Avropa Məhkəməsinin Azərbaycanla bağlı qərarları yerinə yetirilirmi? – Xalid Ağəliyev Çətin sualda

Bakı/04.05.23/Turan: Avropa İnsan Haqları Məhkəməsi (AİHM) 2022-ci ildə Azərbaycanla bağlı 56 qərar və qərardad qəbul edib. Məhkəmə mahiyyəti üzrə 23 qərar qəbul edib. 91 ərizə üzrə qəbul edilən həmin qərarlardan 22-də iddia edilən pozuntuların əksəriyyəti tanınıb. AİHM bir ildə 91 ərizə əsasında 33 qərardad qəbul edib – qərardadların 6-sı ərizələrin qəbul edilməzliyi ilə bağlı olub, 22 qərardad tərəflərin dostca anlaşması, 5 qərardad isə hökumətin təqdim etdiyi təktərəfli bəyannamə əsasında çıxarılıb.

2021-ci ildə AİHM Azərbaycanla bağlı qərarlarında ən çox azadlıq və toxunulmazlıq hüququnun pozuntusunu tanımışdı - 9 qərar. Həmin il həmçinin, 7 işdə işgəncəyə məruz qalmamaq, 7 işdə də ədalətli məhkəmə araşdırması hüququnun pozulmasına qərar verilmişdi. 2022-ci ildə pozuntuların xarakterində ciddi dəyişiklik nəzərə çarpmır – 9 qərarda azadlıq və toxunulmazlıq hüququnun, 7 qərarda ədalətli məhkəmə araşdırması hüququnun pozuntusu tanınıb.

2021-ci ildə pozuntular müəyyən edilmiş 36 qərar 161 ərizəçiyə münasibətdə çıxarılmışdı. 2022-ci ildə pozuntu müəyyən edilmiş 22 qərar 91 ərizəçiyə münasibətdə elan edilib.

Bəs bu qərarlar yerinə yetirilibmi?

Media hüququ qrupunun rəhbəri Xalid Ağəliyev Kamran Mahmudovun təqdimatında yayımlanan “Çətin sual” verilişində bu barədə danışır.