Media-icmal 18.03.21

Minalanmış ərazilərin xəritələrinin Azərbaycana verilməsi, Maştağa kəndində həyət və zirzəmiləri subasma halları, esemes icazə sisteminin tətbiq edilə bilməsi  ehtimalı, ehtiyatda olan general-leytenant  Rövşən Əkbərova hansı cəzanın verilə bilməsi ehtimalı  və s. məsələlər medianin aparıcı mövzuları sırasındadır.

“Yenisabah.az”  saytı “Minalanmış ərazilərin xəritələri Azərbaycana təqdim edilməsə...” - Prezident şərt qoydu” sərlövhəli məqalədə “ATƏT-in fəaliyyətdə olan sədri Ann Lindenin Azərbaycana bu günlərdə olmuş səfərinin  nəticələrini politoloq Elxan Şahinoğlu ilə dəyərləndirir.

Politoloqa görə, görüşdə Azərbaycan-ATƏT birgə əməkdaşlığına baxış olub və “Qarabağ məsələsi” həllini tapdığı üçün bu istiqamətdə tərəflər arasında fəaliyyətə ehtiyacın olmadığı vurğulanıb.

Elxan Şahinoğlu deyir ki, iki amil ATƏT sədrinin diqqətinə ən yüksək səviyyədə çatdırılıb.  

Birinci məsələ, Ermənistanın Azərbaycan ərazisinə silahlı şəxslər göndərməsi və ATƏT-in bunun qarşısını almalı olmasıdır. İkinci məsələ isə odur ki, 2020-ci il 10 noyabrdan sonra Qarabağda həbs edilən erməni silahlılar əsir yox, təxribatçılardır, geri qaytarılmayacaqlar və qanun qarşısında cavab verəcəklər.

“Ermənistan minaladığı Azərbaycan ərazilərinin xəritələrini Bakıya verməlidir və bu, olmadıqca “əsirlər” mövzusu da müzakirə oluna bilməz” deyə politoloq rəsmi Bakının sərgilədiyi münasibəti diqqətə çatdırır.

“Müsavat.com” saytı isə “Bakıda minlərlə insanın həyatı təhlükədə-Nə baş verir?” sərlövhəli məqalədə Bakının ən böyük kəndlərindən olan Maştağada ev və zirzəmiləri subasma halları araşdırılır.

Müəllifin deməsinə görə, sakinlər həyətlərini, evlərini su basmasından şikayətçidirlər və bunun səbəbləri məlum deyil.

Müəllifə görə, kəndin bəzi yerlərində vəziyyət o həddə çatır ki, mühərriklə həyətə yığılan suyu çəkməsələr, ev ya suyun içində qala, ya da divarlar bir gün başlarına uça bilər. Ən qorxulusu isə zirzəmilərə, həyətlərə dolan suyun evlərin bünövrəsini uçmaq təhlükəsi ilə üz-üzə qoymasıdır, digər tərəfdən bu halda antisanitariya da baş alıb gedir.

Müəllifin deməsinə görə, sakinlər bunun yağış, qrunt suları olduğunu düşünüblər, amma illər keçdikcə həyətlərinə, zirzəmilərinə daha çox su dolması vəziyyətin nə qədər ciddi olduğunu göstərib: “Mühərrikin 2-3 dəqiqə işləməməsi ilə yaşayışın dözülməz həddə çatdığını bildirən sakinlər iddia edirlər ki, evlərini qəzalı vəziyyətə salan, yaşayışı dözülməz edən bu su vaxtilə Maştağada inşa edilən su anbarından sızır. Sakinlərin deməsinə görə, təxminən 30 il öncə həmin su anbarında qəzalı vəziyyət yaranıb və həmin ərəfələrdə də həyətlərini və zirzəmilərini su basıb.

Həmin vaxt anbarda aparılan təmir-bərpa işlərilə problem qismən aradan qalxsa da indi vəziyyət daha acınacaqlıdır. Belə ki, anbarda çatlar böyüyüb və belə nəticə çıxır ki, su anbarında həqiqətən də qəza vəziyyəti artmaqdadır və kənd təhlükə ilə üz-üzədir”, - müəllif vurğulayır.

Müəllif deyir ki, su basmaları 1990-cı ildə də, 2012-ci ildə də belə olub, indi də həmin hal təkrarlanır, mühərriklər gecə-gündüz işləyir, söndürəndən 3-4 dəqiqə sonra su əvvəlki səviyyəyə qalxır.

“Sfera.az” saytı isə “ESEMES icazə ilə bağlı vacib açıqlama…”  ayın 18-dən” sərlövhəli məqalədə isə son günlər koronavirus infeksiyasına yoluxmaların artması ilə bağlı ESEMES icazənin tətbiq edilib-edilməməsi müzakirəyə çıxarılır.     

Müəllif deyir ki, son günlər bu virusa yoluxmanın artması ESEMES icazənin tətbiqi məsələsini aktuallaşdırıb. Həm də bu icazə növü tətbiq olunduqda peyvənd olunan şəxslər də ESEMES icazədən istifadə etməlidirmi sualını gündəmə gətirib. 

Həkim Adil Qeybulla bu halda vaksinasiya olunan şəxslərə qadağa və məhdudiyyətlərin tətbiq olunmasını doğru saymır.

Adil Qeybulla  deyir ki, bu ilin yanvar ayından korornavirus əleyhinə vaksinasiyaya start verilib, 450 min nəfərdən çox adam peyvənd edilib, peyvənd insanda immunitet formalaşdırır və bu xəstəliyin ağır keçməsinin qarşısını alır.  

Onun sözlərinə görə, vaksin olunmuş şəxslər risk daşımır və onlarda demək olar ki, yoluxduruculuq qabiliyyəti də çox aşağı olur.

Adil Qeybullaya görə, ESEMES icazənin yalnız peyvənd olunmayanlara tətbiqi daha doğrudur, bu, yoluxma sayının kəskin artmaması üçün faydalı olardı. 

Xatırladaq ki, Azərbaycanda yanvarın 18-dən Çinin “SinoVac” şirkətinin peyvəndindən istifadə edilir və peyvəndlənmə bütün ölkə üzrə könüllü və dövlət hesabına aparılır.

“Redaktor.az” saytı isə “Rövşən Əkbərovu 20 il və ya ömürlük həbs cəzası gözləyir – Milli Qəhrəman adı isə..” sərlövhəli məqalədə barəsində bəhs edilən ehtiyatda olan general-leytenant, Milli Qəhrəman Rövşən Əkbərovu hansı cəzanı gözləməsini vəkil Roman Qaraşov şərh edir.   

Müəllif deyir ki, Rövşən Əkbərov  20 il bundan öncə qətl törətməkdə şübhəli bilinir, bu səbəblə bu günlərdə həbsə alınıb, barəsində dörd aylıq həbs qətimkan tdbiri seçilib.  

Vəkil Roman Qaraşov bildirir ki, Rövşən Əkbərovun təqsirli bilindiyi cinayət xüsusilə ağır cinayətlər kateqoriyasına aiddir və bu halda cinayəti törədən şəxsi 20 ilə qədər və ya ömürlük həbs gözləyir.

Vəkilin deməsinə görə, məhkəmə şəxsin təltiflərindən məhrum edilməsi qərarına baxılması üçün aidiyyatı orqana təqdimat göndərir. Vəkil deyir ki, cinayət sübuta yetirildiyi halda məhkəmə təltiflərdən məhrumetmə barədə təqdimat verə bilər.