Ziyalılar yenilməyi qəbul etmirlər..

Azərbaycan cəmiyyəti  9-10 fevral 2020-ci il tarixlərində - növbədənkənar parlament seçkilərinın keçirildiyi  və nəticələrin elan olunduğu günlərdə yaşadığı şokun təsirindədir. Azərbaycan telekanallarının ekranlarında seçki müşahidəçilərinin müsbət rəyləri və prezident İ.Əliyevin dilindən səslənən səsvermənin nəticələrilə bağlı yüksək qiymətləndirmə nümayiş etdirilir. Lakin xalq fevralın 9-da seçki prosesində açıq saxtakarlıq və təhrif faktları ilə dolu saysız-hesabsız həvəskar videolara baxır.

Sosial şəbəkələrdə demokratik ziyalılar baş verənlər və ruh düşkünlüyündən çıxış yolları ilə bağlı fikirlərini bölüşürlər.

“Bu, qara gün idi, təkcə cəmiyyət üçün yox, həm də hakimiyyət üçün. Hələ beləsi olmamışdı. Seçki administrasiyasının cinayətləri canlı yayımlanırdı. Və bu, hər yerdə baş verirdi, kütləvi hal almışdı.

Artıq deyı bilməzsiniz ki, bizim seçkilərin demokratik standartlara uyğun olmaması ilə bağlı ittihamlar Azərbaycana dost olmayanların  böhtanıdır. Bu, ilk dəfə deyil ki, cəmiyyətin bir hissəsi İlham Əliyevin islahatlar yolu ilə getməyə hazır olduğuna inandı. 2003-cü ildən sonra da belə oldu. Bu gün 45-50 yaşlarında olanlar o zamanlar gənc idilər. Cəmi 30-35 yaşında. İnandılar və aldandılar. Öz yolları ilə getdilər. Son bir neçə ay ərzində məhz onlar bir daha inandılar, bəlkə də, sadəcə, inanmaq istədilər ki, İlham Əliyev köklü islahatların vacib olduğunu anlayıb. Və yenə də inandılar”, - Rauf Mirqədirov “Yatmış köpəyi oyandırmaq lazım deyildi” məqaləsində yazır.

“Allahın ən mağmun parlamenti niyə buraxıldı? Özünü buraxan adamları nədən yenidən deputat təyin etdilər? Niyə hakimiyyət seçki instututunu qəsdən öldürdü? Zorla islahat hekayəsi qurmağa çalışırdılar, dünən bu hekayə məhv oldu. Niyə? Dünənki rəzalət ölkənin gələcəyinə olan ümidləri öldürdü, cəmiyyəti radikallaşdırdı.  Bunu bilmirlərmi?  Bu sualların cavabını tapmasaq strateji addımlar ata bilməyəcəyik. Gəlin, birlikdə düşünək”, - jurnalist Natiq Cəfərli çağırış edir.

“Məyusluğu anlayıram, amma ümidsizliyi qəbul etmirəm”, - Şahin Cəfərli Facebook-da statusuna bu sözlərlə başlayır. O bu saxta Məclisin səlahiyyət müddətinin növbəti 5 il olacağına inanmır. Bu saxtakarlıq bumeranq kimi onun müəlliflərinin başına dəyəcək. Tarix göstərir ki, vaxtı yetişəndə dəyişiklik qaçılmaz olur. Subyektiv amillər prosesi bəzən ləngidə, bəzən çox gecikdirə bilir, amma sonda o qarşısıalınmaz transformasiya gerçəkləşir.

“Mahiyyətcə heç nə dəyişmədi. Saxtakarlığın miqyasına uyğun olaraq məyusluq və inamsızlıq artdı, suallar çoxaldı. Bir daha aydın oldu ki, dəyişmək üçün xalqın düşüncə və psixologiyası dəyişməlidir, məhdud maraqlara söykənən ənənəvi və ziyanlı əxlaq dəyişməlidir. Bu mənada ümid yaxşı təhsilli, yeni və azad düşüncəli gənclərədir”, - jurnalist Qulu Məhərrəmli belə hesab edir.

“Azərbaycan xalqının və müxalifətinin əsas vəzifəsi hakimiyyəti azad seçki mühiti yaratmağa məcbur etməkdir. Mövcud şərtlər daxilində növbəti seçkilər mənasızdır. Biz anladıq ki, hakimiyyətin populizminə inanmaq olmaz.  Bizim xilas yolumuz bəzilərinin gözdən salmağa çalışdığı mübarizədən keçir”, - siyasətçi,  Müsavat Partiyasının üzvü Tofiq Yaqublu yazır.

“Qanunların işləmədiyi ölkədə yeganə ümid  kütləvi aksiyalaradır. Bu ölkənin gələcəyinə biganə qalmayan bütün insanlar, xüsusilə gənclər öz rolu barədə düşünməlidir. Heç kəs bizə demokratiya verməyəcək, özümüz onu əldə etməliyik”, - deputatlığa namizəd Fərhad Mehdiyev ictimaiyyətə müraciət edir.

“İnsanlara utanc və hörmətsizlik olan seçkilərdən çıxmağın iki yolu var: seçkiləri ləğv etmək və ya  yanvarın 19-da olduğu mitinq keçirmək”, - o, müraciətini  tamamlayıb.

“Bu, mövcud hakim elitanın ölkəni islahatlar yolu ilə idarə edə biləcəyinə olan inamın sonudur. Bu, cəmiyyət üçün itirilmiş şansdır. Lakin cəmiyyətin hələ şansı olacaq. Hakim elitanın isə  çətin ki. Cəmiyyət müqavimətə qadir olduğunu sübut etdi. Və ilk və ən kiçik fürsətdə öz iradəsinə qarşı zorakılığa müqavimət göstərəcək.

Yada salmaq lazımdi ki, çətin ki yatmış köpəyi oyandırmağa dəyər”, - Rauf Mirqədirov məqaləni yekunlaşdırıb.