Hərbi ekspert: “İşdən çıxarılan hərbçilər sabitliyə təhlükə yarada bilərdilər”

Bakı/17.03.21/Turan: Turan İnformasiya Agentliyinin “Çətin sual” proqramının 2021-ci il 17 mart tarixli buraxılışı  “General Rövşən Əkbərovun həbsi” mövzusuna həsr edilmişdi.

Verilişin qonağı olan “Xəzər” Hərbi Tədqiqatlar İnstitutunun rəhbəri Cəsur Sümərinli deyib ki, ehtiyatda olan generel-leytenant, Milli Qəhrəman Rövşən Əkbərovun 2001-ci ildə törətdiyi cinayətə görə üstündən 20 il keçdikdən sonra bu günlərdə həbsə alınması üzün sürən qanunsuzluğun  göstəricisidir:  “Əgər qanun olsaydı vaxtında cəzalandırılardı”, - institut rəhbəri bildirib.

Onun deməsinə görə, haqqında bəhs edilən cinayət işinin baş verdiyi ilk illərdə Ukrayna Prokurorluğu bildirirdi ki, bu cinayətdə şübhəli şəxs  Azərbaycanda gizlənir. C.Sümərinliyə görə, Rövşən Əkbərov ambisiyalı şəxs olub, müdafiə naziri Səfər Əbiyevə alternativ şəxs kimi göstərilib.

İnstitut direktoru deyir ki, bu, həm də hərbi sahədə ordudakı qruplaşmalar  arasında ziddiyyətlərin olmasının göstəricisidir: “Rövşən Əkbərov artıq vəzifədən azad edilmiş Azərbaycan Müdafiə Nazirliyi Baş Qərargah rəisi Nəcməddin Sadıkovun qruplaşmasına aid şəxs olub. Müdafiə Nazirliyindəki vəziyyət isə əsgər ölümlərinə, korrupsiyaya, rüşvətə meydan açırdı, qanunsuzluq atmosferi yaradırdı. Belə bir atmosfer əsgər ölümlərinə, əsgər ölümləri isə xalq arasında etirazlara səbəb olurdu”.

İnstitut direktoru deyib ki, daxilində ziddiyyətlər olan ordu rəhbərliyi isə  siyasi sabiltiyin pozula bilməsi baxımından hakimiyyət üçün təhlükəli idi. Onun fikrincə, Zakir Həsənov müdafiə naziri təyin edildikdən sonra vəziyyət tədricən normallaşmağa başladı.

Bəzi generalların tədricən, özü də İkinci Qarabağ Müharibəsindən sonra vəzifədən azad olunmalarına gəlincə, institut rəhbəri deyib: “Bunları birdən azad etdikdə kiminsə “təxribatçı” əmr verə bilməsi ehtimalı nəzərə alınırdı. Odur ki, onların hamısı eyni vaxtda vəzifələrdən azad edilmədilər. Amma həmin şəxslərin Zəfər paradında olmamaları, orden və medallara təqdim edilməmələri göstərirdi ki,  məsələ aydındır, vəzifədən getmələri zaman məsələsidir. Bu generallar korrupsiya, rüşvət  faktlarına görə vəzifələrdən azad edilməyiblər. Görünür, hansısa xəyanət ehtimalı var. Çünki hakimiyyət korrupsiya, rüşvətə görə onları bağışlardı, hakimiyyət xəyanəti bağışlamır. Görünür,  hansısa palanlar ifşa edilib”.

O hesab edir ki, Azərbaycanda bu və digər ranqda hərbçilərin həbsi azı bir il  davam edəcək.

İnsitut direktoru deyib ki, artıq Azərbaycanda hərbi sahədə islahatların da vaxtı yetişib və ölkə bu sahədə istiqamətini müəyyən etməlidir. Burada isə Rusiya, yoxsa NATO hərbi qaydalarının tətbiqi arasında seçim edilməlidir.

Bu mənada Cəsur Sümərinli yada salıb ki, dövlət başçısı İlham Əliyev bu yaxınlarda Azərbaycan ordusunda türk modelinin tətbiq oluna biləcəyinin anonsunu verib. 

İnstitut rəhbəri vurğulayıb ki, Türkiyə hərbi modelinin Azərbaycana gəlişi NATO hərbi standartarının gəlişi deməkdir, bu isə bu sahədə korrupsiyanın, rüşvətin bitməsi tələbini gündəmə gətirir.    

Xatırladaq ki,  Rövşən Əkbərov bu günlərdə Azərbaycan hüquq-mühafizə orqanları tərəfindən saxlanılıb. Baş Prokurorluğun məlumatına görə, onun həbsinə səbəb 2001-ci ildə Ukrayanın paytaxtı Kiyevdə Azərbaycan vətəndaşı Elçin Əliyevi qətlə yetirməsidir. Ona Azərbaycan Cinayət Məcəlləsinin 120-ci və digər maddələrilə ittiham irəli sürülb, barəsində 4 aylıq həbs qətimkan tədbiri seçilib.-05B-