Hüquq müdafiəçisi: “Tərtər işi”ndə işgəncə barədə 3-5 adam danışmır ki...”

Bakı/12.05.21/Turan: “Tərtər işi” ilə bağlı saxlanılmış şəxslərə işgəncə verilməsini Baş prokrurorun “absurd”, Hərbi Prokurorun isə “nağıl” adlandırması əsassızdır. Belə ki, işgəncələrin olması barədə 3-5 nəfər danışmır ki... Bu barədə əsgərlər, zabitlər, həmin işgəncələrə məruz qalanlar danışır”.

Bu barədə Turan-ın “Çətin Sual” proqramının mayın 12-də efirə getmiş buraxılışında Bakı İnsan Hüquqları Klubunun rəhbəri Rəsul Cəfərov bildirib.

Onun fikrincə, hətta yumşaq deyilsə nelə, Hərbi prokuror bu məsələ barəsində həqiqətləri söyləmir. Hüquq müdafiəçisi deyir ki, bu məsələ ilə bağlı Ali Məhkəmənin bir neçə qərarı var ki, orada da həmin işcəncə faktlarından danışılır. İşgəncələr də ona görə verilirdi ki, işgəncə altnda olanlar casusluq edənlərin adlarını desinlər.    

Cəfərov deyir ki, elə işlər var ki, eyni ərazidə, amma başqa-başqa hərbi hissələrdə qulluq edən əsgərlər və s. vətənə xəyanətlə bağlı başqa hərbçilər barədə ifadə veriblər və bundan başqa bu ittihamı təsdiq edəcək hər hansı sənəd yoxdur: “Bu ifadələr də işgncə vasitəsilə alınıb. Elələri var ki, işəncə verilsə də zərərçəkən kimi tanınmayıb. Hətta hökmlərdə, məhkəmə qərarlarında işgəncə ilə bağlı danışılır. Belə təsəvvür var ki, adamları yığıblar, işgəncə veriblər, kim kimin adını çəkibsə vətən xaini kimi tanıyıblar”, deyə Cəfərov bildirir.

Onun dediyinə görə, “Tərtər işi”ndə adları keçən 10 hərbçi məhz işgəncə faktları ilə bağlı məhkəməyə müraciət edib və işlərinin hərtərəfli araşdırılmasını istəyir, onların arasında zabitlər, gizirlər də var.

Hüquq müdafiəçisi əlavə edir ki, elə şəxslər var ki, yalan ad çəkərək azad olunublar.  Bu adlar sırasında 2016-cı ilin aprel döyüşlərində fərqlənən, dövlət mükafatı almış hərbçilərin də adları çəkilmişdir.

Hüquq müdafiəçisi deyir ki, vətənə xəyanətlə bağlı mötəbər sübutlar yoxdur,

əgər olsaydı bunun  gizli məhkəmə dinlənilməsi keçirilə bilərdi. Rəsul Cəfərova görə görünən budur ki,  prokurorluq və hərbi prokurorluq məsələnin ədalətlə araşdırılmasında maraqlı deyil. 

Hüquq müdafiəçisinə görə, məsələni tam araşdırmaq üçün vəzifəsindən asılı olmadan bu işdə təqsirli olan bütün hərbçilər cinayət məsuliyyətinə cəlb olunmalı, işgəncə görmüş, amma zərərçəkən kimi tanınmamış şəxslərin bu statusları tanınmalı, bu işdə əsassız həbsə, məhkumuğa məruz qaldığına görə hökumət insanlara maddi-mənəvi təzminat ödəməlidir.

Xatırladaq ki, “Tərtər işi” 2016-cı ilin mayında bir qrup hərbçinin həbsi ilə bağlı olan işdir. Azərbaycan Daxili İşlər Nazirliyi, Müdafiə Nazrirliyi, Dövlət Təhlükəsizlik Xidmətinin o vaxt yaydığı bəyanatda baş verənlər vətənə xəyanət kimi dəyərləndirilib. Sonra istintaqın gedişində məlum oldu ki, bir neçə şəxs işgəncə nəticəsində dünyasını dəyişib. Buna görə bəzi müstəntiqlər həbsə alınıb. -05B-