Bayden-Putin sammitinin yekunları və Amerika-Azərbaycan münasibətləri

Bakı/19.06.21/Turan: ABŞ prezidenti Co Bayden və Rusiya prezidenti Vladimir Putin arasında iyunun 16-da Cenevrədə keçirilən görüşün yekunlarını ABŞ-da yaşayan jurnalist Ələkbər Raufoğlu Turan Agentliyinin "Çətin sual" verilişində təhlil edir.

Raufoğlu qeyd edib ki, ilk növbədə Putin, həmişəkinin əksinə, görüşə gecikməyib. Bu özü, həmçinin Putinin görüşün yekunlarına dair qiymətləndirmələri bu görüşün Rusiya prezidenti üçün nə dərəcədə əhəmiyyətli olduğunu göstərir.

Baydenə gəlincə, o, Rusiya prezidenti ilə görüşdən əvvəl NATO sammitində iştirak edib. Aydındır ki, bunun məqsədi ABŞ-ın müttəfiqləri ilə ortaq mövqeyi təmsil etdiyini nümayiş etdirmək idi, jurnalist belə hesab edir.  

Raufoğlu qeyd edib ki, Bayden görüşdə Ağ Evin Kremllə münasibətlərdə əsas tutduğu 3 amili həmkarının diqqətinə çatdırmağa çalışıb: 

- Birincisi - dünyadakı liderliyini təsdiq etmək;

- ikincisi - ABŞ Rusiya ilə münasibətlərdə strateji sabitliyə can atır (Söhbət qarşıdurma tərəflərindən heç birinə uğur gətirməyəcək müharibə metodlarının mövcudluğundan gedir).

Xüsusən, son zamanlar kiberhücumlarla bağlı qarşılıqlı ittihamlar daha tez-tez səslənir. Bayden Putinlə görüşdə Moskvanı mühüm infrastrukturlara kiberhücumlardan çəkindirib (ABŞ prezidenti 16 qurumun adını çəkib). O, bunun hərbi və ya başqa bir formada cavablandırılacağına eyham edib.

Brüsseldə NATO-nun sammiti zamanı təşkilatın Nizamnaməsinin 5-ci maddəsinə düzəliş edilib. Bu düzəlişə əsasən, Alyansın bir və ya bir neçə üzvünə qarşı təkcə silahlı hücumlar deyil, kiberhücumlar da bütün Alyans üzvlərinə hücum kimi dəyərləndiriləcək;

- Üçüncüsü - Rusiya ABŞ-ın insan hüquqlarına dair məsələləri səsləndirəcəyi və onlara riayət olunmasını tələb edəcəyi ilə barışmalı olacaq və bunsuz dialoq qeyri-mümkündür.

Qarabağ məsələsinə gəlincə, bu mövzuya toxunulmayıb. Bir neçə gün əvvəl Bayden Türkiyə prezidenti Recep Tayyip Erdoğanla görüşündə Qarabağ məsələsini qaldırıb. Fransa prezidenti Emmanuel Makron da bir neçə gün əvvəl Erdoğanla bu mövzunu müzakirə edib. Bu problemdə Türkiyənin rolu Qərb ölkələrində öz maraqları nöqteyi-nəzərdən suallar doğurur.

Raufoğlu hesab edir ki, Azərbaycan və Ermənistan arasında müharibə başa çatıb, amma sülh hələ də əldə olunmayıb. Müharibənin yekunlarına görə Rusiya bu məsələnin həllini öz inhisarçı nəzarətinə götürüb. Beləliklə, müharibə bu münaqişəni həll etməyib və Azərbaycan bunu nəzərə almalı olacaq.

"Sülhə nail olmaq üçün ATƏT-in Minsk Qrupunun digər üzvlərinin, xüsusən də ABŞ-ın imkanlarından istifadə etmək lazım gələcək. Həm də onların Rusiyada olmayan təsir alətləri var", deyə jurnalist qeyd edib.-0-