir  

Bakı/05.02.23/Turan: İnsan haqları fəalı Bəxtiyar Hacıyev saxlanıldığı 1 saylı Bakı İstintaq Təcridxanasında 28 gündür aclığı davam etdirir. O, həbsinə etiraz və bütün siyasi məhbuslara azadlıq tələb edir.

Fevralın 5-də Bəxtiyar Hacıyev təcridxanadan ailəsinə telefonla zəng edib.

Fəalın qardaşı Vüqar Hacıyev Turana  deyib ki, səhhəti əvvəlki kimi ağır və kritik olaraq qalır.

“Səsi çox zəif idi. O dedi ki, dünən tibb elmləri doktoru Adil Qeybullanın iştirakı ilə 5 saat ərzində ətraflı müayinə ediblər. Adil Qeybulla onun səhhətini qeyri-kafi qiymətləndirib. Mən ondan xahiş etdim ki, günlər keçdikcə səhhəti daha da pisləşir, aclığı dayandırsın. O razılaşmadı və sonadək aclığı davam etdirəcəyini bildirdi.”

Bəxtiyar Hacıyev qardaşından ölkədəki durumla bağlı öyrənib.

“O fotoreportyor Vəli Şükürovun həbsindən və ümumiyyətlə ictimai-siyasi fəalların son həbsindən çox narahat oldu”, Vüqar Hacıyev qeyd edib.

Bəxtiyar Hacıyev təcridxananın tibb-sanitar hissəsində saxlanılır.

“O Penitensiar Xidmətin müalicə müəssisəsinə köçürülməsini istəyir. Çünki təcridxananın tibb-sanitar hissəsində o qədər də yüksək tibbi xidmət göstərilmir. Amma dünən həkim müayinəsindən sonra tibb müəssisəsinə köçürülməsi məqsədə müvafiq hesab olunmayıb”, o qeyd edib.

Dünən, fevralın 4-də Adil Qeybulla  Bəxtiyar Hacıyevi müayinə edib.

“Onun səhhəti aclıq aksiyasına uyğundur. Aclığının 27-ci sutkasıdır. Çəki itirib, halsızdır. Başgicəllənmələri, baş ağrıları, mədə ağrıları var, gəzməyində çətinlik çəkir, ümumi zəfliyi var. Bədəndə su itkisi olduğuna görə, adekvat qaydada bədənin sanki quruması baş verir. Çəki itirilməsinə səbəb olan əsas amillərdən biri budur. Əlbəttə lazımi tədbirlər görülməlidir ki, onun bu vəziyyəti dərinləşməsin. Amma komunakabellidir, huşu aydındır”.

Həkim bildirib ki, Bəxtiyar Hacıyevin Penitensiar Xidmətin Müalicə Müəssisəsinə köçürülməsi hələ gündəlikdə deyil.

“Onun huşu aydındır. Mən onun səhhətini nəzarətə götürmək fikrindəyəm. Lazım olan tədbirlər hələ təcridxananın tibb-sanitar hissəsində həyata keçiriləcək”.

Həkim Bəxtiyar Hacıyevin komaya düşməsini də istisna etməyib.

“Aclıq edən insanın komaya düşməsinin əsas səbəbi qanda şəkərin miqdarının aşağı düşməsidir. Yəni şəkərin enməsi, qanın qatılaşması tendensiyası var. Bunlar aclıq aksiyası zamanı müşahidə edilən əsas amillərdəndir. İstənilən aclıq edən insan aclıq aksiyasının üçüncü, dördüncü həftəsində qanda şəkərin aşağı düşməsindən, yəni qlükozanın qanda səviyyəsinin aşağı enməsindən komaya düşə bilər”, Qeybulla qeyd edib.

Öz növbəsində, Penitensiar Xidmətin İctimaiyyətlə Əlaqələr Şöbəsindən Amerikanın Səsinə bildiriblər ki, Bəxtiyar Hacıyev təcridxananın tibb-sanitar hissəsində həkim nəzarətindədir.

Ötən il dekabrın 9-da Bəxtiyar Hacıyev barəsində Xətai Rayon Məhkəməsinin qərarı ilə 1 ay 20 gün müddətinə həbs qətimkan tədbiri seçilib. Yanvarın 21-də məhkəmə müstəntiqin vəsatəti əsasında həbs qətimkan tədbirini fevralın 28-dək uzadıb.

O, xuliqanlıq və məhkəməyə hörmətsizlikdə ittiham olunur, amma özü bu ittihamları qəbul etmir. Yanvarın 13-də həbsdə olan Bəxtiyar Hacıyevə qarşı irəli sürülən ittiham ağırlaşdırılıb.

Yanvarın 9-da Bəxtiyar Hacıyev məhkəmə zalında həbsinə etiraz olaraq aclığa başladığını bildirib və hazırda 28 gündür aclığı davam etdirir. Hacıyev bundan öncə ötən il dekabrın 10-dan 28-dək, 14 gün aclıq edib

Yanvarın 24-də ölkənin 18 vətəndaş cəmiyyəti təşkilatının rəhbəri Prezident İlham Əliyevə Bəxtiyar Hacıyevin azadlığa buraxılması xahişi ilə müraciət edib. Bununla yanaşı, çoxsaylı ictimai-siyasi xadimlər, jurnalistlər, ziyalılar, ictimaiyyət nümayəndələri sosial şəbəkələrdə "Azadlıq Bəxtiyarın haqqıdır!" devizi ilə video müraciət yayıblar.

Qeyd edək ki, vəkillərin Hacıyevin ev dustaqlığına və ya girov müqabilində məhkəmə istintaqının başlanmasınadək azadlığa buraxılması ilə bağlı çoxsaylı vəsatətlərini məhkəmələr təmin etməyib.-03-