Hakim Yeni Azərbaycan Partiyasının üzvü, parlamentin deputatı Məlahət İbrahimqızı mətbuat konfransı keçirərək, yenə sosial şəbəkələrdə və bütünlükdə internetdə nəşrlərə nəzarət tətbiq etməyə çağırıb.
“Son vaxtlar Azərbaycanda bir sıra mətbuat orqanlarında, xüsusilə də onlayn və sosial mediada insanların şərəf və ləyaqətinə zidd, mənəviyyata sığmayan fikirlər irəli sürülür”, deyə o bildirib.
“İnsanlar mətbuatda sərhədi aşan, əxlaqımıza uyğun olmayan fikirlərdən beziblər. Təhqiramiz sözləri görəndə dəhşətə gəldim, görəsən biz beləyikmi? Dövlət atributlarımız haqda ağıllarına gələni yazırlar. Demokratik dəyərlərin bərqərar olması, bazar iqtisadiyyatının inkişafı üçün dövlətimiz böyükmiqyaslı işlər görür. İnsan hüquqlarının nə olduğunu bilməyən insanlar təhqiramiz fikirlərlə ziyalılarımızı cəmiyyətdə gözdən salmağa çalışırlar. Bunun qarşısı alınmasa, proses sürətlənə bilər”, deyə o qeyd edib.
Parlamentin digər deputatı Elmira Axundova da onu təkrarlayıb. O, informasiya ombudsmanı yaratmağı təklif edib.
“Mətbuat Şurasına da internet media ilə bağlı ciddi səlahiyyətlər verilməlidir. Məsələn, deyilən məsələlərin yer aldığı sayt varsa, Mətbuat Şurası ona bağlamalı, sonra bu məsələ məhkəmədə həll olunmalıdır. Təhqir yol verilməzdir”, deyə o bildirib.
Yazıçılar İttifaqının katibi Çingiz Abdullayev dünyada təhqirə görə cərimə təcrübəsini xatırladıb.
“Sənin nə ixtiyarın var ki, başqasını təhqir edirsən? İnternetdə kim nə istəyir, yazır. Fransada Məhəmməd peyğəmbər təhqir olunanda biz bunun əleyhinə çıxdıq. Onlar da dedilər ki, bu, söz azadlığıdır. Bəs onda nəyə görə, qondarma "erməni soyqırımı"nı tanımayan şəxsə cərimə tətbiq olunması barədə qanun qəbul olunur? Budurmu söz azadlığı? Bu, ikili standartdır. Bu gün bəzi jurnalistlər bizim tariximizin, ədəbiyyatımızın olmadığını deyir, Üzeyir Hacıbəyovu, Səməd Vurğunu təhqir edir, mənəvi dayaqlara zərbə vururlar. Yoxlasalar, görərsiniz ki, Azərbaycanda bəzi saytları ermənilər yaradıblar. Biz demirik ki, kimisə həbs etdirək, sadəcə, məsuliyyətli olmaq lazımdır”, deyə Abdullayev bildirib.
Sonda İbrahimqızı İnternetdə nəşrlərə nəzarət üçün xüsusi monitorinq qrupu yaratmağı təklif edib.
“Biz qətiyyən sosial medianın bağlanmasının tərəfdarı deyilik. Əxlaqımıza, milli dəyərlərimizə zidd fikirlərin yayılması qəbuledilməzdir”, deyə o bildirib.
BDU-nun Jurnalistika fakültəsinin müəllimi Cahangir Məmmədli İlham Əliyevin Mətbuatın 130 illiyində çıxışından sitat gətirib: “Biz keçid dövrü yaşayırıq. Ona görə də mətbuatın bütün tənqidlərinə dözməliyik. Hətta təhqirlərinə belə”.
Sonda tədbir iştirakçıları mətbuat konfransında səslənən fikirlərin yekunundan ibarət ictimaiyyətə müraciət qəbul ediblər. -0-
Cəmiyyət
-
Dekabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə çiskin olacağı ehtimalı var. Mülayim cənub-qərb küləyi əsəcək.
-
Çox vaxt "Qafqazın Dubayı" adlandırılan Bakı getdikcə sakinlərin mənzil hüquqlarının sistematik şəkildə pozulması ilə tanınmağa başlayır. Şəhərin yenilənməsi və yeni eleqant binaların inşası zamanı Azərbaycanın paytaxtında minlərlə ailə qanunsuz olaraq öz evlərindən məhrum edilib. Çoxları müqavimətin faydasız olduğunu bilərək, öz qiymətli əmlaklarına görə qeyri-adekvat pul kompensasiyasına razılaşır. Mənzil Məcəlləsinə inanan azlıq isə tikinti şirkətlərindən ədalətli təzminat tələb edir, ancaq çox vaxt hər şeyi itirir - həm evini, həm də təzminatın istənilən formasını.
-
Düşərgədə iştirak edən məktəblilər ölkəmizi üç nüfuzlu beynəlxalq olimpiadada təmsil edəcək Ölkəmizin beynəlxalq fənn olimpiadalarında təmsil etməyə hazırlaşan şagirdlərin hazırlıq prosesi müvəffəqiyyətlə davam edir. Azercell, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Bakı Ali Neft Məktəbində bu məktəblilər üçün növbəti “İnformatika Düşərgəsi” təşkil olunub.
-
Ötən gecə Azərbaycan-Ermənistan sərhədində 4.8, 3 və 3.8 maqnitudalı zəlzələlər baş verib, Azərbaycan Milli Elmlər Akademiyası Respublika Seysmoloji Xidmət Mərkəzi bildirib.
Rəy yaz