Gədəbəydəki problem niyə illər sonra partladı? Sakinləri eşidən niyə olmayıb? – Nazim Bəydəmirli Çətin sualda

Bakı/22.06.23/Turan: Gədəbəy rayonunun son günlər etiraz aksiyalarının keçirildiyi Söyüdlü kəndinin girişinə polis postunun qurulduğu bildirilir.Yerli sakinlərin verdiyi məlumata görə, kəndə giriş-çıxış məhdudlaşdırılıb: "Postda kənd sakinlərinin şəxsiyyət vəsiqəsini yoxlayıb buraxırlar. Avtomobillərə baxış keçirirlər".

Onların deməsinə görə, Söyüdlü sakinləri olmayanların kəndə girişi çətinləşib: "Burada yasımız var. Qonşu kəndlərdən gələnlər var idi. Onları buraxmırdılar. Getmişik, danışıb buraxdırmışıq. Biz blokadada yaşayırıq".

Daxili İşlər Nazirliyinin (DİN) Mətbuat xidmətinin Gəncə regional qrupunun baş inspektoru, polis kapitanı Eşqin Qasımov da "Turan"a kəndə digər şəxslərin girişinin məhdudlaşdırıldığını təsdiqləyib.

Gədəbəy rayonunun Söyüdlü kəndində vəziyyətin araşdırılması üçün yaradılan komissiyanın üzvləri Gədəbəy rayonuna gəlib. komissiya Söyüdlü kəndində tullantıxana sahəsində monitorinqlərin aparılmasını və mövcud vəziyyətin qiymətləndirilməsini təmin etməli, sakinlərin sağlamlığının və ətraf mühitin qorunması sahəsində vətəndaşların müraciətlərini araşdırmalı, monitorinqin və qiymətləndirmənin nəticələrinə uyğun olaraq müvafiq təkliflərini hazırlayıb Nazirlər Kabinetinə təqdim etməlidir.

Qeyd edək ki, iyunun 21-də Baş nazir Əli Əsədovun Sərəncamı ilə Gədəbəy rayonunun Söyüdlü kəndində tullantıxana sahəsində monitorinqlərin aparılması və mövcud vəziyyətin qiymətləndirilməsi məqsədilə Komissiya yaradılıb.

Gədəbəydə baş verənlər barədə həmin bölgədən vaxtı ilə deputat olmuş Nazim Bəydəmirli Kamran Mahmudovun təqdimatında yayımlanan “Çətin sual” verilişində danışır.