Ermənistan-Azərbaycan sərhəddində gərginlik Yerevandan qaynaqlanır

Bakı/27.05.21/Turan: Bu gün Müdafiə Nazirliyinin verdiyi məlumata görə, gecə saat 3-ə yaxın Ermənistan Silahlı Qüvvələrinin kəşfiyyat-təxribat qrupu Kəlbəcər rayonunun Yuxarı Ayrım kəndi istiqamətində Azərbaycan ərazisinə keçməyə cəhd edib. Azərbaycan ordusunun sərhəd mövqelərinə gedən təchizat yolunu minalamağa çalışan 6 erməni hərbçi əməliyyat tədbirləri nəticəsində mühasirəyə alınıb  və saxlanılıb.

Bu gün səhər sərhəd yaxınlığında düşmənin bir neçə döyüş texnikasının, o cümlədən tankların cəmləşməsi müşahidə edilib. Görülən tədbirlər nəticəsində onların hərəkətinin qarşısı alınıb.

Azərbaycan-Ermənistan sərhəddində gərginliyin artmaqda davam etdiyini demək olarmı? "Atlas" Araşdırmalar Mərkəzinin rəhbəri Elxan Şahinoğlu "Çətin sual" proqramında bu suala cavab verməyə çalışıb.

O deyib ki, sərhəddə baş verənlərin arxasında seçkilərdə real şansı olan Paşinyanın qələbəsinə imkan verməmək üçün Ermənistanda seçkinin təxirə salınmasında maraqlı olan bəzi qüvvələr var.

"Amma bizim üçün fərqi yoxdur, Ermənistanda hakimiyyətə kim gələcək. Biz dövlətin möhkəmləndirilməsi və öz daxili vəzifələrimizin həlli ilə məşğul olmalıyıq", - o qeyd edib.

Onun fikrincə, əgər Ermənistan gərginliyin artmasından imtina etsə, bəzi əsirlər azad edilə bilər.

Şahinoğlu  hesab edir ki, Ərdoğanın iyunun ortalarında Qarabağa təyin edilmiş səfəri xəbərdarlıqdır: təxribatlar davam edərsə, antiterror əməliyyatı aparıla bilər.

"Strateji təşəbbüs bizdədir, biz yollar çəkilik, aeroportlar tikirik, sərhəddi bərpa edirik. Və bu da Ermənistanda müəyyən dairələrdə panikaya səbəb olur. Diversiya qruplarının bizim ərazimizə göndərilməsi təxribatdır. Erməni informasiya maşını onların həbsindən gərginliyi artırmaq üçün istifadə edəcək. Ümumiyyətlə, son aylar onlar əsirlər mövzusundan sistematik şəkildə istifadə edirlər", - ekspert deyib.

Şahinoğlu hesab edir ki, erməni dairələrin ABŞ və Fransaya müraciət etmək cəhdləri uğur qazanmır. Çünki o ölkələrin vəziyyətə təsir etmək alətləri yoxdur. Rusiyaya müraciət də nəticəsiz qalır, belə ki, Rusiya kommunikasiyaların açılması planının reallaşmasına mane olacaq gərginlikdə maraqlı deyil.

Şahinoğlu deyib ki, Azərbaycanın iki strategiyası var - Qarabağda mövcudluğun möhkəmləndirilməsi və sərhədlərin nəzarətə götürülməsi.

Lakin Rusiyaya suallar var, Qarabağda ermənilərin qanunsuz hərbi birləşmələri indiyədək tərksilah edilməyib, başqa problemlər də var.

Eyni zamanda, o hesab edir ki, Türkiyə ilə ittifaqı gücləndirmək lazımdır.

“Bu hadisələr müharibəyə gətirib çıxara bilərmi?” sualının cavabında Şahinoğlu deyib ki, Paşinyan müharibədə maraqlı deyil.  Lakin maraqlı ola biləcək qüvvələr var. Onlar üçün qələbə və ya məğlubiyyətin fərqi yoxdur,  əsas məsələ Paşinyanı buraxmamaqdır.

Ekspert həmçinin qeyd edib ki, əgər bu, baş verərsə, bu, Ermənistanla Azərbaycan arasında müharibə olacaq. Və əgər Ermənistan Kollektiv Təhlükəsizlik Müqaviləsi Təşkilatına ümid edirsə, yanılır. Belarus, Qazaxıstan və başqaları Ermənistan üçün döyüşməyə əsgər göndərməyəcəklər.

Nəhayət, Elxan Şahinoğlu qeyd edib ki, sərhədlərin müəyyən edilməsi prosesinin başa çatdırılmasını sürətləndirmək lazımdır, çünki bu, regiona real sakitlik gətirəcək.—0—